8
Bantu baabwelele kufuma mu Babeli
1 Baba i bakulu ba mikoa pamo ni nvyalo yabo, balia baabwelele pamo ni nene kufuma ku Babeli musita wa kuteeka kwakua likolo Artasasta.
2 Gershomu waali mukulu wa luvyalo lwakua Finehasi,
Danieli waali mukulu wa luvyalo lwakua Itamari,
Hatusi waali mukulu wa luvyalo lwakua Daudi
3 Bantu ba mu luvyalo lwakua Sekania,
ni Parosi pamo
ni Zakaria, mpendua yabo baali balalume 150.
4 Bantu ba mu luvyalo lwakua Pahati-Moabu:
Elioenai mwina Zerahia, waali wali pamo ni balalume 200.
5 Bantu ba mu luvyalo lwakua Zatu, ni Sekania mwina Yahasieli, mpendua yabo baali balalume 300.
6 Bantu ba mu luvyalo lwakua Adini, ni Ebedi mwina Yonatana, mpendua yabo baali balalume 50.
7 Bantu ba mu luvyalo lwakua Elamu, ni Yesaia mwina Atalia, mpendua yabo baali balalume 70.
8 Bantu ba mu luvyalo lwakua Sefatia, ni Zebadia mwina Mikaeli, mpendua yabo baali balalume 80.
9 Bantu ba mu luvyalo lwakua Yoabu, ni Obadia mwina Yehieli, mpendua yabo baali balalume 218.
10 Bantu ba mu luvyalo lwakua Selomiti mwina Yosifia ni wa mu luvyalo lwakua Bani, mpendua yabo baali balalume 160.
11 Bantu ba mu luvyalo lwakua Bebai ni Zakaria mwina Bebai, mpendua yabo baali balalume 28.
12 Bantu ba mu luvyalo lwakua Azgadi, ni Yohana mwina Hakatani, mpendua yabo baali balalume 110.
13 Bantu ba mu luvyalo lwakua Adonikamu, lwaali lwa mpeleezio, meena abo ni aza:
Elifeleti, Yueli, ni Semaia, mpendua yabo baali balalume 60.
14 Bantu ba mu luvyalo lwakua Bigwai,
ni Utai mwina Zakuri, mpendua yabo baali balalume 70.
Ezra wakeba Balawi ba kubomba mu Nghanda yakua Leza
15 Nene Ezra naakolonghaniizie baba bonse mumbali mwenzi uile ku Ahava, papo patwaikeele nsiku itatu, naakebele mu bantu ni mu babitambua, nsyaasangilemo bantu ba mu luvyalo lwakua Lawi.
16 Ni pakako naakuutile Eliezeri, ni Arieli, ni Semaia, ni Elnatana, ni Yaribu, ni Elnatana, ni Natana, ni Zakaria, ni Mesulamu pantu i baali bakulu ba maano, pamo ni bakasambilizia babili Yoyaribu, ni Elnatana.
17 Baba bantu naabatumine kuli Ido mukulu wa ku Kasifia, baye bamwane Ido ni ba kwakue babombi ba mu Nghanda yakua Leza ba ku Kasifia batuleeteleko bantu ba kubomba mu Nghanda yakua Leza wetu.
18 Kukonkana ni buwame bwakua Leza pali fwefue, baatuleteele muntu wa maano, Serebia pamo ni baana bakue ni balupua bakue. Bonse pamo baali lyanondo ni mwanda. Ozo Serebia waali wa mu luvyalo lwakua Mali, Mali mwina Lawi, Lawi mwina Izraeli.
19 Kabili baatutumiine ni linge libumba lyaali lyalombwelue na Hasabia ni Yesaia ba mu luvyalo lwakua Merari, ni lupua lwabo pamo ni baana babo. Bonse pamo baali 20.
20 Baizile pamo ni babombi 220 baasaakwilue na Daudi ni masiiko kuti bakwasie miilo ya mu Nghanda yakua Leza. Ni meena abo amanikile.
Kwizilika pamo ni kupepa
21 Ni pakako, na-anine kuti twizilike kulia twali mumbali mwenzi wa Ahava, twikeefie ku menso akua Leza wetu, evi atwenzie bwino, fwefue, ni baana betu, pamo ni bunonsi bwetu bonse,
22 pantu naunvwile busoni bwa kumulomba likolo kuti atupeele libumba lya balukale, ni baseli ba pa farasi bakutukingilila ku balwani betu mu nzila, pantu twaamwanine likolo nangue, “Balia balibamukeba Leza, Leza aliwabakitila buwame, inzi kikonko ni kukanda kwakue kuli pa balia bonse balibamukaana.”
23 Kupwako, twaizilika bilio, twamulomba Leza wetu atusunge, ni ye watwitabila.
Byabupe bya mu Nghanda yakua Leza
24 Naasaakwile bamakolo lyanondo ni babili ba babitambua: Serebia, ni Hasabia, pamo ni bange lyanondo ba mu lupua lwabo,
25 naabapimiine mutofue ni oro, pamo ni bibombelo, ni bulongio bwa mu Nghanda yakua Leza wetu, bwaalongiiziwe na likolo, ni bakasoka bakue, na masiiko akue, pamo ni bwaalongiiziwe na Baizraeli bonse baalipo.
26 Naabapiimiine talanta kilo 22,000 ya mutofue, ni bibombelo bya mutofue talanta 3,400, ni bya oro talanta 3,400,
27 ni bibakuli bya oro 20 byaali byafinine diriki kilo 8.5, ni bibombelo bibili bya mukuba bikindeeme byaali byabeeka nga oro.
28 Naabaanine nangue, “Mwemue muli bazuuke bakua Yawe, ni bibombelo ni byo bizuukile. Mutofue ni oro, byonse ni byabupe byakua Yawe Leza wa basiinue.
29 Kansi labukile bebi bintu ni kubisunga mpaka musita umwaakabipiima pa menso a nombozi ya babitambua, ni Balawi, ni bakulu ba mikowa ya Baizraeli bali mu Yeruzalemu, mu miputule ya Nghanda yakua Yawe.”
30 Kabili babitambua ni Balawi baapokeleele tulingo twa mutofue ni oro, ni bibombelo bizuuke, ni kubileeta ku Yeruzalemu mu Nghanda yakua Leza wetu.
Babwelela ku Yeruzalemu
31 Mu mwezi wa mambo, mu busiku bwa lyanondo ni ibili, twaafumine pa mwenzi wa Ahava ni kuya ku Yeruzalemu. Leza waali wali pamo ni fwefue ni kutupususia ku balwani, ni ku bantu baali batubenza mu nzila.
32 Lutwaafikile mu Yeruzalemu, twaatuuziizie nsiku itatu.
33 Ni mu busiku bwa buna, twaapiimiinue mutofue ni oro, pamo ni bibombelo bizuuke bya mu Nghanda yakua Leza wetu ni kumupeela Meremoti mwina kitambua Uria, pamo ni Eleazari mwina Finehasi, ni Balawi babili, Yozadaki mwina Yeshua, ni Noadia mwina Binui.
34 Bebio byonse byaalembelue mpendua yabyo ni kufina kwabyo.
35 Bonse baabwelele kufuma mu buzia, baamweleele Leza wa Baizraeli ngelelo ya kuziziiwa, nghombe ndume lyanondo ni ibili mubeleele mikowa ya Baizraeli, mpanga 96, twina mikooko 77, tupwata lyanondo ni tubili twa ngelelo ya bibalo. Bebi bintu byonse, byaali ngelelo ya kuziziiwa yakua Yawe.
36 Kabili baatwele mwano wakua likolo ku babiloolo ni ku bandabukizi ba ku bwala mwenzi wa Efrati, ni bo baakwasiizie bantu pamo ni Nghanda yakua Leza.