8
Likolo wabiika lifunde palua Bayuda
1 Bobo bwenka busiku, likolo Ahasuero waamupeele nabeeza Esta bintu byonse byakua Hamani mulwani wa Bayuda. Mordekai ni ye waile kuli likolo pantu Esta waamubwilile nangue Mordekai ni muntu wakue.
2 Likolo waavuulile kazele ka kusyusyutilako ka ku munue ka-aapokolwele kuli Hamani ni kumupeela Mordekai. Esta ni ye waamubiikile Mordekai kuba mukulu wa bintu byonse byaali byakua Hamani.
3 Kabili Esta waapaapaatile kuli likolo, waponeene pa makasa akua likolo walimukulila walanda likolo afumiepo mapange abi akua Hamani Muagagi a kukambila Bayuda.
4 Likolo waamuolweleele Esta kabango ka oro. Esta ni ye waabuukile ni kuya kwimana ntanzi yakua likolo ni kulanda nangue,
5 “Kine likolo wawaminua, ni ne kine naitabilua, ni keebo kine kamuwamina, kabili kine wan'mona napalile, kulembue muzilo wa kuzilula muzilo waalembelue na Hamani mwina Hamedata Muagagi, muzilo ulandile palua kulovia Bayuda bonse bali mu biputu bya kyalo bya mu kyalo kyakua likolo.
6 Kubako kuti navinda kusipikizia kumona busanzo pa bantu bane? Kubako kuti navinda kusipikizia kumona lupua lwane palulimukuloviiwa?”
7 Likolo Ahasuero wa-anine nabeeza Esta ni Mordekai Muyuda nangue, “Nene namupeela kale Esta bintu byonse byakua Hamani, ni ye wakulikua kale ku kimuti pantu wakikita mapange abi pa Bayuda.”
8 Kansi mwemue benka lembele Bayuda byonse bimutonene mu liina lyakua likolo, musyusyutepo ni kazele ka ku munue kakua likolo, pantu malembo alembelue mu liina lyakua likolo, ni kusyusyutuapo kazele ka ku munue kakua likolo, tekuli wakuvinda kwalulula.
9 Pa busiku bwa 23 mu mwezi wa butatu, i mwezi wa Siwani, bakalemba bakua likolo baakuutilue kuli Mordekai kuti balembele Bayuda ni ndabukizi ya biputu bya kyalo 127 kufuma ku India mpaka ku Kushi. Kubalua kiputu kya kyalo kyaalembeelue mubeeleele nembelo yabo, kubalua bantu baalembeelue mu lulimi lwabo. Bayuda ni bo baalembeelue mubeeleele nembelo yabo ni mu lulimi lwabo.
10 Mordekai waalembele mu liina lyakua likolo Ahasuero ni kusyusyutapo kazele ka ku munue kakua likolo. Mpapulo yaatwelue mu biputu bya kyalo na baseli ba farasi yaali yaenda lubilo, farasi yaakuziiziwe kuti iye yabombiiwa na likolo.
11 Mpapulo yakua likolo yaapeele nsambu Bayuda bali mu mizi yonse kuti baye bakolonghana ni kwikingilila. Baapeelue nsambu ya kwinoona ni kwipaya pamo ni kulovia kubalua mutundu ni kubalua kiputu kya kyalo kine kyabasakukila, bene ni bakazi babo pamo ni baana babo. Kabili baapeelue ni nsambu ya kutwama bintu bya balwani babo.
12 Busiku bwaali bwatantikiilue Bayuda bwa kukita evio mu biputu bya kyalo monse na likolo Ahasuero, bwaali busiku bwa lyanondo ni itatu ya mwezi wa lyanondo ni ibili, i mwezi wa Adari.
13 Lwambu lwa mpapulo ya mizilo ya kupundua mu biputu bya kyalo yaapundilue ku ntundu yonse, evi Bayuda ni bo baye baiteaniizie kukita kibwelezi ku balwani babo pa bobo busiku.
14 Baseli ba farasi yaali yaenda lubilo, farasi yaali yabombiiwa na likolo, baakinkiziiziwe na likolo kuya kutwala mpunda mu Susani, muzi ukata wa kyalo.
15 Mordekai waafumine kuli likolo wavwele ngubo ya bukolo ya mukumino wa lyulu ni wa sue, ni kiteebo kikata kya oro ni nkanzu ya kitani kiweme kya mukumino wa bulumbi. Ni Susani, muzi ukata wa kyalo, waabulwile tupundu twa nsansa,
16 pantu Bayuda bonse baawamiinue ni kupeelua mukinzi.
17 Kubalua kiputu kya kyalo ni kubalua muzi waatweluemo mpapulo ya mizilo yakua likolo, Bayuda baalimo baawaamiinue, baakitile nsikunkulu ni kusangalala. Ntundu ingi yaialwile Bayuda pantu yaali yasyatiina Bayuda.