10
Kimina kya mwanda: Luzie
1 Yawe i lu-aamwanine Musa nangue, “Endo kuli Farao, pantu nakifinia mutima wakue ni wa babombi bakue pakuti n'mbalangisie tupapo twane pakati kabo,
2 evi ukabe wabalondolwela baana bobe ni benzikulu bobe bintu binaabakitiile Bamisri nafiitilue ni vinaalangisiizie tupapo twane pakati kabo, ni mwe mwaakamana nangue nene ndi Yawe.”
3 Ni pakako, Musa ni Haruni baile kuli Farao ni kumwana nangue, “Yawe Leza wa Baebrania walanda evi, ‘Eba, waakaba wakaanakaana sie pasili kunakila kuli nene? Baleke bantu bane baye ban'mpupe.
4 Kine wakaana kubalekela kuti baye, nakaba kuleeta luzie lukeele mu kyalo kyobe.
5 Lolo luzie lwakaba kukupilila kyalo, ni kyo kyakaba kwanda kumoneka. Lolo luzie lwakaba kulia byonse bisyakiinoonua na nvula ya kibue, lwakaba kulia kubalua kantu kali ku kimuti kilikyamena mu makaba enu.
6 Lolo luzie lwakaba kwizula mu nghanda yobe ni mu nghanda yonse ya babombi bobe pamo ni mu nghanda yonse ya bange Bamisri. Kekio kintu tekinamonekepo ku basiinue ni ku babikolue benu kutula busiku bubabambile kwikala mu keki kyalo mpaka lenu.’ ” Kupwako, Musa wafuma pali Farao ni kuya.
7 Babombi bakua Farao baamwipuziizie evi, “Emwe, kubako ozu muntu waakaba watwaliliile sie kuya wali muteo kuli fwefue? Baleke Baizraeli baye bamupupe Yawe Leza wabo. Kubako teumwene nangue kyalo kya Misri kilimukwinoonua?”
8 Kupwako, Musa ni Haruni bakuutua kuli Farao ni kubaana nangue, “Kuti mwaya kumupupe Yawe Leza wenu. Inzi nghane, ni bani bakaba kuyako?”
9 Musa wa-asukile nangue, “Twakaba kuya na balumendo betu ni bakote, baana betu balalume ni banakazi, mikooko ni mbuzi yetu, pamo ni nghombe yetu, pantu tupalile kumukitila Yawe nsikunkulu.”
10 Farao waabanine mu kapuni nangue, “Yawe abe pamo nenu kine namilekeela kuya ni lupua lwenu pantu n'mwene mwali na mapange abi.
11 Nakaana! Inzi pantu i mumwalombelanga, kuti mwaya sie bakulunke kumupupa Yawe.” Kupwako, Musa ni Haruni bakumbua pa ntanzi yakua Farao.
12 Kabili Yawe waamwanine Musa nangue, “Ale olwela kuboko kobe pa kyalo kya Misri, evi luzie lwize pa kyalo kya Misri ni kulia bilimbua byonse bya mu makaba byaasiiluepo na nvula ya kibue.”
13 Ni pakako, Musa waolweleele kabango kwakue pa kyalo kya Misri, ni Yawe waabuusiizie mwela wa kufuma ku kabanga, ni o waapuupiile pa kyalo koba konse ni busiku bonse. Musita wa lukeelekeele mwela wa ku kabanga waaleetele luzie.
14 Lolo luzie lwaasakukiile kyalo kyonse kya Misri ni kukupa nkendo yonse pantu lwaali lwakilile kuvula. Keki kimina kya luzie lwa ozu musango tekinamonekepo, kabili tekikikamonekapo.
15 Mu kyalo kyonse kya Misri mwa-alukile nfinzi pantu luzie lwaali lwakupiliile kyalo. Lolo luzie lwaaliile bilimbua byonse pamo ni mazabo onse a ku bimuti byaasyelepo musita waanokele nvula ya kibue. Pa kyalo kyonse kya Misri tepaasyele lyani libisi lya ku kimuti pamo ni bilimbua bya mu makaba.
16 Kupwako, penka papo Farao wakuuta kale Musa ni Haruni ni kubaana nangue, “Nene nakibala kuli Yawe Leza wenu ni kuli mwemue.
17 Ni pakako, ngeleele sie kibalo kyane lono lwendo ni kumupaapaata Yawe Leza wenu afumie keki kimina kya lufu pali nene.”
18 Kupwako, Musa wafuma pali Farao ni kuya kumupaapaata Yawe.
19 Yawe ni ye wa-asukile na kubuusia mwela ukata wa kufuma ku mboosi. Ozo mwela waululwile luzie lonse ni kulutwala ku Lyezi lya Kasi. Tekwaali luzie lwaasyele mu kyalo kya Misri.
20 Inzi Yawe waafiniizie paakale mutima wakua Farao. Ni pakako, waakeene kubalekeela Baizraeli kuti baye.
Kimina kya fundi: Nfinzi
21 Kabili Yawe waamwanine Musa nangue, “Olwela kuboko kobe mwiulu, evi kwaluke nfinzi itikeeme pa kyalo kya Misri, nfinzi ya kuvinda kupaapaatua ni kunvwika.”
22 Ni pakako, Musa waolweleele kuboko kwakue mwiulu. Ni nfinzi itikeeme yaapwile nsiku itatu yakupiliile kyalo kyonse kya Misri.
23 Nsiku yonse itatu Bamisri ba-andilue kumonana, kabili ba-andilue kuteluluka ponse pa baali. Inzi kisue kyaali kyali sie koko kwaali kwaikeele Baizraeli.
24 Pa mpeleezio Farao waamukuutile Musa ni kumwana nangue, “Endo mumupupe Yawe. Banakazi ni baana benu kuti mwabatwama, inzi tekutwame mikooko, ni mbuzi pamo ni nghombe.”
25 Inzi Musa waalandile evi, “Wewe upalile kutupeela nsambu ya kutwama nama ya bupe bwa ngelelo ya kumuziziizia Yawe Leza wetu.
26 Fwefue tupalile kuya ni biteekua byetu. Tekuli lubondo lulikusyala pano, pantu pa bebi biteekua i patupalile kufumia nama wa kwelela Yawe Leza wetu, kabili tetumanine kine ni nama wapipo utwaya tumwelele patuya kufika kolia.”
27 Inzi Yawe waafiniizie mutima wakua Farao mpaka wakaana kubaleka Baizraeli kuti baye.
28 Farao waamusasiliile Musa wamwana nangue, “Fuma papa! Endo waya. Tekuti nkakumone kabili, pantu busiku buwaakamona lukebu lwane, waakafua!”
29 Musa waamwasukile nangue, “Walanda kisinka. Nene nsikikaba kumona lukebu lobe.”