18
Yetoro wamupempula Musa
1 Yetoro kitambua wa ku Midiani, sevyala kwa Musa, waunvwile mpunda palua bintu byonse byaakitile Leza palwakua Musa ni palua Baizraeli, bantu bakue, pa kyamba kya kubafumia mu Misri.
2 Pa ozo musita Musa waali wasyapeele mukazi wakue Sipora nsambu ya kuya kuli se Yetoro. Ni ye waamupokeleele mwanaye
3 pamo ni baana bakue balalume babili. Wa mambo waali wainikilue liina lya Gershomu, pantu Musa waalandile evi, “Nakyaluka mweni mu kyalo kya bweni.”
4 Wa bubili waali wainikilue liina lya Eliezeri, pantu Musa waalandile evi, “Leza wakua tawe wakiba wali mukwasi wane wakin'mpususia mu lufu kuli Farao.”)
5 Yetoro sevyala kwa Musa waile kumupempula Musa. Waile pamo ni muka Musa waali ni baana bakue babili. Pa ozo musita Musa waali wakuulile mitanda mu kaseeba mumbali lupili lwakua Leza.
6 Yetoro waalaiziizie mpunda kuli Musa nangue, “Ne so vyala ndimukwiza kukupempula nali ni mukazi obe pamo ni baana bobe babili.”
7 Ni pakako, Musa waafumine ni kuya kumupokelela sevyala. Waamukontamiine, kabili waamukumbatiile koku balimukwipuzyania mutende. Pa kyamba, baingiile mu liema lyakua Musa.
8 Musa waamulondolweleele sevyala byonse byaakitile Yawe kuli Farao ni ku Bamisri pa mulandu wa Baizraeli, kabili waamulondolweleele palua Baizraeli vibaapususiiziwe na Yawe mu maavia aabakitikiile mu nzila.
9 Yetoro waakilile kuwamiinua lu-aunvwile palua bintu byonse biweme byaakitiilue Baizraeli na Yawe, ni palua kubapususia ku Bamisri.
10 Yetoro waalandile evi, “Yawe atasiiwe pantu waakupususiizie ku Bamisri ni kuli Farao. Ee, atasiiwe pantu waapususiizie bantu bakue ku Bamisri!
11 Evi nainika nangue Yawe i mukulu kukila baleza bonse pantu waapususiizie bantu bakue mu kukitilua bibiipile na kitoni kya Bamisri.”
12 Ni pakako Yetoro sevyala kwa Musa waaleetele ngelelo ya kuzizia ni kumwelela Leza. Haruni pamo ni masiiko onse a Baizraeli baizile kulia maliila a ngelelo pamo ni Yetoro sevyala kwa Musa ntanzi yakua Leza.
Nsokezi yakua Yetoro
(Malanguluzi a Mizilo 1.9-18)
13 Lukeele lwakue Musa waikeele pa kitebe kya bupinguzi ni kuya wabatwiliziizie vibaali basongelana koku bamuzyungulukiile kutula lukeelekeele mpaka kyungulo.
14 Yetoro sevyala kwa Musa lu-aamwene miilo yaali yabomba Musa, waamwipuziizie evi, “Ewe, uliwabombelaki miilo yatanine evi we bunke ni bantu bakuzyungulukiile koba konse kutula lukeelekeele mpaka kyungulo?”
15 Musa wa-asukile evi, “Ndimukubomba evi pantu bantu balimukwiza bakebele kumana kutona kwakua Leza.
16 Bantu lubalibaiza ni milandu kuli nene, ndinapingula kubalua muntu ni kumonapo ali ni nsambu. Ndinabaana mafunde akua Leza ni kubapeela mizilo yakua Leza.”
17 Sevyala kwa Musa waamwanine evi, “Teulimukubomba bwino.
18 Wewe pamo ni baba bantu bauli nabo mwakaba kutopa. Ozu mwilo ukilile bukata, te mwilo wa kubomba we bunke.
19 Ale unvua nsokezi yane, ni Leza abe pamo nobe. Upalile kuya wali mwimanizi wa bantu kuli Leza ni kumwana milandu yabo.
20 Upalile kubasambilizia mizilo ni mafunde akua Leza pamo ni kubalanga ngikalilo ni miilo ibapalile kuya babomba.
21 Inzi saakulapo bantu ba maano, bantu ba kisinka, bantu balibamukindika Leza pamo ni basuulile bituulilo. Usaakulepo banombozi ba mabumba a bantu 1,000, ni a bantu 100, ni a bantu 50, pamo ni a bantu lyanondo.
22 Baba banombozi bapalile bakabe bapingula milandu ya bantu kubalua busiku. Mane bakabe kuya bakuleetelako sie milandu ikata, inzi milandu iniini bakabe kuya bapingula bo bene. Ni pakako, wakaba kuya wa-angukiilue pantu bakukwasiako miilo.
23 Kine wakonka ezi nsokezi, ni Leza kine wakwitabizia kukita evio, teukiya wanaka. Ni bantu bakaba kuya babwela kwabo bali ni mutende.”
24 Musa waunvwile nsokezi yakua sevyala Yetoro ni kukita kubalua kantu mwa-aniinue.
25 Musa waasaakwile bantu ba maano mu Baizraeli bonse ni kubabiika kuba banombozi ba bantu. Waababiikile kuba banombozi ba mabumba a bantu 1,000, ni a bantu 100, ni a bantu 50, pamo ni a bantu lyanondo.
26 Ni bo baali bapingula bantu kubalua busiku. Milandu ikata baali bamutwaalila Musa, inzi milandu iniini baali bapingula bo bene.
27 Pa kyamba kya bebio, Musa ni sevyala Yetoro balayene, ni Yetoro waabwelele ku kyalo kyakue.