20
Mafunde lyanondo
(Malanguluzi a Mizilo 5.1-21)
1 Leza waalandile totu twebo tonse nangue,
2 “Nene ndi Yawe Leza obe waakufumiizie mu kyalo kya Misri muwaali wateekelue buzia.
3 “Teupalile kuya wali na baleza bange inga sie nene.
4 “Tekwibaazila mikisi ipaleene na bilengua bya mu muulu mu myulu, ao bya pansi pa kyalo, ao bya mu menda pensina kyalo.
5 Tekufukamina mikisi ao kwipupa, pantu nene Yawe Leza obe ndi Leza wa bunkua, Leza aliwakanda baana pa mulandu wa bubi bwa basibo mpaka ku luvyalo lwa butatu ni lwa buna lwa balia bansuulile.
6 Inzi ndinalanga ntono ku nvyalo nfu ya mu balia bantonene ni kusunga mafunde ane.
7 “Tekuzimbula liina lyane pa mapange abi, pantu ne Yawe Leza obe ndinakanda muntu aliwazimbula Liina lyane pa lisipalile.
8 “Izukila kuzuukia busiku bwa Sabata.
9 Mu nsiku mutanda waya wabombamo miilo yobe yonse,
10 inzi busiku bwa kilooba, i Sabata yakua Yawe Leza obe, mu bobo busiku tekubombamo miilo, wewe pamo ni mwana obe mwalalume, ni mwana obe mwanakazi, ni mubombi obe mwalalume, ni mubombi obe mwanakazi, ni nama yobe, pamo ni mweni wa mu nghanda yobe,
11 pantu ne Yawe naalengele myulu ni kyalo, ni myenzi pamo ni byonse bilimo mu nsiku mutanda, ni mu busiku bwa kilooba naatuuziizie. Ni pakako, ne Yawe naapaalile bobu busiku bwa Sabata ni kubuzuukia.
12 “Kindika so ni noko evi uye wali na nsiku ingi ya kwikala mu kyalo kiulailue na Yawe Leza obe.
13 “Tekwipaya.
14 “Tekukita bukende.
15 “Tekwiba.
16 “Tekubeepezia mwinobe bya bufi.
17 “Tekutokamua nghanda ya mwino, tekutokamua muka mwino, ao mubombi wakue mwalalume ao mwanakazi, ao nghombe wakue, ao punda wakue, ao kubalua kantu ka mwino.”
Mwezo wa bantu
(Malanguluzi a Mizilo 5.22-23)
18 Bantu lubaamwene bimpenimpeni ni kunvua mutukumo pamo ni lizui lya ntandala, ni lubaamwene lupili lwalimukufwinka kyunsi, baiseelukile koku balimukututuma na mwezo.
19 Baamwanine Musa nangue, “Ewe, landa ni fwefue, ni fwefue tulikukunvua, inzi Leza tekuti alande ni fwefue tukeeza kufua.”
20 Musa waabaasukile evi, “Tekutiine pantu Leza eziile kuti amyezie, evi mumane vili maka akue mukeeza kuya mwatwaliliile mu bibalo.”
21 Bantu baatwaliliile kwimana kule, inga sie Musa i waapalamiine nfinzi ikata ya lilezi lyaalimo Leza.
Mizilo palua bitale
22 Kabili Yawe waamwanine Musa abaane Baizraeli nangue, “Mwakiimwena mwe bene vinakifuma mwiulu ni kwiza kulanda nenu.
23 Tekuye mwaikitila baleza ba mutofue ao ba oro ba kuya mwapupa pambali.
24 Ni pakako, kaba kunkitila kitale kya bulongo ni kwelelapo ngelelo yobe ya kuzizia, ni bupe bwa bupwanikizi bwa pa mikooko yobe ni mbuzi pamo ni nghombe. Kubalua nkendo inaakaba nakusaakwila kuti uye wan'mpupilapo, i panaakaba naiza kumipaalila.
25 Kine wankuulila kitale kya mabue, tekuti ukakuule na mabue abaazilue, pantu kine wabombia kyela ku azo mabue, waakatiikaania kitale.
26 Tekuti ukankuulile kitale kyaliko kiselelo, pantu pa kusela muntu kuti wakupunamina ni kumona mubili obe.