24
Kipingo kyafikiliziiwa
1 Pa kyamba, Yawe waamwanine Musa nangue, “Mutwame Haruni, ni Nadabu, ni Abihu pamo ni masiiko 70 a Baizraeli usele nabo kono ku lupili, evi mwize mun'mpupe mwaliko lwa kule.
2 Wewe sie bunke i etabiilue kumupalamina Yawe. Baba bange tekuti bezie kusela pamo nobe peulu lupili ni kun'mpalamina.”
3 Ni pakako Musa waile kubaana bantu twebo tonse ni milao yonse yaalandile Yawe pamo ni mafunde onse. Bantu bonse baitabiile balanda nangue, “Tulikukita byonse mwalandilanga Yawe.”
4 Kabili Musa waalembele kubalua keebo ka-aapeelue na Yawe. Lukeele lwakue paakili lukeelekeele waabuukile ni kukuula kitale mwinsina lupili ni kwimika mapumpu lyanondo ni abili a mabue emaniineko mikowa lyanondo ni ibili ya Baizraeli.
5 Pa kyamba, waatumine balumendo ba mu Baizraeli kuti baye bamwelele Yawe ngelelo ya kuzizia ni kumusinzila nghombe ndume kuba bupe bwa bupwanikizi.
6 Musa waabuulilemo ntibu ya mulopa, waubiika mu bibakuli, ni unge wausansila pa kitale.
7 Kabili waabuulile kitabu kya kipingo ni kubabelengela bantu batwiliziizie. Bonse baalandile evi, “Byonse byalanda Yawe tulikubikita ni kubinakila.”
8 Pa kyamba, Musa waabuulile mulopa waali mu bibakuli, wausansila ku bantu walanda nangue, “Ozu i mulopa wa kipingo kyakua Yawe ki-akikita pamo nenu pa kumipeela aza mafunde onse.”
9 Kabili Musa ni Haruni, ni Nadabu, ni Abihu pamo ni masiiko 70 a Baizraeli, baaselele ku lupili.
10 Koko ku lupili kubaile, baamumwene Leza wakua Izraeli. Mwinsina makasa akue mwaali mwali kintu kyaali kyakitilue na safiri, kyaali kyali nga lyulu lisambikile.
11 Anzia baamumwene Leza, tebaakitiilue kibiipile. Baaliile bilio ni kumina pa ntanzi yakue.
Musa ku Lupili lwa Sinai
12 Yawe i lu-aamwanine Musa nangue, “Ale sela wize pano pandi peulu lupili, musita uulikuba pano, ndikukupeela bibazu bibili bya mabue anembelepo mizilo ni milao ya kubasambilizia.”
13 Ni pakako Musa waaseekeziiziwe na mubombi wakue Yoshua. Musa waaselele ku lupili lwakua Leza.
14 Musa ntanzi ya kusela wa-anine masiiko a Baizraeli nangue, “Syale mwatupembeele pano mpaka musita utwakaba kubwela. Unvue, kine muntu wa-aluka ni mulandu, autwale kuli Haruni ni Huri.”
15 Musa lu-aali wali koko ku lupili, lupili lwaakupiliilue na lilezi.
16-17 Bulumba bwakua Yawe bwaali pa lolo Lupili lwa Sinai. Lupili lwaakupiliilue na lilezi nsiku mutanda, ni mu busiku bwa kilooba, Musa waunvwile lizui lyakua Yawe lyamukuuta mu lilezi. Monekelo ya bobo bulumba bwakua Yawe, Baizraeli baabumwene bwaali nga mulilo uliwazizia peulu lupili.
18 Ni pakako, Musa waingiile mu lilezi ni kutwalilila kusela peulu lupili. Musa waikeele ku lupili nsiku 40 busiku ni koba.