30
Kitale kya kufunkiiziapo bubaani
(Kufuma 37.25-28)
1 “Ukakite kitale kya kimuti kya kasiiya kya kufunkiiziapo bubaani.
2 Ukakite kyalingheene monse monse, kikabe kyali na santimetre 50 mu kuleepa ni mu bukata. Mu kutuuluka kikabe kyali metre imo. Bintu bituulukile nga masengo bikabe byalundeene na kitale.
3 Peulu ni mumbali monse pamo ni ku mbao ituulukile nga masengo, ni ku mikonzo yonse ina ukakupeko oro isambikile, mane kabili peulu lya mumbali ukazyungulusiamo mukovio wa oro.
4 Ukakite bikobo bibili ku bwala bumo bwa kitale, ni binge bibili ku bunge bwala mwinsina olia mukovio wa oro. Mu bebio bikobo i mwakwingizia mipingo ya kupingilako.
5 Ezio mipingo ukakite ya kimuti kya kasiiya, kabili ukakupeko oro.
6 Kekio kitale ukakibiike pa ntanzi ya kipempe kili pepi ni Lisanduku lya Kipingo lili ni ntupiko, papo panaakaba nasaakaana nobe.
7 Kubalua busiku lukeelekeele, Haruni pa-akaba wawamia matala, akabe wafunkia bubaani buweme pa kekio kitale.
8 Ni musita wa kyungulo, Haruni pa-akaba waleemia matala, akabe wafunkia bubaani kuti bukabe ngelelo ya muyayaya ntanzi yakua Yawe ku nvyalo ya ku ntanzi.
9 Pa kekio kitale tekuli kufunkiapo bubaani busipalile, ao kwelelapo ngelelo ya kuziziiwa, ao bupe bwa bunga, ao kwitililapo bupe bwa bya kumina.
10 Limo mu mwaka, Haruni waakaba wakita bupwanikizi pa kitale pa elia mbao ituulukile nga masengo. Bobu bupwanikizi bwa limo mu mwaka, bupalile bukabe bwakitua na mulopa wa ngelelo ya bupwakizi pa mulandu wa bibalo bya nvyalo ya ku ntanzi, pantu keki ni kitale kizuukiisie kuli Yawe.”
Nfolanga ya bupwanikizi
11 Kabili Yawe waamwanine Musa nangue,
12 “Paukaba wapenda Baizraeli, kubalua mwalalume apalile akabe wamupeela Yawe nfuto pa mulandu wa bukose bwakue, evi kimina tekuti kikabe kyali pakati kabo musita wakubapenda.
13 Kubalua mwalalume waakaba wapendua, apalile akabe wafumia kipendo kya grama isaano ya mutofue kibiikilue mu kifuka kizuuke. Bobu bwaakaba bwali bupe bwakua Yawe.
14 Kubalua muntu wa mu balia baakaba bapendua ali na myaka 20 ni kukilapo, i waakaba wafumia bobo bupe bwakua Yawe.
15 Anzia aya wali munonsi ao mupabi, apalile kufumia kipendo kimonke kya grama isaano ya mutofue kibiikilue mu kifuka kizuuke lu-aliwamufumiizia Yawe bupe bwa bupwanikizi pa mulandu wa bukose bwakue.
16 Wewe waakapokelela bobo bupe bwa bupwanikizi kufuma ku Baizraeli ni kububombia kuwamiiziako Tabernakulo, evi bukabe bwali bupe bwa malanguluzi pa mulandu wa Baizraeli ntanzi yakua Yawe. Ezio i nfuto ya bukose bwenu.”
Musambilo wa mukuba
17 Yawe waamwanine Musa nangue,
18 “Ukakite musambilo wa mukuba wa kusambilamo ni kya kuteekapo kya mukuba. Ukauteeke pa bukata bwa kitale ni Tabernakulo, mane ukabiikemo menda.
19 Haruni ni baana bakue balalume bakabe basambamo ku maboko ni ku makasa abo.
20 Bapalile bakabe basamba ntanzi ya kwingila mu Tabernakulo, ni musita ubaakaba bapalama ku kitale kuti babombe mwilo wa kumufumiizia Yawe bupe bwa kuzizia.
21 Ni pakako, Haruni ni baana bakue balalume baakaba basamba ku maboko ni ku makasa abo bakeeza kufua. Ozu waakaba wali muzilo wa muyayaya kuli Haruni ni baana bakue balalume pamo ni ku nvyalo ya ku ntanzi.”
Mafuta azuuke
22 Yawe waamwanine Musa nangue,
23 “Ukabuule bintu bili ni bunu buweme: Manemane a menda kilo isaano, ni mudalasini ununkiile bwino kilo ibili ni kitika, ni kane inunkiile bwino kilo ibili ni kitika,
24 ni kida kilo isaano kukonkana ni kipendo kya mu kifuka kizuuke, pamo ni mafuta a mizeituni litre ina.
25 Ukakite mafuta azuuke. Azo mafuta akakitue na bantu bamanine kusanzia bebio bintu, akabe ali mafuta akuzuukiiziako.
26 Kabili ukasube mafuta ku Tabernakulo pamo ni ku Lisanduku lya Kipingo,
27 ni ku meza pamo ni ku bibombelo byakue byonse, ku kinara pamo ni ku bibombelo byakue byonse, ku kitale kya kufunkiiziapo bubaani,
28 ku kitale kya kuziziiziapo ngelelo pamo ni ku bibombelo byakue byonse, ku musambilo pamo ni ku kya kuteekapo.
29 Ukabizuukie kuti bikabe byazuukiisie. Kubalua kintu kyaakaba kyakumia bebio bibombelo kyaakaba kyazuuka.
30 Haruni ni baana bakue balalume ukabasube mafuta azuuke ni kubazuukia kuti bakabe ban'mombela mwilo wa bukitambua.
31 Ukabaane Baizraeli nangue, ‘Aza i akaba mafuta ane azuuke akaba asubua bantu pa mwilo wa bukitambua mu nvyalo ya ku ntanzi.
32 Aza mafuta tekuti akabe asubua pa mubili wa muntu asili kitambua, kabili tekuti ukabe wakita mafuta a ozu musango na bintu byaakakitiluako aza mafuta, pantu azuukile. Kabili aakaba ali azuuke lyonse kuli mwemue.
33 Kubalua muntu aliwasanzia mafuta nga aza ni kusuba muntu asili kitambua, waakafumiiwa pakati ka Baizraeli.’ ”
Bubaani
34 Kabili Yawe waamwanine Musa nangue, “Buula bintu bya bunu buweme: Bya butonvu bwa natafi, ni bwa shekeleti, ni bwa kelbena, ni bwa bubaani buweme. Bebi bintu byonse bikabe mu tulingo twalingheene.
35 Ku bebi i kuwaakakita bubaani bwa bunu buweme bukitilue na bantu bamanine kukita. Bobo bubaani bukabe bwalimo ni mukele pakuti bukabe bwasambikile ni buzuukile.
36 Ukapelepo bubaani buniini ukabubiike ntanzi ya Lisanduku lya Kipingo mu Tabernakulo pa nkendo inakaba nasaakaana nobe. Bwaakaba bwali bubaani buzuukiisie kuli wewe.
37 Kabili tekuti mukabe mwaikitila bubaani bwa ozu musango na bintu byaakakitiluako bobu bubaani, pantu bwaakaba bwali buzuuke kuli Yawe.
38 Kine kukabe muntu waakaikitila bubaani nga bobu kuti abubombie ku mubili wakue, waakafumiiwa pakati ka Baizraeli.”