32
Mukisi wa nghombe musoka wa oro
(Malanguluzi a Mizilo 9.6-29)
1 Bantu lubaamwene nangue Musa wakokola pasili kukooka kufuma ku lupili, baamukolonghaniine Haruni ni kumwana nangue, “Iza utukitile leza wakuti aye watutangiliile pantu ozu Musa wakitufumia mu kyalo kya Misri, tetumanine kyakimukitikila.”
2 Ni pakako, Haruni waabaanine evi, “Vuule ntimbi ya oro ku matui a bakazi benu, ni a baana benu balalume ni banakazi, mundeetele.”
3 Bantu bonse baavuulile ntimbi ya oro yaali ku matui abo ni kumutwalila Haruni.
4 Haruni waapokeleele ntimbi yabo ya oro, waisungulula ni kupongwela mu kintu kyaafumiizie mukisi wa nghombe musoka.
Baizraeli baalandile evi, “We Izraeli, ozu i leza obe waakufumiizie mu kyalo kya Misri.”
5 Haruni lu-aamwene evio, waakuulile kitale ntanzi ya mukisi wa nghombe musoka. Waalandile nangue, “Lukeele kwakaba nsikunkulu yakua Yawe.”
6 Lukeele lwakue baabuukile paakili lukeelekeele baya kwelela ngelelo ya kuzizia ni kutwala bupe bwa bupwanikizi. Bantu baikeele pansi kuti balie ni kumina. Pa kyamba, baabuukile ni kutendeka kukinda.
7 Yawe waamwanine Musa nangue, “Lenga ukooke pantu bantu bobe baawafumiizie mu kyalo kya Misri babala kibalo kikata.
8 Baba bantu baluba kale pantu balekela kukonka binaabaanine. Basungulula oro ni kwikitila mukisi wa nghombe musoka. Baupupa pamo ni ku-uwelela ngelelo balimukulanda nangue, ‘We Izraeli ozu i leza obe waakufumiizie mu kyalo kya Misri.’
9 Yawe waamwanine Musa nangue namona baba bantu vibafinine mitima.
10 Ni pakako, tekunkania kubakanda ni kubalovia pantu nabafiitilua. Inzi wewe pamo ni nvyalo yobe ndikumikita kuba mutundu ukata.”
11 Inzi Musa waamupaapeete Yawe Leza wakue wamwipuzia nangue, “We Yawe, ni kiki kyalengia kufiitilua bantu bobe bawaafumiizie mu kyalo kya Misri na buvinde ni maka obe?
12 Kine wakita evi, Bamisri bakaba kulanda nangue Leza waabafumiizie Baizraeli mu Misri na mapange abi a kubeepaila mu mpili ni kubalovia pa kyalo. We Yawe, fuukia kipuki kyobe, tekukitila bantu bobe bibiipile.
13 Languluka babombi bobe, Abrahamu ni Izaaki pamo ni Yakobo, balia baawalaile we mwine nangue waakalengia nvyalo yabo ikasanduluke ni kuvula nga ntanda ya mu lyulu, ni kubapeela kyalo kiwaabalaile kuti baakakipyane muyayaya.”
14 Ni pakako, Yawe wa-alulwile mapange abi a mutima wakue palua bubi bu-aalandile kukitila bantu bakue.
15 Musa waapilibukile ni kubamba kukooka ku lupili watweme bibazu bibili bya mabue byaali byalembeluepo mizilo kumbali ibili kubalua kibazu.
16 Leza i waakitile bebio bibazu, ni azo malembo aali alembelue na mwine Leza.
17 Yoshua lu-aunvwile mazui a bantu baali basaamiizie, waamwanine Musa nangue, “Koku ku mitanda kuli nsungu ya bului.”
18 Musa waalandile evi, “Ezi nsungu te ya bwanzio bwa bului, ao ya kwanziwa ku bului, inzi ni nsungu ya bantu balimukwimba nghimbo ya nsansa.”
19 Lubaapaleeme ku mitanda, Musa waamwene mukisi wa nghombe musoka ni bantu balimukukinda. Musa waafiitilue ni kupooza bibazu bya mabue pansi mwinsina lupili, ni byo byatobeka.
20 Pa kyamba waabuulile ozo mukisi wa nghombe musoka ubaakitile, wauzizia mu mulilo, waupela mpaka wa-aluka nga lufunko. Waapuupiile lolo lufunko mu menda ni kubapatikizia Baizraeli bamine.
21 Musa waamwanine Haruni nangue, “Ewe, baba bantu bakikukitaki pakuti ubalengie kukita kibalo kyabiipile evi?”
22 Haruni wa-asukile nangue, “We tawelenzi, tekufiitua. Umanine bwino nangue baba bantu bali ni kasonto ka kukita bibiipile.
23 Baizile kunghana evi, ‘Iza utukitile leza wakuti aye watutangiliile pantu ozu Musa wakitufumia mu kyalo kya Misri, tetumanine kyakimukitikila.’
24 Nene i lunakibaana nangue onse ali ni ntimbi ya oro ku matui avuule andeetele, kupwako, ban'mpeela, ni ne naipoza mu mulilo, penka papo mukisi wa nghombe musoka wamoneka.”
25 Musa lu-aamwene nangue Haruni waabalekeleele kukita mubatoneene, ni kubalengia kuba ba mpuni ku balwani babo,
26 waile kwimana pa nghingililo ya mitanda walanda evi, “Onse amutonene Yawe eze kuli nene.” Balawi bonse baamukolongheene Musa.
27 Musa i lu-aabaanine nangue, “Yawe Leza wakua Izraeli walanda nangue kubalua muntu pakati kenu atwame kipanga kyakue ni kuya kupita mu mitanda waipaya wa kwakue, ni kibuza wakue pamo ni onse u-apalameene nakue.”
28 Balawi baakitile muba-aniinue na Musa. Bobo busiku baipaile bantu mu pepi 3,000.
29 Musa waabaanine Balawi nangue, “Lelo mwaizuukia mwe bene pantu temwakituntumbila kwipaya baana benu ni ba kwenu. Leza amipaale.”
30 Lukeele lwakue Musa waabaanine Baizraeli nangue, “Mwakibala kibalo kikata. Inzi ndikuya paakale ku lupili kuli Yawe ngie n'mipaapaatile, pange kuti wamyeleela kibalo kyenu.”
31 Musa lu-aile kuli Yawe, waalandile evi, “Ee, kisinka baba bantu bakibala kibalo kikata. Baakiikitila leza akitilue na oro.
32 Ni pakako, nakupaapaata weleele kibalo kyabo. Inzi kine wakaana, vuwa liina lyane liwaalembele mu kitabu kyobe kya bukose.”
33 Yawe waamwanine Musa nangue, “Onse wakinduvia i unakaba kuvuwila liina lyakue mu kitabu kyane kya bukose.
34 Ale endo ulombole Baizraeli ubatwale pa nkendo inakikwana, uye watangiliilue na malaika wane. Inzi musita paukaba kukumana, nakaba kubakanda pa mulandu wa kibalo kyabo.”
35 Yawe i lu-aakandile babo bantu na kimina kikata kya malwele pantu baamwanine Haruni abakitile mukisi wa nghombe musoka.