36
1 “Ni pakako Besaleli ni Aholiabu pamo ni kubalua muntu apeelue mutima wa maano ni mulangue na Yawe pakuti abombe miilo yonse ya kukuula liema lizuuke, wakaba kubomba nga mwaalandiile Yawe.”
Bantu baleeta bupe bwingi
2 Musa i lu-aakuutile Besaleli ni Aholiabu pamo ni kubalua muntu apeelue mutima wa maano ni mulangue na Yawe, ni kubalua muntu epeele kubomba mwilo na mutima uweme.
3 Musa waapeele babo bantu bupe bonse bwaafumiiziwe na Baizraeli pa mulandu wa miilo ya kukuula liema lizuuke. Inzi Baizraeli baali batwaliliile sie kufumia bupe bwabo kubalua lukelekeele koku bawamiinue.
4 Babo bantu bonse ba mulangue baali babomba miilo ilekenkeene ya kwimika kifuka kizuuke, baafumine pa mwilo wabo ni
5 kuya kumwana Musa nangue, “Bantu baleeta bintu bingi kukila pa belia bipalile kuleetua mu miilo itwa-aninue na Yawe.”
6 Kupwako, Musa wapunda mu mitanda walimukulanda nangue, “Kubalua muntu, mwalalume ao mwanakazi, tekuti afumie kabili bupe pa mulandu wa kifuka kizuuke.” Ni pakako, baalekeele kutwala bupe,
7 pantu bintu bibaaleetele byaakilile kuvula, kabili byaakumeene bya kubombia ku miilo yonse.
Kukuula Tabernakulo
(Kufuma 26.1-37)
8 Bonse baali ni mutima wa mulangue mu babo babombi, baakitile Tabernakulo na bipempe lyanondo bya kitani kiweme kyaali kyapyatilue bwino na nyunzi ya mukumino wa lyulu, ni ya mukumino wa bulumbi pamo ni ya mukumino wa kasi. Ni Besaleli waalengelemo nkebu ya makerubi.
9 Kubalua kipempe kyaali kyaleepele metre lyanondo ni isaano, ni mu bukata metre ibili. Bebio bipempe byonse byaali byalingheene.
10 Besaleli waalundaniizie bipempe bisaano kumo, ni binge bisaano evio vyenka.
11 Waabiikile mikobelo 50 ya nyunzi ya mukumino wa lyulu kupela lya kunze ya kipempe, ni ku kinge kipempe waakitile evio vyenka.
12 Mikobelo 50 ya ku kipempe kimo yaali yakenteene na mikobelo 50 ya ku kipempe kinge.
13 Kabili waakitile tukobo 50 twa oro twa kulundaniiziako bebio bipempe bibili pakuti Tabernakulo ibe kintu kimo.
14 Kabili waakitile bipempe lyanondo ni kimo bya masako a mbuzi bya kubivimba peulu Tabernakulo.
15 Kubalua kipempe kyaali kyaleepele metre lyanondo ni isaano, ni mu bukata metre ibili. Bebio bipempe lyanondo ni kimo byaali byalingheene.
16 Besaleli waalundaniizie kumo bipempe bisaano, ni binge mutanda ni byo waalundaniizie kumo.
17 Waabiikile mikobelo 50 kupela lya kunze ya kipempe, ni ku kinge kipempe waakitile evio vyenka.
18 Waakitile tukobo 50 twa kulundaniiziako bipempe bibili pakuti kiye kyali kimo.
19 Kabili waakitile nkupo ya lelio liema, nkupo ya mpapa ya mpanga isubilueko mukumino wa kasi, ni peulu ezio nkupo waakitiilepo nkupo ya mpapa ya kipomo.
20 Waakitile mbao ya kimuti kya kasiiya ya kwimikilako Tabernakulo.
21 Lubao lumo lwaali lwaleepele metre isaano, ni mu bukata lwaali lwatanine santimetre 75.
22 Kubalua lubao lwaali lwali na matui abili, evi i vi-aakitile ku mbao yonse ya ku Tabernakulo.
23 Waakitile mbao 20 ya ku Tabernakulo lya ku nkungulua,
24 Kabili waakitile bintu 40 bya mutofue bya kwimikuamo mbao 20. Mu bintu bibili bya kwimikuamo, mwaimikilue lubao lumo lwa matui abili, ni mu binge bibili ni mo evio vyenka.
25 Ku bunge bwala bwa liema lya ku nkungua, waakitileko mbao 20,
26 ni bintu 40 bya mutofue bya kwimikuamo. Mu bintu bibili bya kwimikuamo, mwaimikilue lubao lumo, ni mu binge bibili ni mo evio vyenka.
27 Kumusana wa liema, lya ku mboosi, waimikileko mbao mutanda,
28 ni mbao ibili yaimikilue mu tufuli twa Tabernakulo lya ku mboosi.
29 Ezio mbao ibili ya mutufuli waimikile yakuminkeene kutula pansi, ni pa muulu waakuminkaniizie na kikobo kimo. Evio i vi-aakitile ku tufuli tonse tubili.
30 Ni pakako, yaali mbao mwanda, ni bintu bya mutofue bya kwimikuamo byaali lyanondo ni mutanda. Bya kwimikuamo bibili byaimikiluemo lubao lumo.
31 Waakitile mbango ya kimuti kya kasiiya, mbango isaano pa mbao ili ku lubali lumo lwa Tabernakulo,
32 ni inge isaano pa mbao ili ku bunge bwala bwa Tabernakulo, kabili ni inge isaano pa mbao ili ku kyamba kya Tabernakulo kuzika koba.
33 Lubango lwa pa bukata bwa mbao lwene lwaali lwapulilemo koku ni koku.
34 Ezi mbao pamo ni mbango baakupileko oro, kabili baakitile ni bikobo bya oro bya kupisiamo mbango. Ni ezio mbango baakupileko oro.
35 Baakitile kipempe kya nyunzi ya mukumino wa lyulu, ni wa bulumbi, pamo ni wa kasi, pamo ni ngubo ya kitani kiweme kya nyunzi ipyatilue, ni kukifwanizia na kubilamo nkebu ya makerubi. Ezio miilo yaabombelue na bantu bamaniisie.
36 Baakitile mapumpu ana a kimuti kya kasiiya ni kukupako oro. Bikobo byakue ni byo byaali bya oro. Kabili baakitile bintu bina bya mutofue bya kwimikuamo.
37 Pa kyamba baakitile kipempe kya pa mulyango wa liema, kipempe kya nyunzi ya mukumino wa lyulu, ni ya mukumino wa bulumbi, ni ya mukumino wa kasi pamo ni kitani kiweme kipyatilue. Yaali yali miilo ya bantu bamaniisie kubila.
38 Bebio bipempe byaakitiilue mapumpu asaano pamo ni bikobo byakue. Baasubile oro ku mikobelo pamo ni peulu mapumpu. Inzi baakitile ni bya kwimikuamo bisaano bya mukuba.