19
Bubi bwa bantu ba mu Sodoma
1 Bobo bwenka busiku kyungulo, balia bamalaika babili baafikile mu Sodoma. Loti waali waikeele pa mulyango wa muzi wa Sodoma. Lu-aabamwene, waile kubasensekela. Lu-aafikile pa baali, waaleele kyuba
2 ni kubaana nangue, “Mwe balopue bane, namipaapaata twende mwingile mu nghanda yakua mubombi wenu, mulaale musambe ni ku makasa, mane lukeele lukeelekeele paakili mukatwalilile mu lwendo lwenu.”
Ba-asukile evi, “Abe, fwefue tulikupunga sie pano penka panze.”
3 Inzi Loti waatwaliliile kubapaapaata mpaka bamwitabila ni kuya kwingila mu nghanda yakue. Loti waateaniizie matebeto, wabaapikila mikate isiliko ntutumusi. Ni bo balia.
4 Babo baeni lubaali tebanalaale, bantu ba mu Sodoma, balumendo ni bakote, baizile kuzyungulukila nghanda yaalimo baeni.
5 Baamwipuziizie Loti, “Balia baeni bawapokelanga keno kyungulo bali pi? Bafumiizie pano tupungule nabo.”
6 Loti waafumiine panze ni kusia waizalako.
7 Loti waabapaapaatile walanda nangue, “Mwe ba kwane, tekubakitile bintu bibiipile evio!
8 Unvue, ndi ni babinundue bane babili. Namipaapaata n'mbaleete kuli mwemue kuti mubakitile mumutoneene. Inzi tekuti mupungule na baeni, pantu basungilue bwino mu nghanda yane.”
9 Bene baalandile evi, “Wewe uli mweni mu ono muzi wetu! Eba, tewakeba kutupingula? Tupisie, kine wakaana, fwefue tulikukukitila kibiipile kukila baeni bobe.” Baamutintiile ku mulyango bakebele kupantula mulyango.
10 Inzi baeni bakua Loti baizwile mulyango, bamukulila Loti mukati ni kwizalako.
11 Babo bantu baali panze, bakulu ni banike, bauminue kafiifi na baeni bakua Loti mpaka ba-andua kumona mulyango.
Loti wafuma mu Sodoma
12 Balia bantu babili baamwanine evi, Loti, “Kine mu ono muzi ulimo ni baana balalume ni baana banakazi, pamo ni bako bobe ao bantu ba kobe, baane bafumemo
13 pantu fwefue tulikwinoona ono muzi. Yawe wakyunvua malilo a ono muzi. Ni pakako, wakitwana kwiza kwinoona ono muzi.”
14 Loti waile kubaana balumendo baali basakile baana bakue nangue, “Lenge mufume mu ono muzi pantu Yawe alikwinoona ono Muzi.” Inzi bene baali baizi nangue alimukubasekia sie.
15 Lubwaali bwasyakia, bamalaika baamwanine evi, Loti, “Lenga ufumie mukazi obe ni baana bobe banakazi mukeeza kulobelela mu bubi bwa ono muzi.”
16 Loti lu-aali wasyatuubatuuba, bamalaika baamusakatiile ku kuboko kwakue ni kwa kwakua mukazi wakue pamo ni ku maboko a baana bakue banakazi babili pantu Yawe waamunvwiliile nkumbu. Baabafumiiziizie kunze ya muzi.
17 Kupwako, malaika umo wamwana nangue, “Butuka wipususie, tekwikebuka ao kwimana mu lulambe, butukila ku mpili ukeeza kuloba.”
18 Inzi Loti wa-asukile evi, “We mulopue, evio abe.
19 Mona, mubombi obe wamulanga buwame ni kumunvwila nkumbu mu kumupususia. Ni pakako, nsibutukila ku lupili nkakitikilua na kibiipile ni kufua.
20 Mona muzi uniini ozu uli papa pepi wa kubutukilamo. Eba, te uniini? Nakupaapaata ungitabizie, n'mbutukilemo, ngiipususie.”
21 Waamwasukile, “Ni makola, nakwitabizia nsikaba kwinoona ozo muzi.
22 Malaika waamwanine evi, Ale lenga ubutukilemo pantu nsivinda kukita kantu lu-usinafike ku ozo muzi.”
Ni pakako, ozo muzi wainikilue Zoari. I kulanda nangue “kaniini.”
Muzi wa Sodoma ni Gomora wainoonua
23 Loti lu-aafikile ku Zoari, koba kaali kasyatulile.
24 Kupwako, Yawe wanokia nvula ya mulilo mu muzi wa Sodoma ni wa Gomora, mulilo wa kibiliti kufuma mwiulu mwa Yawe.
25 Ni kulovia ezio mizi pamo ni lulambe lonse, ni bantu bonse baali balimo pamo ni byonse byaali byamenenemo.
26 Inzi muka Loti waali pa kyamba, waikebukile ni kwaluka lipumpu lya mukele.
27 Lukeele lwakue lukeelekeele, Abrahamu waile pa kifuka pa-aali waimeene ntanzi yakua Yawe.
28 Waakentele lya ku Sodoma ni lya ku Gomora ni mu lulambe lonse, waamwene kyunsi kyaafutumuka nga kyunsi kya mu kikuka kya mulilo.
29 Leza lu-ainoonene mizi ya mu lulambe yaali yaikeelemo Loti, Leza waalangulukile Abrahamu ni kumupususia Loti.
Ntuntuko ya Bamoabu ni Ba-amoni
30 Loti ni baana bakue banakazi babili baile kwikala ku mpili mu lisele pantu waatiinine kwikala mu Zoari.
31 Mwana mukulu waamwanine mwalawakue nangue, “Situe wakota, kabili kono kutuli tekuli mwalalume wakutuupa kukonkana ni mibeele ya pa kyalo.
32 Kansi tumuminie situe divai, ni fwe tulaale nakue pakuti tumusungile situe luvyalo.”
33 Baamuminizie sibo divai bobo busiku, mwana mukulu waingiile ni kukumana nakue. Inzi Loti wene taamanine lwaaleele mwana ni lu-aabuukile.
34 Busiku bwaakonkelepo, mwana mukulu waamwanine mwalawakue, “Mona lukeele naakilaala ni tawe, kansi kabili tumuminie situe divai bono busiku, evi ni wewe uye ulaale nakue evi tusunge luvyalo lwakua situe.”
35 Baamuminiizie sibo divai, ni bobo busiku, mwana mwanike ni ye waile kulaala na se. Loti taamanine lwaleele mwana ni lu-aabuukile.
36 Evi i vyaimitile baana banakazi babili kuli sibo.
37 Mwana mukulu mwina Loti waavyele mwana mwalalume ni kumwinika Moabu. Ozo mwana i kikolue wa Bamoabu ni lenu kumo.
38 Mwana mwanike mwina Loti ni ye waavyele mwana mwalalume ni kumwinika Beni-Ami. Ozo mwana i kikolue wa Ba-amoni ni lenu kumo.