22
Leza wamwezia Abrahamu
1 Pa kyamba, Leza waamweziizie Abrahamu. Leza waamukuutile, Abrahamu, Abrahamu ni ye waiteebe, “Ne ono pano.”
2 Leza waamwanine Abrahamu, “Ale twama mwana obe lyonga Izaaki, mwana u-utoneesie uye nakue mu kyalo kya Moria, uye umukite ngelelo ya kuzizia pa lupili lundikukulangilila.”
3 Abrahamu waabuukile paakili, waateania punda wakue, watwama babombi bakue babili pamo ni mwana wakue Izaaki, ni kutyaba nkuni ya ezio ngelelo ya kuzizia, watendeka lwendo waya mpaka kolia kwa-aninue na Leza.
4 Busiku bwa butatu, Abrahamu waamwene ku nkendo ku-aali walimukuya wakili kule.
5 Abrahamu waabaanine babombi bakue, “Syale pano ni ozu punda, nene ni ozu mulumendo tulikuya ku kupupa, pa kyamba mane tubwele.”
6 Kupwako, Abrahamu wamutwika mwana wakue Izaaki nkuni ya kuziziiziako ngelelo, ni ye watwamako mwele ni mulilo, bonse babili baya.
7 Izaaki waamukuutile se, “We tawe!”
Se wa-asukile evi, “We mwana wane, ne ono pano.”
Izaaki waamwipuziizie se, “Nkuni ni mulilo bebi. Ale musoka wa mukooko wakuti tukite ngelelo ya kuzizia ali pi?”
8 Abrahamu waamwasukile evi, “We mwana wane, Leza mwine alikwipeela musoka wa mukooko wa ngelelo ya kuzizia.” Kupwako, bonse babili batwalilila kuya.
9 Lubaile kufika kolia ku-aalangilue na Leza, Abrahamu waakuulile kitale, ni kulongapo nkuni, wamukaka mwana wakue Izaaki ni kumubiika pa kitale peulu nkuni.
10 Kupwako, Abrahamu wabuula mwele kuti amusinze mwana wakue.
11 Inzi malaika wakua Yawe kufuma mu muulu waamukuutile, “Abrahamu, Abrahamu!”
Ni ye waitaba, “Ne ono pano.”
12 Malaika wamwana nangue, “Tekumukitila kintu kibiipile ao kumwipaya mwana obe. Evi nainika nangue ni kiine wewe umukindikile Leza, kabili umunakiile pantu tewakikaana kwelela mwana obe lyonga.”
13 Abrahamu lu-aikebukile, waamwene mpanga wakobelue na binkobankoba ku masengo akue. Waile kumukwata ni kwiza kumupyanika pa mwana wakue kuti aye wali ngelelo ya kuzizia.
14 Pa kekio kifuka Abrahamu wainikilepo liina lya “Yawe-Yire.” Ni pakako, i kikilikyalandilua nangue, “Pa lupili lwakua Yawe i payaakamoneka.”
15 Malaika wakua Yawe kufuma mu muulu waamukuutile Abrahamu lya bubili.
16 Ni kumwana nangue, “Yawe walanda nangue nalapa mu Liina lyane ne mwine nangue naakakupaala pantu tewakikaana kungelela mwana obe lyonga.
17 Kisinka naakakupaala, ni kusandulula nvyalo yobe, evi ikabe ingi nga ntanda ya mu lyulu, kabili nga musenga wa mumbali lyezi. Nvyalo yobe yaakanzia balwani babo.
18 Kupitila mu nvyalo yobe, ntundu yonse ya pa kyalo yaakapaalua pantu waanakiile mwano wane.”
19 Kupwako, Abrahamu wabwelelamo ku babombi bakue. Wabatwama ni kuya nabo ku Beri-Seba. Abrahamu waikeele koko ku Beri-Seba.
Nvyalo yakua Nahori
20 Pa kyamba kya bebi byonse, Abrahamu waaleeteelue mpunda nangue, “Milka wakimuvyalila mwaobe Nahori baana.”
21 Libeli wakue waali wakuutua Uzi, wa bubili waali wakuutua Buzi, waakonkelepo waali wakuutua Kemueli ozo waavyele Ba-aramu,
22 ni Kesedi, ni Hazo, ni Pildasi, ni Idilafu, pamo ni Betueli.
23 Betueli i waavyele Rebeka. Milka waamuvyaliile Nahori mwalawakue kwa Abrahamu baana balalume mwanda,
24 ni Reuma mukazi wa bubili waavyele Teba, ni Gahama, ni Tahasi, pamo ni Maaka.