4
Kaini Abeli
1 Adamu waaleele ni mukazi wakue Eva, ni ye waimitile ni kuvyala mwana mwalalume. Eva waalandile evi, “Ozu mwana napeelua na Yawe.” Ni pakako, waamwinikile Kaini.
2 Pa kyamba, waavyele unge mwana mwalalume ni kumwinika Abeli. Abeli waali wali kateeka wa mikooko, inzi Kaini waali mulimi.
3 Busiku bumo Kaini waatwele ngelelo ya buzombozi kuli Yawe.
4 Abeli ni ye waatwele libeli wa pa mikooko yakue, waipaya ni kufumiako munofu unonene kuti ube ngelelo. Yawe waawamiinue na Abeli pamo ni ngelelo yakue,
5 inzi taawaamiinue na Kaini pamo ni ngelelo yakue. Ni pakako, Kaini waafiitiisiwe mpaka ni pa menso pakalabana.
6 Yawe waamwipuziizie Kaini, “Eba, ale wafiitiluaki? Kabili wakalabaniiziaki pa menso?
7 Mona we Kaini uwamyenge, nga wawaminwanga. Inzi pantu waluvyanga, kibalo kikupembeele kyalimukukeba ku kuteeka. Inzi upalile kukyanzia.”
8 Kaini waamwanine mwalawakue Abeli nangue, “We mwalawane, twende mu kisonso.” Lubaafikile mu kisonso, Kaini waamwalukiile Abeli ni kumwipaya.
9 Yawe waamwipuziizie Kaini, “Mwalaobe ali pi?”
Wa-asukile nangue, “Ne nsimanine. Eba! Nene i musungi wakua mwalawane?”
10 Kabili waamwipuziizie evi, “Wakitangaki? Mulopa wakua mwalaobe uwazuumiizyanga pa bulongo ulimukundilila.
11 Evi wewe watiipua ni kukumbua pa bulongo bwaizulanga kanua kakue ni kupokelela mulopa wakua mwalaobe waazuumiiwanga na kuboko kobe.
12 Paukalima mu bulongo, tebukakuleetela kibwezia, inzi waakaba wali kanukunta mwaya kyalo.”
13 Kaini waamwanine Yawe, “Kukanda kuwankanda kwangaviizia, nsivinda kusipikizia.
14 Mona wankumba mu keno kyalo ni ku menso obe. Evi naakaba nali sie kanukunta mwaya kyalo, ni onse waakan'mona, waakangipaya.”
15 Yawe waamwanine Kaini, “Onse waakakwipaya, waakalandwilua nghendo kilooba.” Ni pakako, Yawe waamubiikile kalangi, evi onse waakamumona tekuti akamwipaye.
16 Kaini waafumine ku menso akua Yawe ni kuya kwikala mu kyalo kya Nodi, nkendo ili ku kabanga ka Edeni.
Nvyalo yakua Kaini
17 Kaini waaleele ni mukazi wakue, ni ye waimitile ni kuvyala mwana mwalalume ni kumwinika Enoki. Kaini waakuulile muzi ni kuwinika liina lya mwana wakue mwalalume.
18 Enoki waavyele mwana mwalalume ni kumwinika Iradi, Iradi waavyele Mehuyaeli, Mehuyaeli waavyele mwana mwalalume ni kumwinika Metushaeli, Metushaeli waavyele Lameki.
19 Lameki waupile banakazi babili, umo waali wakuutua Ada, ni unge waali wakuutua Zila.
20 Ada waavyele Yabali waali kikolue wa bantu baali baikala mu maema ni kuya bali bateeki ba nama.
21 Mwalawakue waali wakuutua Yubali. Ozo mwalawakue i kikolue wa balia baali balizia bilimba ni mimpyeta.
22 Zila waavyele Tubali-Kaini. Ozo muntu i waali mutili wa bibombelo bya misango ilekenkeene, bya mukuba ni bya kyela. Nkaziize kwa Tubali-Kaini waali wakuutua Naama.
23 Lameki waabaanine bakazi bakue babili,
“Ada ni Zila, ntwilizie
mwe bakazi bakua Lameki unvue twebo twane.
Nene nakiipaya muntu wakinkisia,
mulumendo pantu wakinghuma.
24 Kaini kine waakalandwilua nghendo kilooba,
Lameki waakalandwilua nghendo 77.”
Seti ni Enoshi
25 Kabili Adamu waaleele ni mukazi wakue, Eva lu-aimitile waavyele unge mwana mwalalume ni kumwinika Seti. Waalandile evi, “Leza wan'mpeela unge mwana mwalalume wa kupyanikizia pali Abeli waipailue na Kaini.”
26 Seti ni ye waavyele mwana mwalalume ni kumwinika Enoshi. Ozo musita bantu i ubaatendekeelepo kumupupa Yawe ni kubombia Liina lyakue.