46
Yakobo ni lupua lwakue baya ku Misri
1 Izraeli waile pamo ni byonse bi-aali nabio waya kufika ku Beri-Seba, wamwelela Leza wakua se Izaaki ngelelo.
2 Leza waamwanine Izraeli mu kimonua kya busiku. Waamukuutile, “Yakobo, Yakobo.”
Wa-asukile nangue, “Ne ono pano.”
3 Waamwanine, “Nene ndi Leza, Leza wakua so. Tekutiina kukookela ku Misri pantu i kunaakakukita kuba mutundu ukata.
4 Ndikukooka pamo nobe ku Misri, kabili naakakusezia paakale. Yusufu i waakakuziika.”
5 Yakobo waafumine ku Beri-Seba. Baizraeli baamutweme sibo Yakobo, ni baana babo pamo ni bakazi babo mu matyakala aatuminue na Farao kuti bamutwamemo.
6 Kupwako, batwama nama yabo pamo ni bunonsi bwabo bubaanonkele mu kyalo kya Kanaani. Yakobo waya ku Misri pamo ni luvyalo lwakue lonse.
7 Baana bakue balalume, ni baana bakue banakazi, ni benzikulu bakue balalume ni banakazi, waile nabo ku Misri.
8 Yakobo ni baana bakue baile ku Misri. Meena a baana bena Yakobo, aliwakutua Izraeli, ni aza: Rubeni i libeli.
9 Ni bena Rubeni ni baba: Hanoki, ni Palu, ni Hesroni pamo ni Karmi.
10 Ni meena a baana balalume bakua Simeoni ni aza: Yemueli, ni Yaminu, ni Ohadu, ni Yakini, ni Zohari pamo ni Sauli mwina mwanakazi wa ku Kanaani.
11 Ni meena a baana balalume bakua Lawi ni aza: Gershoni, ni Kohati pamo ni Merari.
12 Ni meena a baana balalume bakua Yuda ni aza: Eri, ni Onanu, ni Sela, ni Peresi, ni Zera. Inzi Eri ni Onanu baafwiliile mu kyalo kya Kanaani. Ni meena a baana balalume bakua Perezi ni aza: Hesroni ni Hamuli.
13 Ni meena a baana balalume bakua Isakari ni aza: Tola, ni Pua, ni Iobu pamo ni Simuroni.
14 Ni meena a baana balalume bakua Zabuloni ni aza: Seredi, ni Eloni pamo ni Yaleli.
15 Babo i bena Lea ba-aamuvyaliile Yakobo ku Padani-Aramu pamo ni Dina mwana mwanakazi. Baana bakue bonse, balalume ni banakazi, baali 33.
16 Ni meena a baana balalume bakua Gadi ni aza: Sifioni, ni Hagi, ni Suni, ni Eziboni, ni Eri, ni Arodi pamo ni Areli.
17 Ni meena a baana balalume bakua Aseri ni aza: Imuna, ni Isiwa, ni Isiwi, ni Beria pamo ni nkazi yabo Sera. Ni meena a baana balalume bakua Beria ni aza: Heberi ni Malkieli.
18 Baba i baana bena Silipa waufiiziwe Yakobo. Lea waapeelue ozu Silipa na Labani kuti aye wali mubombi wakue. Bonse pamo baali lyanondo ni mutanda.
19 Ni meena a baana balalume bakua Rakeli muka Yakobo ni aza: Yusufu ni Benyamina.
20 Yusufu waavyele baana babili balalume muli Asenati mwina Potifera kitambua wa mu muzi wa Oni, ni bo meena abo ni aza: Manase ni Efraimu.
21 Ni meena a baana balalume bakua Benyamina ni aza: Bela, ni Bekeri, ni Asibeli, ni Gera, ni Naamani, ni Ehi, ni Rosi, ni Mupimu, ni Hupimu pamo ni Ardi.
22 Baba i baana lyanondo ni bana bakua Yakobo ba-aavyele muli Rakeli.
23 Dani waavyele mwana mwalalume Husimu.
24 Ni meena a baana balalume bakua Nafutali ni aza: Yazeli, ni Guni, ni Yezeri pamo ni Silemu.
25 Baba i baana kilooba bakua Yakobo ba-aavyele muli Biliha. Rakeli waapeelue Biliha na Labani kuti aye wali mubombi wakue.
26 Bantu baile na Yakobo mu Misri, bantu ba mu luvyalo lwakue pasili kupendako bamuka baana bakue, baali bantu 66.
27 Yusufu lu-aali ku Misri waavyele baana babili balalume. Bantu bonse ba mu luvyalo lwakua Yakobo baile ku Misri baali bantu 70.
Yakobo ni lupua lwakue mu Misri
28 Yakobo waamutumine Yuda kuti abatangilile kuya kumwana Yusufu bakabe kuya kusaakaana nakue mu Goseni. Lubaafikile ku Goseni,
29 Yusufu waingiile mu tyakala yakue aye asaakaane ni se Izraeli ku Goseni. Lubaamoneene, Yusufu waile kumukumbatila mu mukosi. Waalilile musita ukata.
30 Izraeli waamwanine Yusufu nangue, “Evi vinakumona wakosele mpaka lenu, kansi kuti nafua.”
31 Kabili Yusufu waabaanine bakuluube pamo ni lupua lonse lwakua se nangue, “Evi ndikusela ngie n'mubwile Farao nangue, ‘Bakuluamwine pamo ni lupua lwakua tawe bakifuma ku Kanaani, baiza.
32 Baba bantu ni basungi ba nama, kabili bezile ni bisepe byabo bya nghombe ni bya mikooko pamo ni bintu byabo byonse.’
33 Kine Farao akabe kumikuuta ni kumiipuzia nangue, ‘Mulimwabomba mwiloki?’
34 Mukabe kumwana nangue, ‘Fwefue tuli basungi ba nama kutula ku bwanike bwetu nga mwaali mwakitila babikolue betu.’ Ni pakako, wakaba kumyana mukabe kwikala ku Goseni, pantu kubalua musungi wa mikooko, Bamisri bamumwene kuba wa mpuni.”