1 ✡Bantu lubaatendekele kusanduluka pa kyalo, baali bavyala ni baana banakazi. 2 Baana bena Leza lubaamwene nangue bakazyana bena bantu baali baweme, baisaakwiliilepo bamo kuba bali bakazi babo. 3 Yawe waalandile evi, “Mweo wane teukikanzyania na muntu muyayaya pantu wene ni wa kufua. Kutula lelo, myaka yakue teikikaba yakila pa myaka 120.” 4 ✡Mu ezio nsiku Banefili baali bali pa kyalo. Pa kyamba baana bena Leza lubaile kuupa baana banakazi bena bantu, baavyelemo baana balalume. Babo i baali bali babipami ba bantu baali bamanikile pa ozo musita.

5 ✡Yawe lu-aamwene nangue bubi bwa muntu bwakila pa kyalo, ni kumona nangue malanga a mu mutima wakue lyonse aali akila kubiipa, 6 Yawe waunvwile bulanda pantu waalengele muntu pa kyalo, ni mutima wakue waamukisile. 7 Yawe waalandile evi, “Nakaba kulovia muntu unaalengele pa kyalo, bonse muntu ni nama, ni bilibyayibula pamo ni tooni twa mu lweleele. Naunvua bulanda pantu naabilengele.” 8 Inzi Noa waali watonenue na Yawe.

9 ✡Leli i lyasi lyakua Noa ni luvyalo lwakue. Noa waali wali mulunghami ni wa kisinka mu bantu ba pa musita wakue, kabili waali waenda ni Leza. 10 Noa waavyele baana balalume batatu, Shenu, Hamu, ni Yafeti. 11 Leza waamwene nangue kyalo kyainooneka, ni kukitilana bibiipile kwakila kukumana mwaya kyalo. 12 Leza waakentele ni kumona nangue kyalo kyabiipa pantu bantu bonse baali baikeele mu bwikazi bubi.

13 Leza waamwanine Noa nangue, “Mpeleezio ya bantu bonse yakumana pantu bubi bwabo bwaizula mu kyalo kyonse. Kabili nakaba kubaloviizia pamo ni kyalo. 14 We Noa, nakwana ukite safina ikata ya mbao ilumine, ni kuputulamo miputule, ukabe kusubako kabulimbu mukati ni panze. 15 Ukabe kukita safina ileepele metre 133, ni mu bukata metre 22, ni mu kutuuluka metre lyanondo ni itatu. 16 Ukabe kukitako mutenge ni kusiako mando ali ni santimetre 44. Ukabe kukitamo mpungu itatu yateekaleene yali ni mulyango mumbali, 17 pantu nakaba kubunzia kyalo ni kwinoona bilengua byonse bikose. Bilengua byonse bili pa kyalo byakaba kufua. 18 Inzi nakaba kupinghana nobe. Wewe ukengile mu safina ni mukazi obe, ni baana bobe balalume pamo ni bakazi babo. 19 Kabili pa bilengua byonse bikose ukabe kubuulapo bibili bibili ni kubingizia mu safina, ukabisunge byakosele kilume ni kikota. 20 Ukabe kubuula misango yonse ya nama, ni misango yonse ya tooni, ni ya byonse bilibyayibula. Bebi byonse, byaakeeza kuli wewe bibili bibili kuti ukabisunge byakosele. 21 Ukabe kubuula misango yonse ya bilio ukabe kubisunga, evi wewe ni nama pamo ni tooni mukabe mwabilia.” 22 ✡Noa waakitile bintu byonse nga mwa-aniinue na Leza.