5
1 “Mwe babitambua unvue!
Poozeko maano mwe Baizraeli!
Mwe nghanda ya bukolo twilizie!
Bobu bupinguzi ni pa mulandu wenu:
Mwemue mwaali muteo ku Misipa,
bukila buteelue pa lupili lwa Tabori.
2 Babisanguka bakila kwipaana.
Nene nakaba kubakanda bonse.
3 N'manine byonse palwakua Efraimu,
Izraeli tanfyeme.
We Efraimu, watendeka kukita bukambue,
Izraeli waitiikania.
Hosea wabasoka palua kupupa mikisi
4 “Bikitua byabo tebibetabiizie,
kubwela kuli Leza wabo.
Mupasi wa bukambue uli mu mitima yabo,
tebamumanine Yawe.
5 Izraeli wasininkiziiwa na kiitoni kyakue.
Baizraeli ni Efraimu baipuutala mu bibalo byabo.
Yuda ni ye waipuutala pamo nabo.
6 Lubalibaya ni mikooko yabo pamo ni nghombe,
kuya kumukeba Yawe,
tebezi kumusanga,
pantu abafunghamiine.
7 Tebakili ba kisinka kuli Yawe.
Bakivyala baana mu bukambue.
Nsikunkulu yabo ya kubaluka kwa kwezi yaakabalovia,
pamo ni makaba abo.
8 “Lizie ntandala mu Gibea,
lisengo mu Rama.
Samune lizui lya bului mu Bet-Aveni,
mu kyamba kyobe we mukowa wakua Benyamina.
9 Efraimu waakasiiwa kibolia
mu nsiku ya kukandua.
Bindimukulanda pa mikowa ya Baizraeli
ni bya kisinka.
10 Banombozi ba Bayuda bali nga bantu
balibatelulula mabue a mu mipaka pasili nsambu.
Naakapongola kikonko kyane pali bene
nga kibunda kya menda.
11 Efraimu waemiiwa,
wabiibikiziiwa mu bupinguzi,
pakafi ka kutona kupupa mikisi.
12 Nene ndi nga nondo kuli Efraimu,
ndi nga kintu kibolele ku Bayuda.
13 “Efraimu lu-aamwene bulwele bwakue,
ni Yuda bilonda byakue,
Efraimu i lu-aile ku Asuria,
ni kutuma mikenzi ya kuya kulomba bukwasi kuli likolo mukulu.
Inzi tali na buvinde bwa kumikosia,
ao kukosia bilonda byenu.
14 Ni pakako, naakaba nga nkalamu kuli Efraimu,
nga nkalamu asasile kuli Yuda.
Naakabazanghununa tuniini tuniini ni kuya,
naakabatwala kule kusikaba wa kubapususia.
15 Pa kyamba, naakabwelela pa kifuka kyane
mpaka musita ubaakeetabila bubi bwabo
ni kukeba lukebu lwane.
Mu maavia abo
baakankeba na mute.”