8
Kubyala mwela ni kuzombola mulula
1 “Biika ntandala ku kanua kobe!
Kipungu kili peulu nghanda yakua Yawe
pantu bantu bakityona kipingo kyane
ni kusangukila mizilo yane.
2 Izraeli wandilila,
‘We Leza wetu, tukumanine!’
3 Inzi Izraeli wakikaana kiweme.
Mulwani wakaba kumukumbizia.
4 Balibabiika makolo pasili kutona kwane,
balibasaakula babiloolo tekuba nabapeele nsambu.
Balibaikitila mikisi ya mutofue ni ya oro
mu kwileetelela lwinoono.
5 Mwe Basamaria, pooze mukisi wenu wa nghombe ndume!
Nene n'mbafiitiilue,
baakaba batiikeenetiikeene sie mpaka musitaki?
6 Ozu mukisi wa nghombe musoka ufumine ku Izraeli!
Ukitilue na muntu amanine ozo mwilo. Ozo mukisi te Leza.
Mukisi wa Basamaria
wakaba kutyonua tuputu tuputu.
7 “Balibabyala mwela
ni kuzombola mulula.
Musense usili na musokoti,
teuvinda kufumia bunga.
Ufumiengeko mbezu,
baeni nga baitelekele.
8 Izraeli atelekelue,
evi ali pa bukata bwa ntundu
nga kintu kya mpuni.
9 Pantu bakisela ku Asuria,
nga punda wa mu kisonso aliwaendooka bunke.
Efraimu waki-isisia ye mwine ku batonua.
10 Anzia kine bai-isisiizie bo bene pa ntundu,
nakaba kubakolonghania pamo.
Bakaba kubamba konda na kubiibikiziiwa na likolo wa maka.
11 “Anzia kine Efraimu waakuulile bitale bingi bya ngelelo ya bibalo,
bya-alukile bitale bya kukitilapo bibalo.
12 Naabalembeele bintu bingi palua mizilo,
inzi baabimwene nga kintu kyeni.
13 Anzia kine balimukungelela ngelelo kuba bupe,
kabili anzia kine balimukulia nama,
Yawe tabawamiinue.
Evi wene wakaba kulanguluka bubi bwabo
ni kubakanda pa bibalo byabo.
Bakaba kubwelela ku Misri.
14 Izraeli wakimulaba Kabumba wakue,
ni kukuula nghanda ingi ya bukolo.
Mu mizi ingi Yuda wakikuulamo byubo.
Inzi nakaba kutuma mulilo mu mizi yabo,
mulilo wakaba kufita byubo byabo.”