16
1 Mapange a mu mutima, ni obe we mwine,
inzi keebo ka mpeleezio kali na Yawe.
2 Nzila ya muntu, imuwamiine ye mwine,
inzi Yawe aliwatoosia mutima.
3 Mubiikile Yawe miilo yobe,
ni mapange obe alikufikiliziiwa.
4 Yawe ali ni ki-aakitiile kubalua kantu,
nga evelia babi ni bo pa musita wa lwinoono.
5 Yawe asuulile kubalua muntu ali ni mutima wa kiitoni,
kisinka mubi takabula kukandua.
6 Kupitila mu ntono ni bukisinka, bubi bulibwaeleelua.
Ni mu kutiina Yawe, bantu balibaikeka ku bubi.
7 Nzila ya muntu luiliyamuwamina Yawe,
Yawe aliwamupwanika na balwani bakue.
8 Kyawama kuba ni bunonsi buniini wali ni bulunghami,
kukila kuba ni bunonsi bwingi wali ni bubi.
9 Mutima wa muntu, uliwalangakana muutoneene,
inzi Yawe i aliwalombola ntanfu yakue.
10 Milomo yakua likolo iliyalanda bulanzi bwa kileza,
ni kanua kakue tekezi kuluvia mu bupinguzi.
11 Kalingo ni bilemo bya nsambu ni byakua Yawe,
mabue ali mu mufuko a kulingilako, ni miilo yakue.
12 Kukita bubi, kilubo ku makolo,
pantu kitebe kya bukolo kilikyateekua mu bulunghami.
13 Milomo ya bulunghami, nsansa ya makolo,
ni balia bamutonene, balibalanda bilungi.
14 Kipuki kyakua likolo, mukenzi wa lufu,
inzi muntu wa mulangue aliwakifuukia.
15 Mu kubenghema kwa lukebu lwakua likolo muli bukose,
ni buwame bwakue buli nga malezi a nvula ya mpeleezio.
16 Kyawama kuba ni mulangue kukila oro.
Ee, kipalile kusaakula maano kukila mutofue.
17 Nzila ikata ya mulunghami, ni kwikeka ku bubi.
Olia akonkele nzila yakue, asungile mutima wakue.
18 Kiitoni kilikyatangilila lwinoono,
ni mutima wa kwitantamuna uliwatangilila kupona.
19 Kyawama kuya wafuukile wali mupabi,
kukila kupaana bunonsi wali ni kiitoni.
20 Olia aliwasunga mafunde, aliwalunduluka,
ni aswapiile Yawe, ali ni lisyuko.
21 Olia ali ni mutima wa mulangue, aliwakuutua wa maano,
ni kuwama kwa bulanzi, kulikwalunduluzia kumana.
22 Olia ali ni mulangue, ali ni kasulo ka bukose,
inzi babipuba balibakandua mu bupuba bwabo.
23 Mutima wa muntu wa mulangue, uliwasambilizia kanua kakue,
kabili uliwalunduluzia maano a lulimi lwakue.
24 Twebo tuweme tuli nga kapelo,
ni to tulitwawamia mutima ni kukosia bikuza.
25 Kuli nzila imwenekele yaweme ku menso a muntu,
inzi ku mpeleezio iliyatwala ku lufu.
26 Nzala ya mubombi iliyamulengia kubomba,
pantu nkulu ya kanua kakue iliyamuleetela mute wa kubomba.
27 Muntu asili na kibwezia aliwaimba kiina kya bubi,
ni mumbali milomo yakue muli nga muli mulilo uliwazizyania.
28 Muntu mubi, aliwaleeta mazibo,
ni olia wa busongezi, aliwapusania babibuza.
29 Muntu aliwakyuzyania aliwabembia mwinakue,
ni kumulombola mu nzila isiweme.
30 Olia aliwakapia na linso, aliwakambila kukita bibiipile,
ni olia aliwasumba milomo yakue, aliwalanda bibiipile.
31 Ndale, i ngala ya bulumba,
iliyasangua sie mu nzila ya bulunghami.
32 Olia asiliwalenga kufiitua, aweme kukila wa buvinde,
ni olia aliwateeka mutima wakue, aweme kukila olia aliwasakukila muzi.
33 Bubale bulibwateelua pa kibeta,
inzi bupinguzi bonse bulibwafuma kuli Yawe.