19
1 Kyawama mupabi aliwaenda mu bulunghami bwakue,
kukila kipuba ali ni kiitoni mu bulanzi.
2 Muntu tapalile kubulua maano,
ni olia aliwaya lubilo lubilo aliwaipuutala.
3 Muntu aliwailovia mu bupuba bwakue,
inzi mutima wakue uliwamufiitilua Yawe.
4 Bunonsi bulibwavuzia bibuza,
inzi mupabi aliwakaanua na bapabi nakue.
5 Musininkizi wa bufi, takabula kukandua,
ni olia aliwalanda bufi takapusuka.
6 Bengi balibapaapaata ku bakindami,
inzi kubalua muntu, kibuza wa muntu aliwapaana.
7 Lupua lonse lwa mupabi lulilwamusuula,
paliibufi babibuza bakue, i balibakila sie kuya kule ni kumusia!
Mupabi anzia kine wabelambilizia tebamunvua.
8 Olia ali ni mulangue, atonene bukose bwakue,
ni olia ali ni kyunvwila, aliwamona buwame.
9 Musininkizi wa bufi takabula kukandua,
ni olia aliwalanda bufi aliwazeeza.
10 Bwikazi buweme tebupalile ku kipuba,
paliibufi muzia kuteeka bakindami.
11 Wa mulangue tezi kulenga kufiitua.
Kweleela kilubo, i bulumba bwakue.
12 Kipuki kyakua likolo kili nga kubuluma kwa nkalamu,
inzi ntono yakue ili nga lume ku bikusi.
13 Mwana kipuba, kukeepelua kwakua se,
ni bikanza bya mukazi, bili nga matooni asiliapua.
14 Nghanda pamo ni bunonsi, bupyani bulibwafuma ku muvyazi,
inzi mukazi wa maano aliwafuma kuli Yawe.
15 Muleele uliwaleeta tulo twingi,
ni munanghani aliwaema na nzala.
16 Olia aliwakonka mafunde, aliwasunga bukose bwakue,
inzi olia asiliwakonka nzila yakue, waakafua.
17 Olia aliwakwasia mupabi, aliwamukopia Yawe,
ni Yawe aliwamulambula pa bikitua byakue biweme.
18 Kanda mwana obe maswapi lu-akiliko,
kine teumukwasiizie, wamukwasia kwinooneka.
19 Muntu wa kipuki kikata, apalile kukandua,
kine wewe wamukwasia, wakaba kumukwasia ni linge.
20 Twilizia nsokezi ni kupokelela mafunde,
evi ku mpeleezio ukabe ni mulangue.
21 Mu mutima wa muntu muli mapange engi,
inzi kitonene Yawe i kilikyafikiliziiwa.
22 Kikebekele ku muntu, kuya wali wa kisinka,
mupabi aweme kukila wa bufi.
23 Kutiina Yawe kulikwatwala ku bukose,
ni olia aliwamutiina, aliwaya waikeele waikusi,
ni bubi tebukamupalamina.
24 Munanghani aliwabiika kuboko kwakue mu nsaani,
ni kwandua kutwala pa kanua kakue.
25 Uma muntu wa kapuni pakuti babipuba basambilileko maano,
kabili sasilila olia amanine, pakuti abe ni bukengezi.
26 Mwana aliwaemia se ni kukumba nghina,
aliwaleetelana busoni ni mufuupula.
27 We mwana wane, kine walekela kutwilizia mafunde
ulikusangukila twebo twa mulangue.
28 Musininkizi asipalile, aliwafuupula bupinguzi,
ui tunua twa babi tulitwazakila bubi.
29 Kukandua kuteaniiziwe pa balia bali ni mufuupula,
ni bipumo mu musana wa babipuba.