29
1 Olia aliwasokuasokua sie ni ye wakosia mutima,
takakokola kutyoka, kabili takamona kwa kupusukila.
2 Kine balunghami bapaalua, bantu balibasansamuka.
Inzi mubi kine i wateeka, bantu balibalwala.
3 Olia atonene mulangue, aliwasansamusia se.
Inzi kibuza wa bakende, aliwazeezia bunonsi bwakue.
4 Likolo aliwateeka kyalo kupitila mu nsambu.
Inzi olia aliwapeelua bituulilo, aliwainoona kyalo.
5 Olia aliwaiwaminizia ku mwinakue,
aliwateyela mwinakue bukila.
6 Mu kilubo kya muntu mubi, muli muteo.
Inzi mulunghami aliwaimba ni kusangalala.
7 Mulunghami aliwakenta twebo twa mupabi.
Mubi tali na maano a kuti amane.
8 Bantu bali ni kapuni balibazizia muzi.
Inzi bantu bali ni mulangue balibapwisia kikonko.
9 Kine wa mulangue wakanzana na kipuba,
kipuba kine wafiitua, ao kine waseka, tepali mutende.
10 Balia balibazuumia mulopa, basuulile olia apwililikile,
Kabili balibakeba kwipaya balunghami.
11 Kipuba aliwalanda na kipuki kyakue kyonse.
Inzi wa mulangue, aliwaleeta mutende ku mpeleezio.
12 Kateeka kine watwilizia bya bufi,
babombi bakue bonse, baliba-aluka babi.
13 Kintu kimo kili na mupabi ni aliwabiibikizyania ni keki:
Yawe aliwabapeela bukose.
14 Kine likolo aliwapingula mupabi mu kisinka,
bukolo bwakue bwaya bwali bwa muyayaya.
15 Nfimbo pamo ni kusasililua, bilibyaleeta mulangue.
Inzi mwana aliwalekelelua pasili kukandua aliwamonia nghina busoni.
16 Babi lubalibateeka, bubi bulibwavula.
Inzi balunghami balibamona kupona kwabo.
17 Kanda mwanao ni ye alikukuleetela mutende.
Ee, alikusansamusia mutima obe.
18 Palia pasili kimonua, bantu balibaya kiyeyeye.
Inzi olia aliwakonka mizilo, ali ni nsansa.
19 Mubombi tezi kusokua sie na twebo,
pantu anzia amana tapoozako maano.
20 Kubako umumanine olia aliwalanda kilandelande?
Kyawama kuketekela kipuba kukila muntu wa ozu musango.
21 Olia aliwasunga mubombi wakue kutula ku bwanike bwakue,
pa mpeleezio waakamusangukila.
22 Muntu wa kipuki aliwalengia mazibo.
Ni muntu wa kipuki kikata aliwalengia bibalo bingi.
23 Kiitoni kya muntu kilikyamukoosia.
Inzi mufuuke aliwakindikua.
24 Olia aliwa-ampana na kabooko, asuulile mutima wakue mwine.
Aliwaunvua ntiipu yatiipua, inzi tekuba walanda kantu.
25 Kutiina bantu, muteo wa kukuleetela busanzo.
Inzi olia amuswapiile Yawe, ali ni mutende.
26 Bengi balibakeba kutonua na kateeka.
Inzi nsambu ya muntu iliyafuma kuli Yawe.
27 Muntu mubi, asuulile balunghami.
Ni mulunghami, asuulile babi.