3
Kibwezia kya bulunghami
1 We mwana wane, tekuba walaba masambilizio ane,
inzi sunga milao yane mu mutima obe.
2 Pantu yakaba kuvuzia myaka ya bwikazi bobe,
ni kukupeela mutende ni buyantanzi.
3 Ntono ni bukisinka tekuti bilekenkane nobe,
bikakilile mu mukosi obe,
bilembe pa kibao kya mu mutima obe.
4 Ni we ulikwitabilua ni kumonua waweme
ku menso akua Leza ni ku menso a bantu.
5 Muketekele Yawe na mutima obe onse,
pasili kusintilila pa maano obe we mwine.
6 Mu nzila yobe yonse, mumane wene,
ni ye alikuolola nzila yobe.
7 Tekwimona we mwine kuba wali ni mulangue,
mutiine Yawe ni kwikeka ku bubi.
8 Kukita evio kulikukuleetela bukose mu mubili,
ni maka mu bikuza byobe.
9 Mukindike Yawe na bunonsi bobe,
mukindike na ntomono ya mu buzombozi bobe bonse.
10 Ni pakako, milue yobe yaakeezula,
ni mitondo yobe yaakeezulamo divai ya lenu.
11 We mwana wane, tekuleebula nsokezi yakua Yawe,
kabili tekutoobolua lu-aliwakusasilila.
12 Pantu muntu atonenue na Yawe aliwasokua,
nga evelia mwana atonenue na se.
13 Lisyuko ku mwalalume aliwasanga mulangue,
ni aliwainika.
14 Pantu mulangue akilile bunonsi bwa mutofue,
ni kibwezia kyakue kitanine kukila kibwezia kya oro.
15 Mulangue ni wa mponvu kukila mabue a mutengo,
ni byonse biuliwakeba tebivinda kulinghaniwako.
16 Nsiku ingi ili mu kuboko kwakue kwa kulio,
ni mu kuboko kwakue kwa kuso i muli bunonsi ni mukinzi.
17 Nzila yakue, i nzila ifwaniine,
ni tusansaila twakue tulungi ku mutende.
18 Mulangue i kimuti kya bukose ku balia bamukwatiisie,
kabili i lisyuko ku onse atwaliliile kuba nakue.
19 Kupitila mu mulangue, Yawe waabiikile biputa bya kyalo,
ni mu kumana waimikile myulu.
20 Mu kumana kwakue, biponga byaakasanikile,
ni kulengia malezi kutoonia lume.
21 We mwana wane, tekulekeela mulangue ni maano kufuma pa ntanzi yobe,
kwatisia maano aweme pamo ni bukengezi.
22 Ni byo i bilikuya byali bukose bwa mutima obe,
ni bifwanizio bya mu mukosi obe.
23 Ni pakako, ulikuya wali ni mutende mu nzila yobe,
ni kuulu kobe tekuya kwaipuutala.
24 Musita uwalaala, teuya wali na mwezo.
Ulikuona tulo twaweme.
25 Tekuya wali na mwezo wa lwinoono lwa kukutulumukila,
anzia kine kusanzua kwa babi kwaiza,
26 Pantu Yawe waya wali maswapi obe,
ni ye waya wasungile kuulu kobe tekuti kukwatue mu muteo.
27 Tekukaana kupeela kiweme ku bantu bapalile,
lu-ukili ni maka a kukita evio.
28 Tekumwana mwinobe nangue,
“Endo, ukeeze lukeele mane nkakupeele”
Koku kintu kya kumupeela wakwete.
29 Tekukitila mwinobe mapange abi,
olia ekeele waakuketekeele.
30 Tekusongela muntu pasili mulandu,
kine takitile kantu ka kukukisia.
31 Tekumwena bunkua muntu aliwakyuzyania,
ni pa nzila yakue tekusaakulapo ata imo.
32 Pantu Yawe asuulile muntu aliwakita bibiipile,
inzi wene ni kibuza wa balia balibakita biweme.
33 Ntiipu yakua Yawe ili mu nghanda mwa mubi,
inzi Yawe aliwapaala nghanda ya mulunghami.
34 Aliwafuupula balia bali ni mufuupula,
inzi aliwapeela buwame ku bekeefiizie.
35 Bali ni mulangue balibapyana bulumba,
inzi babipuba balibamoniiwa busoni.