2
Rutu wabomba mu bukaba bwakua Boazi.
1 Boazi waali muntu munonsi kabili mukindami. Ozo Boazi, waali wa mu lupua lwakua Elimeleki muka Naomi.
2 Rutu wa ku kyalo kya Moabu waamwanine Naomi nangue, “N'mpeele nsambu ya kuya ku bukaba ku kusolola nghano. Nketekeele nangue naya nsangeko muntu umo waya angitabizie kubomba nakue.”
Naomi waamwanine evi, “We mwana wane, endo.”
3 Kupwako, waya ku bukaba. Lu-aafikile, waatendekele kusolola molia mwaali mwapita mwaseepa babombi. Ni mu lisyuko lyakue, waingiile mu bukaba bwakua Boazi wa mu lupua lwakua Elimeleki.
4 Pa kyamba, Boazi waizile kufuma ku Betlehemu ni kuya kupozia babombi walanda nangue, “Yawe abe nenu.” Ni bene baamwitabiile balanda nangue, “Yawe akupaale.”
5 Boazi waamwipuziizie mubombi mukulu wabo nangue, “Ale olia mukazyana ni wa kupi?”
6 Mukulu wa babombi waamwasukile evi, “Olia mukazyana ni wa ku Moabu, wakiiza watwemue na Naomi kufuma mu kyalo kya Moabu.
7 Wakilanda evi, ‘Nalombako nsambu ya kuya napita nasolola molia mulimwapita mwaseepa babombi.’ Ni pakako, wabombanga kutula lukeelekeele mpaka ono musita, inzi ku katanda wayanga sie kutuuziako musita uniini.”
8 Boazi waamwanine Rutu, “We mwana wane, unvua nkusoke, tekuba waya kusolola mu ange makaba, inga sie mu bobu bukaba. Bomba sie na baba benka babombi bane bakazyana bali pano.
9 Pooza sie maano mu bobu bwenka bukaba bubalimukuseepamo, wali sie pano penka pamo nabo, kabili tekulekeela balumendo bakusaapile, inzi kine waunvua kyaka, upalile kumina sie mu katondo ka menda atapilue na balumendo.”
10 Kupwako, Rutu wafukama, wafwinamina pansi wamwana nangue, “Ale ne mweni nasyuka syani pakuti un'mpoozeko maano?”
11 Boazi waamwasukile evi, “Bakin'mbwila byonse biwaakitiile nokovyala lwaafwile mulume obe, ni viwaasiile noko ni so, ni kyalo kiwaavyaliiluemo, mpaka watona kwiza ku bantu bausyaali wamanine kutula ku kale.
12 Yawe akulambwilepo pa byonse biwakikita. Yawe wa Baizraeli uwakibutukilako mu kyeni kyakue akupaale.”
13 Rutu waalandile evi, “We mukulu, kisinka wankitila biweme. Wewe wanengia kwiunvua bwino mu kulanda kobe wafuukile anzia kine nsilingheene na mubombi umo wa pa babombi bobe banakazi.”
14 Kabili pa musita wa kulia, Boazi waamwanine Rutu nangue, “Iza ulie mukate utulitwaliako ni kutobela mu divai iseeme.” Kupwako, waikala pamo ni babombi, Boazi wamupeelako ni nghano ikangile, walia, waikuta ni kusiapo binge bilio.
15 Kabili lu-aabuukile kuti aye ku kusolola nghano, Boazi wa-anine babombi bakue nangue, “Anzia asomona ni ili mu bisi, tekumusasilile.
16 Mu elia milui imulimwatuulika, muye mwamusiilamo iniini ya kuti aye watoola, tekumukaanie.”
17 Ni pakako, Rutu waasolwele nghano mu bukaba mpaka kyungulo. Lu-aapuulile, wauluziizie mupepi kilo 22 ya nghano.
18 Waitwikile ni kubwelela ku muzi, waya kumulangisia nghinavyala nghano i-aasolwele. Kupwako, wamupeela bilio bi-aasiilepo lolia lu-aikutile.
19 Nghinavyala waamwipuziizie evi, “Lelo wayanga kusolwela pi? Wasololanga mu bukaba bwakua ni? Ozo muntu wakupoozangako maano apaalue!”
Rutu waamwanine Naomi nangue, “Nasololanga mu bukaba bwakua Boazi.”
20 Ni Naomi waamwanine muka mwana wakue nangue, “Yawe olia atwaliliile kufikilizia bulayo bwakue ku bakosele ni bafwile, apaale ozo muntu wa mu lupua lwetu lwa pepi, pantu wene i wa mu bakalubula betu.”
21 Rutu wa ku Moabu waalandile evi, “Boazi wanghananga evi, ‘Ba wali pamo ni babombi bane mpaka pabakaba kupua kuseepa nghano yane yonse.’ ”
22 Kupwako, Naomi wamwana Rutu muka mwana wakue nangue, “We mwana wane, kyawama uye wabomba pamo ni babombi bakazyana bakua Boazi, kabili tekuti ukasangue na bange bantu mu bukaba nghwana ukeeza kukitikilua na kibiipile.”
23 Ni kiine, Rutu waabombele pamo nabo ni kuya wasololamo mpaka ku mpeleezio ya kuseepa shairi ni nghano. Kabili waatwaliliile kwikala ni nghinavyala.