13
Jesus tempel daoŋ dupani wak niŋen o ibol a
Mat 24:1-2; Luk 21:5-6
1 Saen Jesus tempel ibisei wo dugo megeloum ta igo ibol, “Girek maŋau, ule, tempel san pat tintinan nuŋon a, iŋsan naon man siŋaokan geig a!”
2 Ak man iŋ ru naon igo irupidai, “Aŋ ab tintinan en eil ak i? Ŋai ru rumok ŋurupaiaŋ da, ente man pat ta kisaek sen ta tinin fufo ta yen na wa. Tia, fidian mi tamol adi dugufututep diabibol tan na dudu wa.”
Nal wadan ilasa san kob funfun
Mat 10:17-22; 24:3-14; Luk 21:7-19
3 Jesus Did Oliv fo imasig imado se ya. Did a ate imado yan did tempel fufo itur dan san turan, titiŋaem tan ikilokan ak yen da. Agog Pita, Jems, Jon di Andru da ago mianuk lo san na dupalug dusumianig igo dubol.
4 “Oŋ rupaiama, saen dugomaiak lo melmel en dilasa wak i? Kob dugomaiak imug mi ilasa dop ate maŋ maloŋ ak, melmel en fidian dilasa wak i?”
5 Agog Jesus awa biek ru igo irupidai a. “Aŋ kagin agane wa, kabelan tamol ta aŋ irawaŋ banau.
6 Tamol wei mi dupalup ŋai yaŋag dupatep dubol a, ‘Ŋai nek emaiak Kristus.’ Ago dop tamolpein wei kasik dirawai a.
7 Aŋ yu ager aloŋ ak, agod san ru tim dam aloŋ a. Ago dop kagin agane wa, kabelan amasa saian banau, man dugo, mel en man ka ilasa wak, gug nal wadan san saen man gamugo da.
8 Tamol malan ta lo yu diabisap, tamol malan ta lo yu ager digane wa. Ago dop kiŋ ta iŋsan tamolpein dida yu diabisap, kiŋ sen ta iŋanen tamolpein dida nug dufuni wa. Agod aben sensen lo man kadag tubun mi idu dop kanaurig tubun ak gidigidad dilasa wa. Nek ibol pein nanuk igansi wo dop madai ile dak igo woŋ, melmel en fidian man, madai a nal wadan ilasa san amaiak ilasa wo fun igane da.”
9 “Aŋ gidad tawaŋ aganep amado wa. Iŋ aŋ dibiaŋ pe aŋsiganem panu lo ager adi banid lo didiraŋ pe kot lo atur a. Juda adi sad ubou ab gidigidad dien dan lo aŋ tinimi dugufutute wa. Aŋ ŋai naog aŋanep kiŋ adi agod gabman gurman adi naod na atur a, an ŋai niŋeg o abol dop duloŋ a.
10 Agod ŋaineg bilaluŋ uyanan en imug tamolpein warou adi tan tilianek fidian lo dubol ilasa dop duloŋ a.
11 Saen iŋ aŋ dibiaŋ pe kot lo dida au dop, ru dugomaiak abol ak niŋen o ilom ta weiwei na wa. Tia, nek ru dugo Anut saen an lo ipano an mi arupidai a, man dugo, aŋsem ta abol na da, tia, Awan Urgun iŋ awam lo ibol ilasa da.
12 “Tein ta iŋ tein san ager adi banid lo iganep dufuni imat a. Taman ta dam nanun muroun sad ager banid lo idiraip daoŋ dupidinai a. Nanuk dumasap tinad tamad lo siai diganep ager banid lo didiraip dufu dumat a.
13 Tan en san tamolpein fidian aŋ lo siai digane wa, en ata wo, ŋai yaŋag man aŋsam na yen la ya. Ak man, talpein iŋanen ilo rumok yabi sakar yaup, saen iŋanen kumaen tan en lo itout ak ate dop, Anut talpein an patun ipasi wa.
Murnap mel ta saian geig ak ilasa wa
Mat 24:15-28; Luk 21:20-24
14 “Saen ilasa dop, mel ta tempel san aben gun ak lo dugunip, mel an ate itur san tia yak ate itur dop ale wa. Mel an gubak mi profet Daniel niŋen o ibol a. Mel an Anut malan lo man iganan geig a, nek mel amaiak igane dop daoŋ panek ilasa wa. (Oŋ ru e suti den uloŋ uyan o ta pasauman na yak man, maeg gane tap ka uloŋ ak boi.) Nal an lo dop, tamolpein a Judea na dumado dan, dusol diaup did luluŋad lo sed imianai a.
15 Talpein ab fufo na imado dan, imul idup ab lo iŋanen biouŋ isini wo ta iladu na wa, tia, itaot mi isol yau a.
16 Agod talpein abi lo imado dak dam, gidad imug mi yamel madid san ak iŋane wo ta imul yau na wa.
17 O kabel, nal en san pein adi aŋ luam am da, agod aŋ pein aŋsam nanuk su apidinai dan dam, ŋai ilog tubun mi imuŋanaŋ da! Nal en man saian geig a.
18 Aŋ gidad agudani dop, mel en madid san saen lo ta ilasa na wa.
19 Man ata wo? Saen an lo dop muruan tubun geig ak ilasa wa. Muruan naok ago yak gubak mi ta ilasa na ya, saen tan en ilasag ipalug gamu en lo, mel igo yak ilasa man tia geig a, agod murnap fon ta ilasa da na wa.
20 Anut saen en itutep katukan a, iŋ ago ta igane na tap man, tamolpein fidian mi dideg diau a. Ak man, saen an lo dop Anut tamolpein a ipilianai la yan niŋedi wo ilon isou wa. Amaiak niŋen o iŋ saen an itutep katukan a.
21 Nal en lo talpein ta aŋ irupaiaŋ pe ibol, ‘Ale, Kristus ente imado da!’ tia, ‘Iŋ onte imado da!’ ago ibol dop, aŋ ilom ta rumok na wa.
22 Man dugo, kristus sewak ak iŋ profet sewak adi dida dilasa wa, ago dop iŋ kulob girager ak, agod mel naon senamo geig ak tamolpein malad lo dukubiaip dile wa. An lo dop idaisuda tap, iŋ tamolpein a Anut ipilianai la yan dirawaip lo diau dudu wo ago maeg digane wa.
23 Amaiak niŋen o aŋ tawaŋ aganep amado wa. Mel en gamugo ilasa dugo ŋai imug mi mel emaiak niŋen o kuai tem ŋurupaiaŋ la ya.”
Murnap Tamol Nanun tan na imul ipalu wa
Mat 24:29-31; Luk 21:25-28
24 “Saen en san muruan tubun ak itout la gup,
‘ad ta ided uyan na wa, an lo dop adian tidom oŋ ilasa dop
kalam ta ided na wa.
25 Ante dop patui keit dibiseip dudu wa,
agod Anut iŋ mel dababai keit lo yak imiriranai a.’ ”
26 “Saen an lo dop, tamolpein iŋ Tamol Nanun keit san timtaen fufo na itur dop dabai agod girager tubun geig aman da yak lo ipalu dak dile wa.
27 Ago dop Tamol Nanun iŋanen eŋel adi idiraip dufufurak diau a. Ante dop iŋanen tamolpein kob ipidinai an dutumanai a. Iŋ tim sukurun iwoiwo an lo nap diŋal dupalu wa, ago mi yaup tan gigin itout ak ate wa.”
Ai gurab san ru faŋan
Mat 24:32-35; Luk 21:29-33
28 “Aŋ ai gurab lo ilo sou agane wa, iŋ maŋau ka ipanaŋ a. Saen iŋsan raen you aman da, agod roun foun ilasa dop, aŋ aloŋ ak madid itout go ad ilasa san saen sumeik ipani da.
29 Amaiak niŋen o, aŋ murnap melmel fidian e dilasa den, ale dop, aŋ aloŋ ak Tamol Nanun iŋ ipalug sumeik, dalawan ante itur da.
30 Ŋai rumok ŋurupaiaŋ da. Warou gamu en san tamolpein gamugo itout yau dop melmel en fidian dilasa wa.
31 Keit iŋ tan da iŋ murnap itout a, ak gug ŋaisag ru man ta itout na wa.”
Nal mok mel en ilasa wan id fidian niŋen o tiŋaoŋ a
Mat 24:36-44
32 “Ak gug talpein ta melmel an niŋedi wo nal dugo di auwa dugo dam dilasa san o ta iloŋ na ya. Kumaen panu san eŋel adi ta duloŋ na yak, agod Nanun sen dam ta iloŋ na ya. Bai iŋsen mi iloŋ a.
33 Amaiak niŋen o aŋ tawaŋ agane wa. Aŋ malam ipuk oŋ amado wa. Aŋ ta aloŋ na yak nal dugo lo aŋanem Tubun ak ipalu wa.
34 En man igo ya. Tamol ta iŋ tan asau ak ate yau o dugo iŋanen urat biabi urat pinein banid lo iganep, anen anen iŋsiganed urat ipidinai a. Ago dop dalawan titianek tamol irupei, ‘Oŋ ŋai ŋamul ŋupalu san niŋen o tawaŋ ganep mado wa.’
35 “Amaiak niŋen o aŋ tawaŋ aganep amado wa, man dugo, nal mok lo ab taman imul ipalu wak aŋ ta aloŋ na ya. Gurai lo boi, tidom tubun lo boi, kurek ibob san saen lo boi, tidom lom mi boi, aŋ aŋaoŋ da.
36 Iŋ ririan imul ipalu dop, aŋ kabelan ŋioŋ abip amado dop iliaŋ banau.
37 Ru e ŋai ŋurupaiaŋ den, ru kisaek mi tamolpein fidian ŋurupidai da: ‘Tawaŋ aganep amado!’ ”