32
Isareri Iotani Namari kuari avu urinaini vaura
1 Rubenira ankuvata Gaatira ankuvata airi purumakau vatoka tavovaro Jase vatainivata Gileaati vatainivata purumakauvano ho naaina ukauva vaura.
2 Vi ukauva mini vaumanta vika Mosika Eleasaaka unainivata vaiinti nahenti qiata vaiinti unainivata orunte vikara tiha,
3 Nora vatuka Atarotive, Dibonive, Jaseve, Nimrave, Hesabonive, Elealeve, Sipimaave, Nebove, Beonive,
4 vi vatukava vi vatukava mini vai vatara Noravano tinavu Isareri kahaqimanta varaunarave. Mini purumakau ne ukauva ho vaimanta tinavu purumakau airitahaama variavo.
5 Ho nenavu tinavuara quahaivera, vi vatara tinavu timiqe tenavu vi vatara vare viraqaa variare. Ne tinavu tivita vare Iotani Namari hini mantaraini vuru kaiqe mini variainarara kia tinavu hantuqavano vaivo. Tinavu kia mini vuataa ivo, ti.
6 Vika minti tuvaro Mosiva Rubenira ankuaravata Gaatira ankuaravata tiharo, Hauri ne nenta kena Isareri kia kahaqiraiti, maini qaqi vaimanta vika vutu mantaraini oru vaiha iqoka raqivorave.
7 Ne maini vaimanta hauri ni kena Isareri vika tinavu kempuka kia ho vaivo tivakeha mainiqai vaireka autiha, Iotani Namari vutu mantaraini Kotiva vi vatara vika nimireva tinaini kia vivorave.
8 Haaru ni qokavara minturave. Vi entara tenavu Kadesi-Baanea mini vaiha te vinavuka nititaura vinavuka vi vatara ampeqamake tavareka vurave.
9 Vinavuka vi vatara viti viri tavamaqi viha Esikori Uqitakanta orunte, vihai qaiqaa orurante aninte, nai kena Isareri qetara uva tiva nimumanta vira kaara vika tinavu kempuka kia ho vaivo tivakeha kia vi vatara Noravano Kotiva nimireva tunaini vurave.
10 Vika mintuvaro vi entara Kotira arara itovaro viva nai kauqu aiqiqaa aqukero tiharo,
11 Vi vaiintika ekaa 20 ihiqaahai voqavata varakaaka Isipi ke aniha, kia tiriara kempukaiqamake iriqi viraiti, ti qoririma kaara, vira kaara kia ho vikaqihairo voqavanovata te kauqu aiqiqaa aqukeha Eparahaamiravata Aisaakiravata Iekopiravata nimirera tuna vataraqaa oru vivarave.
12 Taaraqantaqaima vi vataraqaa ho vivarave. Kenaasira ankuqiraara Jefunera maaqu Kalepivavata, Nunira maaqu Iosuaavavata, vitantaqai kia ti Nora Kotika qoririma karaiti, tiriara kempukaiqamake iriqi vuarara ti, vitantaqaima mini vivarave, turave.
13 Mintiakero Noravano Kotiva vaiinti nahenti nitiharo vikara tiharo, Ne 40 ihiara qumina aahara vatainiqai nuvaqi vivi, vuru qutu vivarave, tumantara ti, ekaa vi entara vau vaiinti nahentika qora kaiqa vira varoka, qumina aahara vataini nuvaqi vivi, vuru qutu taiqa vurave.
14 Mintimake vika qutu vumanta vate ne nenta qokavara vatuka vare, ne vika vaintivara vaiha vohaa qaramake qora kaiqaqai vare variavaro vira kaara Nora Kotira anomakero arara ite vairave.
15 Ne Rubenira ankuvata, Gaatira ankuvata, tuqantaavi kia Nora Kotira avataqi vivera, vira kaara viva tinavu Isareri ekaa qaiqaa qaqira kairaqe, tenavu qaiqaa qumina aahara vataini nuvaqi vivi, vuru qutu taiqama virarave. Tenavu mintimake qoraiqama vuarera, vira ni okara kaarama tenavu mintima virarave, tiro.
16 Mosiva minti tumanta vika vi uvara iri, vika Mosiva unaini orunte virara tiha, Hoe are tinavu qaqi kairaqe tenavu ohaa autuke sipisipi viraqi vate, tentanavu vatuka vaantaavuravata autu taari tinavu vainti nahenti viraqi koqemake variate?
17 Tenavu mintimake vira naantiara tenavu qerama vare tenavu naane tentanavu kena Isareri avuni viha navutaaka hampata raquqi viha vika naatarake, viraqaahai tentanavu kena Isareri ntita vare, vika nái vaireka i vataraqaa vuru kaare. Tenavu ekaa vatukanavu vaantaavura autuke vate, ekaa haika tumaara maaramake avutaqi vataari maihainauka kia tinavu vaiinti nahenti qoraiqama nimitaate.
18 Avuni tenavu tentanavu kena Isareri kahaqiari ekaa vika naane nái varare i vatara varaiqe, viraqaahai tenavu orurante tentanavu maaqaini anirerave.
19 Tenavu Iotani Namari maini kuari avu uruntainaini vata varaunarara ti, tenavu kia ho Iotani Namari hini mantaraini vaina vatara naarumake varaainarave, ti.
20 Vika minti tuvaro Mosiva vikara tiharo, Ne nenta tiantemake quqaa mintireka ivera, ho ne Nora Kotira avuqaa iqoka raqireka qeramate variate.
21 Ekaa ni iqoka vaiinti vika Nora Kotira vevaaraini vaiha, Iotani Namari taqa vare oru hini mantaraini navutaaka hampata raqivaro Noravano Kotiva vika naatara kaira navutaaka vata vira varaate.
22 Ne mintimake Noravano Kotiva kaiqa niminara taiqake, ne nenta kena Isareri kahaqama nimitevavata taiqa virera, viraqaahai ne homa orurante maini ani vaivaro kia niqaa uva varianarove. Ne mintivaro Noravano Kotiva Iotani Namari hini mantaraini kuari avu urunaini vai vatarara ninavu vatama vaivo tiarire.
23 Oho, te tiari iriate. Ne nenta kauqu aiqiqaa aqukeha tivate uvara kia avataqi vivera, vira kaara ne Nora Kotira uva raqakaivaro ne qora kaiqa vare uvava kia kukeqa viraitiro, qoqaama varianarove.
24 Ho ne vatukave vaantaavurave sipisipi ohaave autu kaate. Autuke viraqaahai nenta kauqu qaiqaa aqukeha raqirerave tivatera irihama raqireka vuate, tiro.
25 Mosiva minti tumanta Gaatira ankuvata Rubenira ankuvata virara tiha, Nora vaiintivauvo, tenavu ai kaiqa vaiinti vaiha ai uvaqai avataqi virerave.
26 Tinavu nahentive vaintive, purumakauve, sipisipive, vika maini Gileaati vatukanavuqi vaiqe
27 ekaa tenavu vaiinti qerama vare, Nora Kotirara iriha oru raqirerave. Tenavu are tinantemake, Iotani Namari taqa vare oru navutaaka hampata raqirerave, ti.
28 Vika minti tuvaro Mosiva Kotira kaiqa vara amite vau vaiintira Eleasaaravata, Nunira maaqu Iosuaaravata, Isareri nora vaiinti vo anku vo ankuqaa raqikukavata, tiva nimiro tiharo,
29 Ne iriate. Gaatira ankuqiraa vaiintivata, Rubenira ankuqiraa vaiintivata, vika Kotirara iriha, auvihehavaa vare oru Iotani Namari taqa vare, ni kahaqiramanta ne navutaaka hampata raqiha vika naatarake vi vatara varaivera, ho ne Gileaati vata vika nimivaro vi vatava vikaini variarire.
30 Ho vika kia ni hampata Iotani Namari taqa vare ni kahaqamake raqireka vivera, ho vika ni aanante Kenaani vataqaima varevarave, tiro.
31 Mosiva minti tumanta Gaatira ankuvata Rubenira ankuvata nai tiva ami tiha, Hove, Noravano Kotiva tintemake tenavu mintirerave.
32 Tenavu Nora Kotirara iriha namari taqa vare Kenaani vataini oru vi vatanaaka hampata raqirerave. Tenavu iqoka raqu taiqake, viraqaahai tenavu Iotani Namari maa mantaraini vai vataraqaa ani vairerave, ti.
33 Vika minti tuvaro Mosiva ekaa Amo King Sihoriva u vataravata, Basaani King Okuva u vataravata, vi vatara aumanto vau vatukanavuravata, kaama tero, Gaatira ankuvata, Rubenira ankuvata, Manasera anku hininavuvata, vi vatara nimura.
34 Mintuvaro Gaatira ankuvano haaru ori vaantaavura vau vatukanavura qaiqaa autu kora. Vika maa vatukanavura qaiqaa autu kora:
Diboni, Ataroti, Aroe,
35 Ataroti-Sofaani, Jase, Jokubeha,
36 Beti-Nimura, Beti-Haraani.
37 Rubenira anku vika maa vatukanavura autu kora:
Hesaboni, Eleale, Kiriataimi,
38 Nebo, Sipimaa, Baali-Meoni. Vika Baali-Meoni vatuka vo autu ntava tora.
Vika mintimake ekaa vatukanavu qaiqaa autuke, qaraaka autuvata ntava tora.
39 Manasera maaqu Makira ankuvano Gileaati vataini oruntero Amo vatanaaka hampata raqiharo vika aru ntata komanta vinuvaro vi ankuva vi vataraqaa vaurara tiro,
40 Mosiva Gileaati vata Makira anku amuvaro vi vatava vi ankura vata vaura.
41 Vaiinti vo Jairiva Manasera ankuqihainaava, viva nai navunaaka vokuka ntita varero oru vo vatukanavu hampata raqiharo vika naatara kero vi vatukanavura varero vinavura autu nteharo Jairura-Vatukanavuve tura.
42 Qaiqaa Nobaava nai navunaaka ntita varero oru Kenati vatukavata, vira tataaqa vau vatukanavuvata, raqiharo vinavura varero viva nai autuara iriharo Kenati vatuka vira autu nteharo Nobaa vatukave tura.