6
Yang Nag̱ibasul Ni Pablo Tung Nira Natetenged Tung Pagdarangepen Nira Tung Mga Usgadu (6:1-11)
1 Kung may sam bilug asan tung numyu ang may agrabiadu na tung aruman nang tumatalig, ayw̱a, magkatama w̱asu ang magpangaas da ka enged ang magdimanda tung sasang usgadung belag̱an ka pa man tumatalig? Belag ba ang yang dapat ang papagbistaen na ya ra yang mga aruman nang binuat da ka yang Dios ang mga kinasakpan nang sadili ang katulad ka tung anya?
2 Ayw̱a, indi mi nag̱askean ang tung uri, ta yaten ang binuat da yang Dios ang mga kinasakpan nang sadili, talig̱anita ra anyang magbista tung mga tau ang kasiraanita ra ka ni Ginuung Jesus? Ig disir, kung tung numyu ipabistaay na yang mga tau tung uri ta kaldaw, ayw̱a, simanyan indiamu ka w̱asu kumayang magbista tung mga kaputulan ming may mga kasu-kasu nirang mga maning ka ilem tiang gereg̱esyeng bag̱ay ilem?
3 Ayw̱a, indi mi ka nag̱akdekan ang pati yang mga angil, ya ra kay ipabista na tung yaten tung uri? Ya pa yang mga kasu-kasung atiang nag̱adapat ilem tung pagpangabui mi taa tung kaliw̱utan ang naa indi mi pa w̱asu masarangan ang arigluen?
4 Purisu kada magkatiniramu ra nganing ta mga kasung mga maning tia, ayw̱a, idangep mi pa ka enged tung mga usgadung indi nganing agkaw̱ig̱en ming mga putul ming mga tumatalig?
5 Ag̱aningenamu ra yeen ta maning tia ay ug̱ud asanamu ra ngaeyangay ta eyak mi. Abaa, ayw̱a, talagang andang pisan ay putul mi asan ang mawayang ta kinaisipan ang maskeng magbista tung duruang magputul tung ni Ginuu tang pag̱aasuntuan?
6 Ang pagkatapus atia pala, mismu yang duruang magputul tung ni Ginuu ta, ya pay pag̱asuntuan duun ka pa man mismu tung katalungaan yang sasang usgadung belag̱an ka pa man masigkatumatalig nira?
7 Abaa, tung pag̱arasuntuan ming atia, talagang durung pisan agkadakul yang kapirdian yang pagpurutulan ming sam pundaan. Indi w̱a, mas maayen pang magpalepesamu ra ilem, maskin madayaanamu pang kalawan ta sasang may kantidad kay tung magdangepamu tung usgadung magdimanda tung putul ming panlepes tung numyu?
8 Ang pagkatapus yang numyu kang atia, yamu mismu ay pag̱intra pagpanlepes ig pagpangalaw ang anday dumang nag̱adarali mi, kung indi, mismu yang mga putul mi ka pa man tung ni Ginuu ta!
9-10 Ayw̱a, indi mi nag̱askean ang yang mga taung kumpurming pagpadayun ka enged tung pagburuaten nira ta maskin unu pang malainay, indi ra ka enged paintraen yang Dios tung paggaraemen na tung uri? Purisu indi mi ilem dayaen yang mga sadili mi. Kipurki kung tinu pay kumbaw̱aynen ubin kunlaliien, kung tinu pay pagtuu tung mga bultu, kung tinu pay paglimbung tung kasawa na, kung tinu pay pagkakasawa-kasawaan ang lalii may lalii, kung tinu pay kuw̱ali panalensen tung tanan ang bag̱ay, kung tinu pay tarainem, kung tinu pay pagpanduminar, kung tinu pay pagpangalaw ta belag̱an anya, anday inaning tung nira, indi ra ka enged paintraen yang Dios tung paggaraemen na tung uri.
11 Atii kanay ang indiamu pa nag̱apagtalig tung ni Ginuung Jesus, maning kang pisan tia yang mga pag̱urubraen mi. Piru numanyan pinagpunasanamu ra yang Ampuan tang Dios tung mga kasalanan ming mga maning tiang durug kaligna ang maning pa tung pinagdig̱uamu ra anya. Pinagpabag̱ayamu ra ka ni Jesu-Cristo tung anya ang para liw̱ianuamu rang magpalenget tung anya. Pinag̱usgaranamu ra ka nganing anyang saluamu rang pisan tung pagterelengen na. Yang tanan ang atiang pinagbuat na para tung numyu, duun da ipatielay na tung pagpakugmatay ni Ginuung Jesu-Cristo, duun da ka ipapanaway na tung pag̱urubraen yang Espiritu Santo ang yay nangimaklu tung mga kinaisipan mi ang asta may pinakaw̱ut na ra ka man ang matinlu tung mga pag̱urubraen mi.
Yang Pamarik Ni Pablo Tung Katadlengan Yang Duma Ang Anda Unu Ay Baling Mangumbaw̱ay (6:12-20)
12 Midyu may katadlengan ta duma may ruma asan ang kumus napagtalig da unu tung ni Ginuung Jesus, suiltu ra unung magbuat yang kumpurming unu pay nag̱alelyag̱an nirang buaten. Tung bag̱ay, tama ka rin tii. Piru belag̱an ang mag̱aning ang yang tanan ang kalelyag̱an tang buaten ikaayen ta ubin ikaayen yang mga arumanu. Maskin yuu puidi kang aningenu ang maskin unu pang pag̱urubraenay suiltuaw, piru indiaw ra ka enged malelyag ang may sasang buatenu ang muya asanaw ra ka magamen ang magpakirepen si.
13 May katadlengan pa yang duma ang pag̱inatuay unu yang pamangan ta may yang tian ta. Dispuis tung uri ta kaldaw unu parariu ka ilem unung pelkan yang Dios ta pangaministiran nira. Kung tung bag̱ay, tama ka rin tii. Piru kung natetenged tung tinanguni tang naang bilug, iugtulu tung numyu, yang katuyuan na belag̱an ang mag̱aning ang para gamiten tang mangumbaw̱ay, kung indi, ang para gamiten tang ipagpadengeg tung ni Ginuung Jesus. Ig tanyang Ginuu ta yay pagsuitu tung mga tinanguni tang naa ang kumpurming unu pay mga kaministiran na ay tanya ra ilem ay pag̱ingalukan ta.
14 Dispuis pinabungkaras da nganing yang Dios ti Ginuu ta pati ita ya kay buaten na tung yaten ekel tung kagaeman na.
15 Ayw̱a, nag̱alimung-limung da tung mga isip mi ang yang mga tinanguni ming bilug yay mga parti-parti yang tinanguni mismu ni Jesu-Cristo? Ayw̱a, magkatama w̱asu tung mga isip mi ang yang tinanguni tang naang binuat da ni Ginuung Jesus ang mga parti-parti yang tinanguni na mismu, ya pay kalawen ta tung anyang ipakiugpu tung sasang baw̱ay ang pagpagamit ang para tanya si ay may pudir? Indi ra ka enged ang pisan magkatama tia!
16 Ayw̱a, indi mi ra nag̱ademdeman ang kung tinu pay magpakiapen tung sasang baw̱ay ang pagpagamit, duun da tanira magsasaan ta tinanguni may tinanguni? Kipurki maski tung kasulatan nganing nabtang da kang lag̱i ang yang durua unu mag̱ing sa nga tinangunian da ilem tanira.
17 Piru kung tinu pay pagpakigkapulit tung ni Ginuung Jesus, pagsasaan da ka tanira ta kinaisipan may kinaisipan.
18 Purisu likayan ming likayan yang bisyung atiang pangumbaw̱ay. Ay kipurki yang kasalanan ang atia aparti tung kadaklan ang mga kasalanan ang nag̱abuat ta sasang tau. Kipurki ekel tung kasalanan ang atia, yang tinanguni ming sasa ra rin ang parti-parti yang tinanguni mismu ni Ginuung Jesus ang para tung ikadengeg na, asan dag kalaway mi tung anyang iunungay tung tinanguni yang baw̱ay ang atia ang tanya si ay may pudir.
19 Kung indiamu enged mag̱impurmi tung nag̱ianingung atia, ayw̱a, indi mi nag̱ademdeman ang yang mga tinanguni ming atia maning pa tung sasang balay ang sagradu ang pag̱atiniran yang Espiritu Santong ipinagpatinir yang Dios tung numyu? Yang gustu nang ianing, belag̱an dang yamuy may pudir asan, kung indi, yang Dios mismu, ya ray may anya.
20 Ag̱aningenamu ra yeen ang anda ray pudir mi tung tinanguni mi ay natetenged ginawaramu ra nganing yang Dios ta may kantidad nang durung pisan agkamaal. Purisu numanyan kumus tanya ray may anya tung mga tinanguni mi, dapat ang gamiten mi tung kumpurmi ilem ang ikadengeg na.