Yang Isinulat Ni Pablo Tung Mga Tag̱a FILIPOS
Patkaw Ang Pasanag Tung Kumpurming Magbasa
Yang sulat ang naa ipinagpasulat ni Pablong ipinaekel tung sam pundaan yang mga tumatalig duun tung siudad ang Filipos duun tung parti Macedonia. Yang grupu nirang atia ipinaeyang yang Dios ekel tung pagparakaw̱utun na duun tung nira atiing primiru (Mga Binuat-buatan 16:6-40). Atiing pagpasulat na, nag̱aditini pa duun tung Roma natetenged tung pagparakaw̱utun na yang Matinlung Balita natetenged tung ni Ginuung Jesu-Cristo.
Yang sasang ipinagpasulat na tung nira ay gustu nang magpasalamat tung nira natetenged tung taw̱ang ang ipinaekel nira duun tung anya ang durug tinlu (4:10-20). Gustu na kang magpaktel tung mga isip nira ang para belag̱an ang yay panluw̱ayan nira yang nainabu tung anyang nag̱aditini yang gubirnu duun tung Roma (1:12-26). Tutal asan dang mas pang nagkatinlu yang palaksu yang Matinlung Balita duun tung Roma. Nagpaintindi ra ka tung nira ang yang impurtaen enged nira ang yang mga ug̱ali nira, dapat ang pirming magkatunu tung nag̱adapatan yang Matinlung Balita ang nag̱ipagpakaw̱ut nira duun tung Filipos (1:27). Yang duruang atia ya ray prusigiran nira maskin ya ray magakdan nira ta pinitinsia (1:28-30).
Dispuis nagkunsiu ra ka tung nira ang yang mulidung ipinagpaita ni Ginuung Jesu-Cristong nagparanek, ya ra kay kaministiran ang usuyun nirang magpurutul (2:1-11). Kaministiran ang yang ikaayen yang mga aruman nira ya ra kay pabilug̱an ta mga isip nirang intindien belag̱an ilem yang ikaayen nirang sadili. Yang pagpabetang nira tung mga aruman nira ang tanira mas pang magkabag̱ay ang dayawen kay tung nira ang para asan da nga plekay yang pagparaabwat-abwatan (2:3-4). Dispuis pinademdem na ra ka ang kumus may kalibrian da nira, kaministiran ang papruibaan da nira tung mga ubra-ubra nirang magkabag̱ay tung sasang taung tinapnay ra ni Jesu-Cristo (2:12-18).
Dispuis, pinabantay na ra ka tanira natetenged tung mga Judio ang durug kakatatalang yang nag̱ireg̱es nira tung mga tau ang dapat unung magpabuat ta tanda tung mga tinanguni nira. Kipurki yang pinatielan yang Dios ang nagtapnay tung nira, belag̱an tung maning tiang papanaw, kung indi, suluminti ra ilem natetenged tung kaneeman nang makabew̱ereng ang pisan ang ya ray ipinaita na atiing pagpakugmatay ni Ginuung Jesu-Cristo. Maskin tanya ang tukaw maktel yang panalig na tung pagturumanen na yang sari-saring mga katuw̱ulan, may uras dang ipinlek na ra ang para magtalig dang bug̱us tung ni Jesu-Cristo ug̱ud suluminti ilem asan da nga telengay yang Dios ang salu rang pisan tung pagterelengen na (3:1-11). Purisu yang pag̱asikad na enged ang tanya mas pang mag̱atu rang mag̱atu tung ni Jesu-Cristo tung tanan ang pag̱abuat na may tung tanan ang pag̱asikad na mintras pagpakbat tung ultimung kalibrian ang magkaw̱ut ang pati yang tinanguni na imakluen da ka ni Ginuung Jesus ang ipapariu na tung sadiling tinanguni nang timlat dang pisan ang para asan da mag̱atung pisan ti Pablo tung anyang anda ray pagkakulang na (3:12-21).
Tung 4:1-9 may mga impurtanting bag̱ay ang ipinaktel na tung nirang usuyun nira. Magdasun, ya ra yang pagpasalamat na tung nira natetenged tung taw̱ang ang ipinaekel nira tung anya (4:10-20).
Yang Kamtangan Yang Sulat Ang Binulus-bulus:
1:1-2 Yang Intrada Yang Sulat
1:3-11 Pagpasalamat ti Pablo Tung Dios Natetenged Tung Pagpakigsasa Nira Tung Anya Tung Pagparakaw̱utun Na Ang Nunut Da Ka Ta Nag̱ipag̱ampu Na Para Tung Nira
1:12-18a Maskin Nag̱aditini Ti Pablo, Masadya Pa Ka Enged Yang Isip Na Ay Ekel Tung Pagkaditini Na Mas Pang Nag̱awasak Tung Roma Yang Matinlung Balita Natetenged Tung Pinagtalus Ni Jesu-Cristo
1:18b-26 Nag̱ikasadya Na Ka Ang Yang Luaan Yang Pagpaditini Tung Anya Matinlu Ka Enged Maskin Imatayen Maskin Pabuien
1:27-30 Yang Dapat Ang Impurtaen Nira Ang Yang Mga Ug̱ali Nira Pirming Magkabag̱ay Tung Palaksu Yang Matinlung Balita Maskin Mapasaran Ta Pandeeg-deeg
2:1-11 Nag̱ipatuman Na Tung Nira Ang Yang Pagpabetang Ni Jesu-Cristo Tung Sadili Nang Aranek Ya Kay Suaren Nirang Pagpabetang Tung Mga Sadili Nira
2:12-18 Kumus May Kalibrian Da Tanira, Dapat Ang Papruibaan Da Nira Tung Mga Pag̱urubraen Nirang Mag̱atu
2:19-30 Nag̱asambit Na Ti Timoteo Durua Ni Epaprodito Ang Yay Nag̱aisip Nang Ipaangay Duun Tung Nira
3:1-3 Nag̱ipaaman Na Natetenged Tung Mga Taung Pamagtulduk Ta Ikarangga Yang Pagtaralig̱en Nirang Bug̱us Tung Ni Jesu-Cristo
3:4-11 Nag̱ipasanag Na Kung Ya Pa Ag̱aring Ipinabtang Na Yang Dating Panalig̱an Nang Anday Kuinta Ang Para Mag̱ing Bug̱us Da Yang Pagtalig Na Tung Ni Jesu-Cristo
3:12-16 Maskin Belag̱an Pa Atu Rang Pisan Tung Ni Jesu-Cristo, Mintras Bui Pa Tanya, Yang Sikaren Na Ang Tanya Mas Pang Mag̱atu Rang Mag̱atu Tung Anya Tung Tanan Ang Pag̱abuat Na
3:17-21 Nag̱ipaaman Na Tung Nira Ang Indi Enged Mag̱usuy Tung Dumang Pamagpasuag Tung Katuyuan Ni Jesu-Cristong Nagpalansang Tung Krus, Kung Indi, Mag̱usuy Tung Mulidu Na
4:1 Nag̱apapagbilug Na Yang Pinakaisi Yang Ipinagpasanag Na Tung 3:1-21
4:2-9 May Mga Impurtanting Bag̱ay Ang Gustu Nang Pakdulan Nira Ta Kantidad
4:10-20 Natetenged Tung Sasang Itinaw̱ang Nira Tung Anyang Ya Enged Ay Pagsadyaan Yang Isip Na
4:21-23 Yang Pagtapusan Yang Sulat
1
Yang Intrada Yang Sulat (1:1-2)
1 Yang nagpasulat yang sulat ang atia, ya ra yuung ti Pablo duruaami ra ka ni Timoteo ang yami mga turuw̱ulun ka man ni Jesu-Cristo. Yang sulat ang atia ipinaekel da yamen tung numyung tanan asan tung Filipos ang kumpurming binuat da yang Dios ang mga tauan nang sadili ekel tung kaampiran ming naang baklu tung ni Jesu-Cristo, kasiraanamu ra ka yang mga manigpadag̱en-dag̱en asta mga manigtaw̱ang.
2 Yang nag̱ipag̱ampu yamen tung Ama tang Dios durua ni Ginuu tang Jesu-Cristo ang mas pang maispirinsiaan mi yang kaneeman nirang pagpadag̱en-dag̱en tung numyu ig mas pang ikasadya mi yang kaampiran mi tung nirang naang baklu.
Nag̱apasalamatan Ni Pablo Tung Dios Yang Pagtaraw̱angen Nira Tung Anya Tung Pagparakaw̱utun Na (1:3-8)
3 Kada mademdemanamu yeen, durug dakul yang pagpasalamatu tung Ampuan tang Dios natetenged tung numyung tanan asan.
4-5 Ay kada nag̱ipag̱ampuamu yeen, ag̱ampayanaw ra ta kasadyaanung duru ay nag̱ademdemanu yang pagtaraw̱angen mi tung yeen tung pagparakaw̱utunu yang Matinlung Balita disti pa atiing primirung pananged mi ang asta ra ilem simanyan.
6 Purisu nag̱asiguruu ang kumus naimpisaan da yang Dios yang pag̱irimakluen na tung numyung durug tinlu, ya ra kay dayunun na ang para mas pang mag̱atuamu rang mag̱atu tung nag̱auyunan na ang asta kaw̱utun da ilem yang uras ang ipaglekat ni Jesu-Cristo.
7 Talagang magkatamang pisan tiang pagpamalaru tung numyung tanan asan ay maskin yuug kekedked ta kadina tani, nag̱askeanu rang talagang nag̱ademdemaw numyu ta matinlu ig pirmi ka tung mga isip mi yang ubrang naang nag̱aprusigiranu tani ang yuu pagpamarikaw tung mga katadlengan ang nag̱ipagbatuk yang mga tau tani tung Matinlung Balitang naang nag̱atag̱amanung nag̱ipagpaingmatuud tung nira. Bistu ka tung yeen ang nag̱aispirinsiaan mi ra kang tanan yang pagpadag̱en-dag̱en yang Dios tung numyu ang katulad ka tung nag̱aispirinsiaanu tung anya.
8 Sistigus yang Dios tung pagkamatuud ang yuu duru rang paglalangkag̱enu tung numyung tanan asan, ay nag̱apaeyanganaw ni Jesu-Cristo ta ipaggegmaw tung numyu ang magkapariu ka tung sadiling gegma na tung numyu.
Yang Nag̱ipag̱ampu Ni Pablo Para Tung Nira (1:9-11)
9 Ya taa yang nag̱ipag̱ampuu tung Dios ang paintindienamu ra anya ta mupia ug̱ud mamaresmesan mi enged kung ya pa ag̱aring mas pang magkabag̱ay yang paggeregmaan ming magpurutul maskin unu pay mainabu.
10 Maning tia yang nag̱ipag̱ampuu ug̱ud maskeamu rang magtimbang-timbang ta ustu tung mga isip mi kung ay pa enged ay lusung dapat ang buaten mi ug̱ud kung kaw̱utun da nganing yang uras ang ipanginsapu ni Jesu-Cristo tung numyu, limpiuamu ra tung pagterelengen na ig anday mabasul na tung numyu.
11 Yang sam bilug pang pag̱asikarung pag̱ampu ta maning tia ay ug̱ud yang tanan ang mga ubra-ubra mi pulus tung magkatama ekel tung pagpaktel ni Jesu-Cristo tung numyu ang ya ra ka man ay ikadengeg yang Dios ta duru.
Maskin Nag̱aliwag̱an Ti Pablo, Durung Nag̱ikasadya Enged Yang Isip Na (1:12-14)
12 Buinu, mga putulu tung ni Ginuu ta, gustuung maintindian mi ang yang mga kaliwag̱an ang naang nag̱apasaranu tani belag̱an ang mag̱aning ang asan da nga sagangay yang Matinlung Balita, kung indi, mas pang nagkatinlu yang palaksu na tani.
13 Ay yang dinangat yang pagkaditiniu, yang tanan ang mga sundalung naang pamagbereles ang pamagbantay tung yeen tani pati yang kadaklan ang mga tau tani tung Roma, luw̱us dang nangaakdek ang anday dumang nag̱ipagkedked tung yeen, kung indi, natetenged ilem tung pagparakaw̱utunu yang Matinlung Balita natetenged tung ni Jesu-Cristo.
14 Yang sam bilug pang pinakaw̱ut na, pati yang kadaklan ang mga putul tang mga tumatalig tani mas pang nagbaked yang pagtaralig̱en nira tung ni Ginuu ta natetenged naskean da nira kung unu pag katinlu yang pagtaraw̱angen ni Ginuu ta tung yeen tani tung pagditinian. Purisu asan da nga dulangay yang balur yang isip nirang magparakaw̱utun yang bitala yang Dios ang andang pisan ay nag̱enteran nira.
Basta Nag̱ipagpakaw̱ut Da Tung Mga Tau Yang Natetenged Tung Ni Jesu-Cristo, Ya Ray Nag̱ikasadya Yang Isip Ni Pablo (1:15-18a)
15 Kung tung bag̱ay, nag̱askeanu ka ang yang duma tung nira pagparakaw̱utun natetenged tung ni Jesu-Cristo gated ilem tung pangimun nira tung yeen ang may gustu nirang magpalandaw. Piru yang duma, yang pag̱asikad nira tung pagparakaw̱utun nira ang para magpaita yang pagpakigsasa nira tung yeen.
16 Ay nag̱agegmaanaw nira ig gustu ka nirang magpaugtun tung yeen ay nag̱askean da nira ang ipinabtangaw ra nganing yang Dios tani ug̱ud magkerengaw ta ustu tung Matinlung Balita.
17 Piru yang dumang atiing nag̱aaningu, belag̱an tama yang pag̱asikad nira, kung indi, gustu ilem nirang magtiwakaw tung yeen. Kanisip nira ang kung duru rang taung magdag̱umukan tung nira, asanaw ra ka mangimun tung nira ang asta mas pang maliw̱eg̱an yang isipu mintras naniaw pa tung pagditinian.
18 Piru anda ray bali tia. Maskin yang duma pagpaseen ilem ang pagparakaw̱utun, maskin yang duma tama yang pag̱asikad nira tung pagparakaw̱utun nira, yang impurtanti asan ang yang balita natetenged tung ni Jesu-Cristo nag̱ipagpakaw̱ut da ka enged tung mga tau tani. Atia ya ray nag̱ikasadya yang isipu.
Yang Yadwang Nag̱ikasadya Na Ang Asan Da Tung Mga Kaliwag̱an Mag̱atung Mas Pa Tung Nag̱alelyag̱an Yang Dios Tung Anya (1:18b-26)
Belag̱an da ilem ya tiay nag̱ikasadyaw, kung indi, magpakasadyaaw pa ka enged
19 natetenged nag̱askeanu ang yang mga kaliwag̱an ang naang duminangat da tung yeen, asanaw ra mag̱atung mas pa tung nag̱alelyag̱an yang Dios tung yeen ekel tung pag̱arampuen mi may tung pagtaraw̱angen yang Espiritu Santong naang nag̱ipatinir ni Jesu-Cristo tung yeen.
20 Yang nag̱alelyag̱anu enged ang indiaw ra ka enged magkatinir ta eyak ang magkereng ta ustu tung ni Jesu-Cristo, kung indi, ang katulad ka tung binuatung nagpaluyut, kapin da enged numanyan ang maktel enged yang isipung magpadengeg tung anya tung tanan ang ulag̱u ang anday enteranu, maskin pabuienaw pa maskin ipaimatayaw pa.
21 Ay unu pay pulut nang nag̱abuiaw, kung indi, ang para ikadengeg̱aw ni Jesu-Cristo. Kung imatayenaw man, mas maayen tung yeen ay duunaw rang pisan tung anya magpasapen.
22 Piru kung yang planu yang Ampuan ta para tung yeen ang yuu pabuienaw pa anya taa tung kaliw̱utan ang naa, intunsis mapagpadayunaw ra tung panirbianung naa tung ni Jesu-Cristo ang dakulu yang kantidad na. Purisu indi ilem maskeanu kung ay pay ipalandawu tung pabuienaw may tung papatayaw.
23 Bilang yay paglingtan yang isipu kung ay pay ipalandawu tung duruang atia. Kipurki durung kalelyag̱ung pablag̱aw rang magpasapen tung ni Jesu-Cristo ay andang pisan ay magdeeg tii.
24 Ug̱aring kung isip-isipenu, midyu mas impurtanti ang pabutwanaw ra kanay taa tung kaliw̱utan ang naa arangan da ilem tung numyu.
25 Intunsis kumus yay magkatama tung isipu ang mas impurtanti ka man tia, purisu nag̱akarkuluu ilem ang puiding kalelyag̱an yang Dios ang yuu pabutwanaw ra ka man taa tung kaliw̱utan ang naa ang para mapagpakiugpuaw si ka tung numyu. Ay tung maning tia, mapadag̱en-dag̱enanamu yeen natetenged tung pagtaralig̱en mi tung ni Ginuung Jesus ang para mas pang kemeet ang asan da ka magkasadya yang mga isip mi.
26 Purisu kung mag̱urugpuita si, duun da magdulang ang mas pa yang kasadyaan ming magdayaw tung ni Jesu-Cristo natetenged tung yeen ang pinabalikaw ra anya asan tung numyu.
Yang Mga Ug̱ali Nira Dapat Ang Pirming Mag̱atu Tung Nag̱adapatan Yang Matinlung Balita (1:27-30)
27 Landaw tung tanan ang yang mga ug̱ali mi pirming magkabag̱ay tung nag̱adapatan yang Matinlung Balita natetenged tung ni Jesu-Cristo. Ya ray dapat ang sikaren mi ug̱ud maskin mabalikaw si tung numyung mag̱irita-ita si ka, maskin andanaw asan ang yuu ra ilem nga balitaay, maskeanu ka enged ang ta yamu pagberegkes-begkesanamu ta mupia ang maskin may pamagkuntra tung numyu, indiamu enged pagpaluw̱ay tung pagparakaw̱utun mi yang Balitang naang Matinlu ang yay nag̱apananged ta.
28 Yadwa pa ang indiamu kang pisan pagpatalaw tung pamagpakigkuntrang atia tung numyu. Ay kung indiamu manalaw tung nira, asan da tanira nga pakdulay mi ta sasang pruiba ang yang panalungaan nira kalainan da ig ta yamu kalibrian da yang panampetan mi. Anday dumang may patakaran tia, kung indi, yang Ampuan ta mismu.
29 Ay kipurki belag̱an da ilem ang pinakdulanamu ra anya ta pabur ang pinaeyanganamu ra anya ta ipagtalig mi tung ni Jesu-Cristo, kung indi, may sasa kang pabur bali ang ilinug̱ut na ka tung numyu ang yamu mapasaran ta pinitinsia arangan da ilem tung anyang pag̱akegngan mi.
30 Purisu ya ray natengeran na ang pati yamu asan nag̱apasaramu ka ta pinitinsia ang katulad ka tung naita mi tung yeen atiing asanaw pa tung numyu pati numaan ang pariu ka tung nag̱abalitaan mi.