11
Dɛ̀ wennimu ɑ bo bennɛ́mɛ̀ dɛ̀mɑrɛ̀
1 Dootóo ɑ diì dibinni miɛkɛ,
dɛ̀ yó mboní kɑ̀ɑ wɛ̃tɛ kɛ́ mù pɛ̀tɛ́mu.
2 Pɑ̃ ɑ kpɛrɛ bɛnìtìbɛ̀ bɛ̀yiekɛ̀,
bɑ́ bɛ̀ni kɛ yɛ̃́ ɑ í yɛ̃́mɛ̀ tìì nɑɑ yóó dɑ tuɔkɛní.
3 Fɛtɑɑfɛ̀ ɔ̃ɔ̃ kperi dɛ ĩ́nkɛ̀ kɛ́ni kɛtenkɛ̀ nkɛ.
Kɛ̀ mutie do kubɑkù cɑ̃̀nku
yoo kuyoú mù ɔ̃ nduɔ́ mù do kùù píkù nku.
4 Wèè weí kuyɑɑkù ò ɔ̃ɔ̃ í mbuɔtí.
Wèè bɔ́ú nyɛwɛtɛ̀ ò mɛ nhɔ̃ɔ̃ í nkɔ̃ṹ.
5 A í yɛ̃́ mɛ̀ɛ̀ botí kuyɑɑkù keri kùù cɛ,
ɑ í mɛ nyɛ̃́ dɛbirɛ ɔ̃ɔ̃ píítɛ́ mɛ̀ɛ̀ botí
dɛ yɔ̃ pɔutì miɛkɛ kɛ́nweí.
A í mɛ nyɛ̃́ Kuyie mpĩ́mmɛ̀ ku tɔ̃mmú kunku kùù dɔ̀ɔ̀ri dɛmɔu.
6 Kɛ̀ dɛ̀ wentɛ́ ɑ buɔtí ɑ diitì.
Kuyuoku bɑ́ mmɛĩ́ ɑ nɔu
kɛ yɛ̃́ ɑ í yɛ̃́mɛ̀ dɛ̀ɛ̀ yóó yiénnɛ̀ dɛ̀tɛrɛ̀,
yoo kɛ̀ dɛ̀ mɛ mbo yié ndɛdɛ́, ɑ í yɛ̃́.
7 A bo nwúómmɛ̀ kuwenniku
dɛ̀ wentɛ́ dìì mɔ̀nnì dɛ̀ nɑɑtimu,
kɑ̀ɑ fòù dɛɛ̀ wenni.
8 Kɛ̀ wèè fòù kɛ yĩ yɛbie mpɛ́u dɛ̀ nhò nɑɑti
dɛ kó yɛbie nyɛmɔu miɛkɛ,
dɛ yiɛ̀ nnɛ́ nyɛ̃́ yɛwe yɛiyɛ sũmɛ̀,
dɛ̀ɛ̀ kpɑɑní dɛ̀ í dò nkɛ́bɑntɛ́.
Nyɑ̃nku kɛ nɛ́ nyɛ̃́
9 Odɑpɑ̀ɑ̀ nfɔ̃́!
Dɛ̀ ndɑ nɑɑti, kɑ̀ɑ mmɔkɛ diwɛ̀ì ɑ dɑpɑ̀ntì mɔ̀nnì.
Ntũ nhɑ yɛ̀mmɛ̀ dɑ nɑ́ɑ́ ntì,
kɛ́ndɔɔri ɑ dɔ́mɛ̀.
A nɛ́ nyɛ̃́ kɛ dò nKuyie nyóó dɑ bekɛ́nɛ̀ dɛmɔu dɛ kpɛ́í.
10 Kɛntɛ́nɛ̀ ɑmɑ́ɑ̀ dɛ̀ɛ̀ bo dɑ tɑnnɛ́ mɛyɛǹcɑɑ̀rìmɛ̀ miɛkɛ
nɛ̀ mumɔmmú kɛ yɛ̃́ tidɑpɑ̀ntì
nɛ̀ tibíkɛ́mbɛ́ntì dɛ̀ í yóó ɔɔtɛmɛ̀.