11
Kuyie ndɔ́mɛ̀ ku kɔbɛ bɑ́ bɛ̀ í bɑntɛ́
1 Kɛ̀ Kuyie mbɛ́i nkɛ dɔ̀:
N dɔkɛ Isidɑyɛɛribɛ nɛ̀ bɛ bíkɛ́mbɛ́ntì nti,
kɛ́ bɛ̀ yu bɛmbɛ bɛ̀ɛ̀ tu m bí,
kɛ́ bɛ̀ dènnɛ Esibiti.
2 Kɛ̀ nní mbɛ̀ yu kɛ̀ bɛ̀ n dɛ́tirìnɛ̀,
kɛ feu dibɔɔ̀ Bɑɑdi kɛ tuɔ̀ nsitenkɑɑnìi tihúúntì.
3 Míì mɔ́mmuɔ n do bɛnkɛ Isidɑyɛɛribɛ mucèmmu,
kɛ́ mbɛ̀ ùúkú nɛ̀ m bɑɑ̀
bɛ̀ mɛ nyí bɑntɛ́ kɛ dò m bɛ̀ yùɔ̀ri.
4 Kɛ̀ m bɛ̀ ni mɛyɔɔ̀mmɛ̀ kɛ bɛ̀ dɔ́ mɛdiɛ̀.
Kɛ bɛ̀ yùɔ̀ri obíyuɔ̀rì ɔ̃ ntɔmɛ̀ dɛbirɛ kɛ̀ dɛ̀ wɑ́ɑ̀rì,
kɛ dɛ̀ duɔ̀ ntidiitì.
5 Isidɑyɛɛribɛ mɛ̀ nyetɛmɛ̀ bɛ̀ bo wɛ̃tɛnímɛ̀ m borɛ̀,
bɛ̀ í wɛ̃ti Esibiti, Asidii kóo kpɑ̀ɑ̀tì weè yó mbɛ̀ te.
6 Mudoò muù yó mbo bɛ ɛì,
dɛ̀mɑrɛ̀ í yó mbo dɛ̀ɛ̀ bo mù còńnɛ́,
bɛ̀ tɑ̃ɑ̃tɛ́ ti kó mucɔ̃́ntimu mmu dɛndɛ.
7 N nìtìbɛ̀ m bùtínnɛ́mu pɑ́íí,
kɛ̀ m bo kɛĩ́nkɛ̀ kɛ bɛ̀ yu
bɑ́ bɛ̀ kóò mɔù í dɔ́ kɛ́ íinní o yuu,
8 M bɑ́ɑ́ nɑ kɛ́ di yóu díndi Isidɑyɛɛribɛ!
Isidɑyɛɛribɛ m bɑ́ɑ́ nɑ kɛ́ di bɔntóo,
m bɑ́ɑ́ nɑ kɛ́ di yóu n dɔ̀ɔ̀mɛ̀ Adimɑ,
m bɑ́ɑ́ nɑ kɛ́ di dɔɔ̀ n yĩ́mɛ̀ Seboimmu kó yɛhɛkɛ̀,
n yɛ̀mmɛ̀ mɛɛ̀ cɑ̀ɑ̀rɛ̀ kɛ̀ mɛsémmɛ̀ m pĩ ndi kpɛ́í.
9 N yí yóó yóu kɛ̀ m miɛkɛ di yɛ̀ díndi Isidɑyɛɛribɛ,
n yɛ̀mmɛ̀ í yie m bo di kuɔmɛ̀,
n tú Kuyie nku n yí tú onìtì,
n tú Kuyie nku kɛ dò mpɑ́í pɑ́í,
n yí yóó yóu kɛ̀ m miɛkɛɛ di yɛ̀ kɛ́tontɛ́.
10 N nìtìbɛ̀ bɛ̀ do pĩ̀ḿmú bɛ̀ kɛ́kònnɛ̀ yɛhɛkɛ̀ tɛyɛ̀,
bɛ̀ wɛ̃tinímu, mí mbɛ Yiɛ̀ nKuyie nkɛ̀ m bo mbɛ̀ ni,
kɛ kontí dicìrícìrì tɛ̃mɛ̀ kɛ̀ bɛ̀ tũ.
Bɛ bí bo yɛ̀nní diyiè tɑɑ̀ kɛ̀ɛ̀ bíɛ́kɛ̀
kɛ́nkpeutí kɛ́kɔtɛní m borɛ̀.
11 Bɛ̀ itinímu Esibiti sikpɑ̃̀ncɛ́ndéi kɔ̃mɛ.
Kɛ itiní Asidii yɛkpɛtìnɔ́nkperɛ tɛ̃mɛ̀,
kɛ̀ m bo bɛ̀ tɑnnɛ̀ bɛ cɛ̃́ĩ miɛkɛ kɛ̀ bɛ̀ mbo.
Mí ndi Yiɛ̀ nKuyie m míì bɛ́i.