7
Isidɑyɛɛribɛ dɔ̀ɔ̀ mɛ̀ɛ̀ yɛi mmɛɛ̀ yó nte kɛ̀ mɛyɛi mbɛ̀ tùɔ̀kɛní
1 Mɛm̀mɛ kɛ̀ ti Yiɛ̀ nKuyie mbɛ́i nkɛ dɔ̀:
N do dɔ́ dìì mɔ̀nnì kɛ́miɛkùnnɛ n nìtìbɛ̀,
kɛ́miɛkùnnɛ Isidɑyɛɛribɛ,
dɛ mɔ̀nnì ndi, bɛ yɛi nnɛ́ feitɛ́mɛ̀
nɛ̀ Sɑmmɑrii kɔbɛ kó kuyonku.
Bɛ kpɛrɛ dɛmɔu do tú mɛsoùmmɛ̀ mmɛ,
kɛ̀ bɛyóóbɛ̀ tɑɑ̀ sicɛ̃́ĩ kɛ̀ bɛnitiyɛibɛ firì icɛ.
2 Bɑ́ bɛ kóò mɔù yɛ̀mmɛ̀ í ò pɑ̃ kɛ dò n yɛ̃́ bɛ̀ dɔ̀ɔ̀ri mɛ̀ɛ̀ yɛi.
Ntɛ bɛ di mmɔ̀nnì kɛ̀ bɛ yɛi mbɛ̀ pĩ,
mmɛ̀ feitɛ́mu n yììkɛ̀.
3 Bɛ̀ dɔ̀ɔ̀ri mɛ̀ɛ̀ yɛi mbɛnìtìbɛ̀ kɛ̀ dɛ̀ nɑɑti bɛkpɑ̀ɑ̀tìbɛ̀
kɛ soú bɛnìtìbɛ̀ kɛ̀ dɛ̀ nɑɑti sikpɑ̀ɑ̀tìbìí
4 Bɛmɔu bɛ̀ dɔuti dɔutinɛ̀ bɛtɔbɛ̀ mbɛ,
bɛ miɛkɛ dònnɛ̀ fɛpɛ̃́ɛ̃̀pṹnnɛ́tofɛ nfɛ bɛ̀ tɔ̀tìnnɛ fɛ̀,
kɛ̀ fɛ̀ wũɔ̃tɛ́, kɛ̀ bɛ̀ yóu kɛ tɛ̃́nkɛ í tikii,
kɛ bɑɑ̀ tipɛ̃́ɛ̃̀cootì bo múútímɛ̀.
5 Dikpɑ̀ɑ̀tìbɑnni yiè kɛ̀ sikpɑ̀ɑ̀tìbìí yɑ̃̀ kɛ́muɔ́,
kɛ́duɔ́ mbɛmɑ́ɑ̀ bɛnitiyɛibɛ.
6 Kɛ̀ bɛ̀ dɔ́ kɛ́bɔ nhokpɑ̀ɑ̀tì,
bɛ̀ ɔ̃ ntonnì fɛpɛ̃́ɛ̃̀pṹnnɛ́tofɛ kɔ̃mɛ mmɛ,
kɛyènkɛ̀ kɛ níí bonkɛ, dikṹnweńnì kɛ́cɔ́útɛ́ mɛdiɛ̀,
7 kɛ́cɔ́útɛ́ fɛpɛ̃́ɛ̃̀pṹnnɛ́tofɛ kɔ̃mɛ kɛ́tuɔ mbɛ̀ɛ̀ bɛ̀ ni,
kɛ̀ bɛkpɑ̀ɑ̀tìbɛ̀ duò bɛmɑ́ɑ̀ bɛmɑ́ɑ̀.
Òmɔù mɛ nyí n kuɔ̀nnɛ̀.
8 Isidɑyɛɛribɛ kɔɔrɛnɛ̀ ibotí tɛì nyi,
kɛ sɑ̃̀ɑ̃́tɛ́nɛ̀ kupɛ̃́mpɛ̃ńkù bɛ̀ í pèe nkù.
9 Kɛ̀ bɛpɔ̀ɔ̀bɛ̀ dèu bɛ wɛ̃rímú bɑ́ bɛ̀ í yɛ̃́,
kɛ̀ tiyùpɛ́ítì ketɛ́ bɛ yɔ ĩ́nkɛ̀ bɑ́ bɛ̀ í dɑkɛ.
10 Isidɑyɛɛribɛ fentɛ̀ tɛɛ̀ nɑ̀kɛ́ bɛ kpɛ́í.
Bɛ̀ mɛ nyí wɛ̃̀tɛní mí mbɛ Yiɛ̀ nKuyie m borɛ̀.
Bɑ́ nɛ̀ tìì kó dimɑ̀ɑ̀ bɛ̀ tùɔ̀kɛní ti miɛkɛ, bɛ̀ í n wɑmmú.
11 Isidɑyɛɛribɛ yɛimmu kɛ dònnɛ̀ dikpɛtìnɔ́nkperi,
bɛ̀ í mɔkɛ mɛyɛ̀mmɛ̀ bɛ̀ kɔ̀tɛ Esibiti nwe nɛ̀ Asidii
kɛ wɑnti mɛteèmmɛ̀.
12 Kɛ̀ bɛ̀ dɔ́ bɛ̀ɛ cuó nkɛ̀ɛ̀ bíɛ́kɛ̀,
m bo bɛ̀ bɔntɛ́ ticùɔ̀tì,
kɛ̀ tìì bɛ̀ pĩ ntinɔ̀tì kɔ̃mɛ,
kɛ̀ m bɛ̀ tié mbɛ̀ dɔ̀ɔ̀ mɛ̀ɛ̀ yɛi nkpɛ́í.
13 Di bo yɑ̀ díndi Isidɑyɛɛribɛ,
di í mɛ ndɔ́mɛ̀ kɛ n tɔ́ɔ́nnɛ̀,
di mɛ̀ nyetɛmɛ̀ n kpɛti, di kó dihɛì bo dɔúnko.
Di yɛ̀mmɛ̀ dò ndi bo nni soú nkɛ̀ n di dɛɛtɑ́ɑ̀?
14 Di í n kuɔ̀nnɛ̀ di yɛ̀mmɛ̀ mɛmɔu,
di ɔ̃ nkuɔ̀ nkɛ mítírì di dúɔ̀ ĩ́nkɛ̀ kɛ yɔ́ú dimɑ́ɑ̀,
kɛ dɔ́ tidiitì nti nɛ̀ mɛnɑɑ̀,
di í dɔ́ n kpɛti.
15 Míì do di tiè nkɛ di duɔ̀ mmuwɛ̃rímú,
nɛ̀ mɛmmɛ kɛ̀ di dɔ́ kɛ́ndɔɔ̀ mɛyɛi.
16 Di wɛ̃tiní Bɑɑdi borɛ̀ ndɛ, dɛ̀ í tú m borɛ̀
di dònnɛ̀ mutɑ̃mmù mùù kèétɛ́ mùmmu kɛ díí,
bɛ̀ yóó kuɔ di kó bɛkpɑ̀ɑ̀tìbɛ̀ nɛ̀ yɛsè nyɛ,
tinɑ́ɑ́nyɛiti di n nɑ̀kɛ́ tì kpɛ́í,
bɛ̀ bo di dɑɑ́ Esibiti ɛì miɛkɛ.