4
Kuyie nyóó bekɛ́nɛ̀mɛ̀ yɛbotɛ̀
1 Kɛ̀ ti Yiɛ̀ nKuyie mbɛ́i nkɛ dɔ̀:
Mí ndi Yiɛ̀ nKuyie m bo wɛ̃tɛ kɛ́íi ndìì mɔ̀nnì n nìtìbɛ̀
Sudɑɑ kɔbɛ nɛ̀ Sedisɑdɛmmu kɔbɛ.
2 M bo tíí nyɛbotɛ̀ kubiriku bɛ̀ tu kù Sosɑfɑti (dɛ̀ɛ̀ tu Kuyie mbekù),
n yóó dɛ̀ nyɛ bekɛ́nɛ̀ n nìtìbɛ̀ Isidɑyɛɛribɛ n tɑ̃ɑ̃tɛ́ bɛ̀ kɛ bɛ̀ te kpɛ́í,
kɛ yɛ̃́ yɛ̀ bɛ̀ cíɛmmɛ̀ kɛ̀ bɛ̀ tɑ ibotí tɛì miɛkɛ
kɛ yɛ̀ totí n tenkɛ̀.
3 Bɛ̀ tɑ̃ɑ̃́ tɛ́tɛ́ nwe kɛ totí n nìtìbɛ̀
kɛ fiiti bɛ nitidɑbí kɛ yietì bɛnitipòbɛ̀ bɛ̀ɛ̀ dɔuti dɔutinɛ̀ bɛnitidɑɑbɛ̀,
kɛ fiiti bɛnitipobí kɛ donnɛ̀ mɛnɑɑ̀.
4 Díndi Tiiri nɛ̀ Sitɔ̃ɔ̃ ɛì kɔbɛ nɛ̀ díndi Fidisitɛ̃ɛ̃bɛ,
di n dɔ́nɛ̀ ɔ̃̀nti? Di dɔ́ kɛ́pɛitɛmɑɑ̀?
Kɛ̀ di dɔ́ kɛ́pɛitɛmu di n nɑ́kɛ́!
Bɑ̀mbɑ̀ m bo duɔ́ nkɛ̀ dɛ kó mɛyɛi ndo di yɔ ĩ́nkɛ̀.
5 Díndi bɛ̀ɛ̀ tɔ m mɑ́tìpɛ́ítì nɛ̀ n sɔɔ
kɛ tɔ n nɛntì sɑ̀ɑ̀tì kɛ kònnɛ̀
kɛ tɑnnɛ̀ di bɔkɛ̀ kó yɛtuo.
6 Díndi bɛ̀ɛ̀ tùótɛ́ Sudɑɑ kó initidɑbí,
nɛ̀ Sedisɑdɛmmu kpɛyi kɛ fìtɛ́nɛ̀ Kɛrɛkibɛ
kɛ bɛ̀ dɛ́tìnnɛ bɛ ɛì.
7 Mí ndi Yiɛ̀ nKuyie n yóó wɛ̃tɛ kɛ́ bɛ̀ yùnímu bɛ̀ do borɛ̀,
kɛ̀ di bɛ̀ fìtɛ́, kɛ di yietí di yɛi.
8 M bo fitɛ́nɛ̀ di nitidɑbí nɛ̀ di nitipobí Sudɑɑ kɔbɛ,
kɛ̀ bɛ̀ɛ sɔɔtɛ́ kɛ́ ì fìtɛ́nɛ̀ Sɑbɑɑ ɛì kɔbɛ
bɛ ɛì dɛ́tirì.
Mí ndi Yiɛ̀ nKuyie mmíì bɛ́i.
Mudoò sɔmmu nɛ̀ tibeéntì sɔnti
9 Kɛ̀ ti Yiɛ̀ nKuyie mbɛ́i nkɛ dɔ̀:
Pĩɛ̃kɛ́nɛ̀ kɛ tú n yɛ̃ nyɛbotɛ̀ɛ bɑ́ɑ́tí mudoò,
duɔ́nnɛ̀ kɛ̀ di ɑ̃ɑ̃pɔ̀mbɛ̀ yɛkɔ̃m̀bɔ̀ yɛmbɛ̀ɛ bɑ́ɑ́tí kɛ́kétɛ́.
10 Túótɛ́nɛ̀ di nɑɑkɑ̃ kɛ́mɑ́ yɛkpɑ̀rìse,
kɛ́túótɛ́ tinunseuti kɛ́mɑ́ yɛkpɑ̃ɑ̃̀.
Bɑ́ kufɔ̃wɑɑ́ nyiɛ̀ kòò dɔ̀ omɑ́ɑ̀ dikɔ̃m̀bùɔ̀ yiɛ̀.
11 Díndi yɛbotɛ̀ tíínnɛ̀nní mɛcɑ̃ɑ̃ ndɛ kó kubiriku miɛkɛ,
mí ndi Yiɛ̀ nKuyie nkɛ̀ n cṹũnkoo nh ɑ̃ɑ̃pɔ̀mbɛ̀.
12 Yɛbotɛ̀, pĩ́nnɛ̀ kucɛ kɛ́kɔtɛní kubiriku
bɛ̀ tu kù Sosɑfɑti,
n yóó dɛ nkɑri kɛ́bekɛ́nɛ̀ yɛbotɛ̀ yɛmɔu.
13 Tidiitì bimu, túótɛ́nɛ̀ yɛse kɛ́ tì kɔ̃ṹ.
Fínyĩ̀ tie mbimu nɑunɛ̀ yɛbɛ diyɛtituò
kɛ́níú kɛ́píɛ nsicee kɛ̀ dɛ̀ ncou
yɛ yɛi mmɛɛ̀ sũ̀ṹ.
14 Mí ndi Yiɛ̀ nKuyie mmíì tu,
bɛnìtìbɛ̀ɛ tíí nyɛtĩ̀rɛ̀ yɛtĩ̀rɛ̀ m beéntì kó kubiriku miɛkɛ,
kɛ yɛ̃́ m miɛkɛ kó diyiè duunnímɛ̀mu,
n yóó bekɛ́nɛ̀ dì bɛnìtìbɛ̀ m beéntì biriku miɛkɛ.
15 Diyiè nɛ̀ otɑ̃̀nkù dɛ̀ tɛ̃́nkɛ í yó mpɛ́ì,
siwɑ̃̀ɑ̃ mɛ ntɛ̃́nkɛ í yó mmí.
16 Mí ndi Yiɛ̀ nKuyie mmíì pɛ̀ú mɛtɑmmɛ̀ Siyɔ̃ɔ̃ tɑ̃rì ĩ́nkɛ̀,
n tɑmmɛ̀ yìɛ̀mu Sedisɑdɛmmu,
tiwɛtì nɛ̀ kɛtenkɛ̀ kɛ̀ dɛ̀ sɑ̃̀nti,
kɛ̀ n kɑ̃nkɛ́ n nìtìbɛ̀.
Isidɑyɛɛribɛ kó disɔ̀rì tu mí nwe.
17 Díndi Isidɑyɛɛribɛ di bo bɑntɛ́
mí ndi Yiɛ̀ nKuyie, mmíì tumɛ̀ Kuyie,
kɛ bo Siyɔ̃ɔ̃ n tɑ̃sɑ̀ɑ̀rì ĩ́nkɛ̀.
Dɛ mɔ̀nnì Sedisɑdɛmmu bo nɑɑ́ ndikɑ̀rì sɑ̀ɑ̀rì,
bɑ́ bɛpɔ̀ɔ̀bɛ̀ tɛ̃́nkɛ bɑ́ ndɛ̀ pɛ̃nkù.
Isidɑyɛɛribɛ yóó wɛ̃tɛ kɛ́yɑ̀ mɛ̀ɛ̀ sɑ̀ɑ̀
18 Kɛ̀ Kuyie mbɛ́i nkɛ dɔ̀:
Dɛ yiè bo tuɔkɛ dìì yiè,
mɛnɑɑ̀ mbo mpũɔ̃̀ nyɛtɑ̃rɛ̀ ĩ́nkɛ̀
kɛ̀ mɛnɑɑmiɛ̀ mpũɔ̃̀ nsitɑ̃ɑ̃́ ĩ́nkɛ̀
kɛ̀ Sudɑɑ tenkɛ̀ kó yɛkondɑkɛ yɛmɔuu ɑ̃nnɛ́ mɛniɛ nkɛ́mpũɔ̃̀
kɛ̀ dinɛ́bòrì nyiɛ̀ní ti Yiɛ̀ nKuyie ncĩ́ɛ̃̀tɛ̀ miɛkɛ kɛ yɔ́ɔ̀rì Sitimmu biriku.
19 Dɛ mɔ̀nnì Esibiti bo dɔúnko,
kɛ̀ Edɔmmuu nɑɑ́ ntidobontì,
kɛ yɛ̃́ bɛ̀ pĩ̀ḿmɛ̀ Sudɑɑ kɔbɛ dɛtetìrɛ̀.
20 Dɛ mɔ̀nnì kɛ̀ bɛnìtìbɛ̀ mbo Sudɑɑ tenkɛ̀
kɛ́nhɑ̃ Sedisɑdɛmmu bɛ borimɛ mɛmɔu.
21 Mí ndi Yiɛ̀ nKuyie n yóó pɛitɛmu bɛ pɛ̀ì,
n yí yó nwúónko bɛ dootitɔbɛ̀,
mí ndi Yiɛ̀ nKuyie m bomu Siyɔ̃ɔ̃ tɑ̃rì ĩ́nkɛ̀.