115
Kuyie nkuù mɑ́ɑ̀ dò tí nkù sɑ̃ntí
1 Ti Yiɛ̀ nKuyie dɛ̀ í tú tíì te disɑ̃nni,
fɔ̃́ɔ̃̀ te disɑ̃nni, dɛ́úkùnnɛ ɑ yètìrì
ɑ sɑ̀ mɛ̀ɛ̀ kpɛ́í nkɛ dɔɔri timɔ́mmɔnti.
2 Bɑ nte kɛ̀ yɛbotɛ̀ bo mbékú kɛ tú:
Yé Kuyie mbɛ̀ tũ nkù borɛ̀?
3 Kuyie nti tũ nkù bomu kɛĩ́nkɛ̀,
kɛ dɔɔri ku dɔ́ dɛ̀ dɛmɔu.
4 Bɛ bɔkɛ̀ tu timɑ́tì pɛ́ítì nti nɛ̀ mɛsɔɔ,
bɛɛ̀ yɛ̀ dɔ̀ɔ̀ nɛ̀ bɛ nɔu.
5 Yɛ̀ mɔ̀kɛmu yɛnɔ̀ yɛ̀ mɛ nyí nɔ nkɛ nɑ́ɑ́,
kɛ mɔkɛ inuɔ, nyɛ̀ mɛ nyí wúó.
6 Kɛ mɔkɛ yɛto, yɛ̀ mɛ nyí yo,
kɛ mɔkɛ yɛwũɔ̃̀, nyɛ̀ mɛ nhɔ̃ɔ̃ í nkèè kunɔ́ú.
7 Kɛ ɑ̃ sinɔu, yɛ̀ mɛ nyí nɔ nkɛ pĩĩ,
kɛ mɔkɛ sinɑɑ̀cɛ̀i, yɛ̀ mɛ nyí nɔ nkɛ ceǹtì,
mɛtɑmmɛ̀ í yiɛ̀ní yɛ níí miɛkɛ.
8 Bɛ̀ɛ̀ dɔ̀ɔ̀ri dɛ kó sitenkɑɑnìi, bɛ̀ɛ sì nɑɑ́nnɛ̀,
bɛ̀ɛ̀ kó dimɑ̀ɑ̀ sì duɔ́ mbɛmɑ́ɑ̀, bɛ̀ɛ sì nɑɑ́nnɛ̀.
9 Díndi Isidɑyɛɛribɛ kó kuwuɔ, duɔ́nnɛ̀ dimɑ́ɑ̀ di Yiɛ̀ nKuyie,
nkuù tu di kóo teèntì, di kó kudɔpìkù.
10 Díndi Anɔɔ kó kuwuɔ nkɔbɛ duɔ́nnɛ̀ ndimɑ́ɑ̀ di Yiɛ̀ nKuyie,
nkuù tu di kóo teèntì, di kó kudɔpìkù.
11 Díndi bɛ̀ɛ̀ dé ti Yiɛ̀ nKuyie duɔ́nnɛ̀ ku dimɑ́ɑ̀,
kuù tu di kó oteèntì, di kó kudɔpìkù.
12 Ti Yiɛ̀ nKuyie nyí yɛ̃̀ nti kpɛ́í, kù yóó ti dɔɔ̀mu mɛsɑ̀ɑ̀,
kù yóó dɔɔ̀mu mɛsɑ̀ɑ̀ nyIsidɑyɛɛribɛ kó kuwuɔ,
kɛ́dɔɔ̀ mɛsɑ̀ɑ̀ nhAnɔɔ kó kuwuɔ.
13 Ti Yiɛ̀ nKuyie nyóó dɔɔ̀mu mɛsɑ̀ɑ̀ mbɛ̀ɛ̀ kù dé,
bɛsɑ́m̀pɔ́bɛ̀ nɛ̀ bɛdiɛbɛ̀ bɛmɔu.
14 Ti Yiɛ̀ nKuyie nduɔ́ nkɛ̀ di sṹṹ,
díndi nɛ̀ di bío.
15 Ti Yiɛ̀ nKuyie nkùù dɔ̀ɔ̀ kɛĩ́nkɛ̀ nɛ̀ kɛtenkɛ̀,
kù di dɔɔ̀ mɛsɑ̀ɑ̀.
16 Kɛĩ́nkɛ̀ ti Yiɛ̀ nKuyie nkuù kɛ̀ te,
kɛ duɔ́ nkɛtenkɛ̀ tínti bɛnìtìbɛ̀.
17 Ti Yiɛ̀ nKuyie ndɛ̀ í tú bɛcíríbɛ̀ bɛɛ̀ yó ndɑ sɑ̃ntí,
Bɛdɔmbɛ̀ bɛɛ̀ í yó ndɑ sɑ̃ntí.
18 Tínti biɛ mɛ nyó nsɑ̃ntímu ti Yiɛ̀ nKuyie,
di mmɔ̀nnì nɛ̀ ti bo mbomɔ̀ɔ.
Nsɑ̃ntínɛ̀ ti Yiɛ̀ nKuyie!