142
Wèè kuɔ̀nnɛ̀ mɛsémmɛ̀ kɛ yu Kuyie
Dɑfiti dèntɛ̀ fɛ̀ɛ̀ yɛ̀nfɛ̀ ò bo dìì mɔ̀nnì kutɑ̃dènkù miɛkɛ.
 
N kuɔ̀mmu kɛ yu n Yiɛ̀ nKuyie,
n kù kuɔ̀nnɛ̀mu kɛ kù sɛ̀ɛ́tí.
N kù sɑ̀útínɛ̀mu
kɛ kù nɑ̀ɑ́ n yɛǹcɑɑ̀rìmɛ̀.
N wɛ̃rímú ɔ̃ nkɛ̀ mù dèè, fɔ̃́ɔ̃̀ ɔ̃ n yɛ̃́ kucɛ n yóó tũnnɛ kù,
bɛ̀ n dii ticùɔ̀tì nti kucɛ n kérí kùù miɛkɛ.
Wéntɛ́ m bɑkù yoú bíɛ́kɛ̀ kɛ́yɑ̀,
òmɔù í dɑkɛ n kpɛ́í,
n tɛ̃́nkɛ í mɔkɛ m bo sɔri dɛ̀,
òmɔù í bɔti n fòmmu kpɛti.
 
N Yiɛ̀ nKuyie n kuɔ̀nnɛ̀ fɔ̃́ nwe,
kɛ̀ n tú fɔ̃́ɔ̃̀ tu n kó disɔ̀rì,
n kpɛrɛ dɛmɔu tú fɔ̃́ nwe kɛtenkɛ̀ kiɛ̀ nyĩ́nkɛ̀.
Kéntɛ́ kɛ́keè n dɑbònnì,
n di mɛsémmɛ̀ mmɛ, n dɛɛtɛ́nɛ̀ bɛ̀ɛ̀ n fɛ̃́ũnko,
bɛ̀ kpénnìmu kɛ m pɛ̃ɛ̃tɛ́.
Á n dennɛ dikpetíntou miɛkɛ,
kɛ̀ nní ndɛ́úkùnko ɑ yètìrì,
bɛ̀ɛ̀ wetí bɛ̀ yó nh ɔnnɛ́mu,
bɛ̀ bo yɑ̀ dìì mɔ̀nnì mɛsɑ̀ɑ̀ nhɑ n dɔ̀ɔ̀ mɛ̀.