28
Wèè tɔ̀ɔ́nnɛ̀ mukṹṹ nhò bɑ̀ɑ́mmɛ̀ Kuyie
1 Dɑfiti yɛ̀nfɛ̀.
N Yiɛ̀ nKuyie n kuɔ̀nnɛ̀ fɔ̃́ nwe,
fɔ̃́ɔ̃̀ tu dipèrì dìì n kɑ̃nkɛ́,
bɑ́ ncĩ́ɛ̃́kɛ́ kɛ̀ n kuɔ̀ nkɑ̀ɑ cĩ̀ɛ̃́kɛ́,
n tɑti kudɔnkù nku.
2 Kéntɛ́ m bɑ́ɑmmìi n dɑ bɑ́ɑ́ nyì.
Keè n dɑ yumɛ̀ kɛ tú ɑ n tee.
N yuo n nɔu nsi ɑ cɛ̃sɑ̀ɑ̀tɛ̀ bíɛ́kɛ̀ kɛ dɑ bɑ́ɑ́.
3 Bɑ́ n wɛ̃nnɛ́nɛ̀ bɛyonkubɛ nɛ̀ bɛ̀ɛ̀ dɔ̀ɔ̀ri mɛyɛi,
bɛ̀ɛ̀ ɔ̃ nnɑ́ɑ́ mbɛ kɔbɛ diwɛ̀ì kó tinɑ́ɑǹtì,
kɛ̀ mɛyɛi nnɛ́ píɛ́kɛ́ bɛ miɛkɛ.
4 Dɔɔ̀ bɛ bɛ tɔ̃mmú dòmmɛ̀, bɛ yɛi ndòmmɛ̀,
yietí bɛ bɛ yɛi mbɛ̀ dɔ̀ɔ̀ mɛ̀ bɛtɔbɛ̀.
Duɔ́ nkɛ̀ bɛ̀ dɔ̀ɔ̀ mɛ̀ɛ̀ yɛi ndo bɛ yɔ ĩ́nkɛ̀.
5 Ti Yiɛ̀ nKuyie mbɛ̀ í dɑkɛ ɑ teèmmɛ̀ kpɛ́í
nɛ̀ ɑ pĩ́ mmùù tɔ̃mmú,
ti Yiɛ̀ nKuyie nhɑ bɛ̀ bɔ nkɛ bɑ́ɑ́ bɛ̀ íi.
6 Ti Yiɛ̀ nKuyie nyètìrì ndɛu,
kù kèèmɛ̀ m bɑ́ɑmmìi.
7 Ti Yiɛ̀ nKuyie nkuù n kɑ̃nkɛ́,
kuù tu n kó kudɔpìkù,
n ku n duɔ́ mmɑ́ɑ̀,
kuù ǹ teénnɛ̀ kɛ̀ n yɛ̀mmɛ̀ nɑɑti,
n yó ndiè kɛ ku nsɑ̃ntí.
8 Ti Yiɛ̀ nKuyie nkuù kɑ̃nkɛ́ ku kɔbɛ,
kuù tu tɛcɛ̃kpetɛ̀ kɛ dɛɛrí kù tɑ̃ɑ̃tɛ́ wè.
9 Ti Yiɛ̀ nKuyie ndɛɛtɛ́ ɑ kɔbɛ, fɔ̃́ɔ̃̀ bɛ̀ te,
dɔɔ̀ bɛ mɛsɑ̀ɑ̀, ɑ ntú bɛ kóo cɛ̃nti, ntɔ bɛ sɑ̃́ɑ̃̀.