96
Dentɛ̀nɛ̀ fɛyɛm̀pɑ̀nfɛ̀ Kuyie nkpɛ́í
(Wéntɛ́ 1 Bɛkpɑ̀ɑ̀tìbɛ̀ tɔ̃mmú 16:23-33)
1 Dentɛ̀nɛ̀ ti Yiɛ̀ nKuyie nkpɛ́í nfɛyɛm̀pɑ̀nfɛ̀,
kutenkù kumɔu kɔbɛ dentɛ̀nɛ̀ ti Yiɛ̀ nKuyie nkpɛ́í.
2 Ndiènnɛ̀ ti Yiɛ̀ nKuyie nkpɛ́í, ndɛ́úkùnkonɛ̀ ku yètìrì.
Nnɑ́ɑ́nnɛ̀ yɛwe yɛmɔu tinɑ́ɑǹsɑ̀ɑ̀tì ku dɛɛtímɛ̀ kpɛti.
3 Nɑ́kɛ́nɛ̀ ibotí tɛì ku kó tikpetì kpɛ́í.
Nɑ́kɛ́nɛ̀ yɛbotɛ̀ yɛmɔu ku tɔ̃ndiɛmù kpɛ́í.
4 Ti Yiɛ̀ nKuyie ndɛumu kɛ mɑ̀nnɛ̀ disɑ̃nni.
Kuù duò tikɔ̃m̀bùɔ̀tì kɛ pɛ̃ɛ̃tɛ́ yɛbɔkɛ̀ yɛmɔu.
5 Yɛbotɛ̀ mɔ̀kɛ yɛ̀ɛ̀ bɔkɛ̀ tu siyɑ́ɑ̀bìsí kpɛyɛ nyɛ.
Ti Yiɛ̀ nKuyie nkuù mɛ ndɔɔ̀ kɛĩ́nkɛ̀.
6 Kuwenniku diɛkù nɛ̀ tikpɑ̀tì dɛɛ̀ bo ku borɛ̀.
Tikpetì nɛ̀ tidiɛtì dɛɛ̀ pìɛ́kɛ́ ku cĩ́ɛ̃̀tɛ̀ miɛkɛ.
7 Kutenkù kumɔu kɔbɛ nsɑ̃ntí ti Yiɛ̀ nKuyie.
Ndɛ́úkùnkonɛ̀ ti Yiɛ̀ nKuyie ku kpetì nɛ̀ ku wɛ̃rímú dɛ kpɛ́í.
8 Ndɛ́úkùnkonɛ̀ ti Yiɛ̀ nKuyie nyètìrì.
Di níí ntɔ yɛpɑ̃rɛ̀ kɛ́tɑnnɛ̀ ku cĩ́ɛ̃̀tɛ̀ dɑ̀nkù.
9 Di níí ndò mpɑ́íí kɛ nínkú ti Yiɛ̀ nKuyie nyììkɛ̀,
kutenkù kumɔu kɔbɛ, nkpeutínɛ̀ ku ììkɛ̀.
10 Nɑ́kɛ́nɛ̀ ibotí tɛì miɛkɛ ti Yiɛ̀ nKuyie nkuù tumɛ̀ okpɑ̀ɑ̀tì.
Kɛ̀ dɛ̀ɛ yie nkɛ̀ kutenkù nfííkú só kɛ bɑ́ nkpeutí.
Ti Yiɛ̀ nKuyie nkuù bekùnɛ̀ yɛbotɛ̀ kɛ̀ dɛ̀ wenni.
11 Kɛĩ́nkɛ̀ ɑ́ nyɑ̃nku, kɛtenkɛ̀, diwɛ̀ì ndɑ bo.
Dɑ̀mɛ́ɛ̀rì nɛ̀ dɛ̀ɛ̀ kó dimɑ̀ɑ̀ bo ɑ miɛkɛ yɔ̃ɔ̃tɛ̀nɛ̀.
12 Dikpɑ́ɑ̀ nɛ̀ dɛ̀ɛ̀ kó dimɑ̀ɑ̀ bo ɑ miɛkɛ nhɑunɛ̀.
Titúútì kó dɛtie mpotɛ́nɛ̀ tipíɛ̀tì
13 ti Yiɛ̀ nKuyie nyììkɛ̀, kù kèrínímu,
kù bonímu kɛ bo bekɛ́nɛ̀ kutenkù,
kù yóó bekɛ́nɛ̀ kutenkù kɛ̀ dɛ̀ nwennimu,
kɛ́bekɛ́nɛ̀ yɛbotɛ̀ nɛ̀ timɔ́mmɔnti.