4
Kuyie mbɛnkɛmɛ̀ Sɑkɑrii tɛfitíkɛ̀kɛ̀tɛ̀ nɛ̀ odìfíè kó dɛtie
1 Kɛ̀ Kuyie ntɔ̃nnì dìì n nɑ̀ɑ́nnɛ̀, kɛ̀ dìi wɛ̃tɛní kɛ́ nh entɛ bɛ̀ ɔ̃ɔ̃ entɛ mɛ̀ɛ̀ botí onìtì wèè yɛ̃̀ nkɛ duɔ́.
2 Kɛ̀ dì m bekɛ n yɑ̀ mù, kɛ̀ n dɔ̀: N yɑ̀ tɛsɔɔfitíkɛ̀kɛ̀tɛ̀ ntɛ, kɛ̀ mɛkùɔ̀ ncũɔ̃́ tɛ cuokɛ̀ tɛ yómmɛ̀ kɛ̀ sifitibúkúsí bo sìyiekɛ̀ nɛ̀ dɛ kó iwɛ̃ĩ.
3 Kɛ̀ odìfíè kó dɛtie ncómmú tɛ tɑkɛ́, muù ntɛ bɑkù yoú, mutɛ̃mù ku cɑ̃̀nku.
4 Kɛ̀ m bekɛ Kuyie ntɔ̃nnì dìì n nɑ̀ɑ́nnɛ̀ kɛ dɔ̀: N Yiɛ̀ diɛ m̀bɛnkú bɑ?
5 Kɛ̀ dì dɔ̀: A í bɑntɛ́ dɛ̀ bɛnkúmɑ̀ɑ̀? Kɛ̀ n dɔ̀: N yí bɑntɛ́.
Kuyie ndɔúnnɛ̀ dìì nùù Sodobɑbɛɛdi
6 Kɛ̀ Kuyie ntɔ̃nnì n nɑ́kɛ́ kɛ dɔ̀: Nɑ́kɛ́ ti nnɑ́ɑǹtì Sodobɑbɛɛdi kɛ tú:
Dɛ̀ í tú nɛ̀ o wɛ̃rímú mmu yoo nɛ̀ o kpetì,
dɛ̀ tu nɛ̀ n kó Muyɑɑ́ mmu.
Mí ndi Yiɛ̀ nKuyie Mpɑkɛdɑɑ míì bɛ́i.
7 Ditɑ̃rì diɛrì fɔ̃́ nhɑ í tùɔ̀kɛ dɛ̀mɑrɛ̀ Sodobɑbɛɛdi ììkɛ̀,
ò bo dɑ pɔntɛ kɛ́dɛ́ítɛ́ kɛ́dɛitɛ ditɑ̃́rì
ò yóó cɔ́ɔ́ ndì n cĩ́ɛ̃̀tɛ̀ yómmɛ̀,
kɛ̀ bɛnìtìbɛ̀ ndi sɑ̃ntí kɛ tú:
Dì wenni! Dì wenni!
8 Kɛ̀ Kuyie nyíɛ́ kɛ́ n nɑ́kɛ́ kɛ dɔ̀:
9 Sodobɑbɛɛdi weè pũ̀ṹtɛ́ n cĩ́ɛ̃̀tɛ̀
kɛ̀ weè yóó tɛ̀ dèè.
Kɛ̀ dɛ̀ɛ yié nkɑ̀ɑ bɑntɛ́ kɛ dò mmí nKuyie mmíì ò tɔ̃nko.
10 Wèè do senku Sodobɑbɛɛdi tɔ̃mmú
ò mù ketírí dìì mɔ̀nnì kɛ̀ mù yí dɛu,
dɛ̀ bo ò nɑrikɛ ò bo yɑ̀ dìì mɔ̀nnì ò mɑɑ́mɛ̀ n cĩ́ɛ̃̀tɛ̀.
11 Kɛ̀ n wɛ̃tɛ kɛ́bɛ́innɛ̀ Kuyie ntɔ̃nnì kɛ dɔ̀: Odìfíè kó dɛtie ndɛndɛ dɛ̀ɛ̀ còḿmú tɛfitíkɛ̀kɛ̀tɛ̀ tɑkɛ́, muù ntɛ bɑkù yoú, mutɛ̃mù kucɑ̃̀nku, dɛ̀ bɛnkú bɑ?
12 Kɛ̀ n yíɛ́ kɛ́bekɛ́ kɛ dɔ̀: Kɛ̀ odìfíè kó ibɑkɛ ìdɛ́ì ìì mɛ mmɔkɛ isɔɔkũɔ̃ti, kɛ̀ odìfíè kó mɛkùɔ̀ nyì tũ̀ nkɛ do mmɛsɔɔ, ndɛ̀ bɛnkú bɑ?
13 Kɛ̀ dì dɔ̀: A í yɛ̃́ dɛ̀ bɛnkúmɑ̀ɑ̀? Kɛ̀ n dɔ̀: Áɑ̀, n yiɛ̀, n yí yɛ̃́.
14 Kɛ̀ dì dɔ̀: Bɛnìtìbɛ̀ bɛ̀dɛ́bɛ̀ mbɛ n tɑ̃ɑ̃tɛ́ bɛ̀ kɛ̀ bɛ̀ cóu mmɛkùɔ̀ nkɛ̀ bɛ̀ còḿmú Kuyie Mpɑkɛdɑɑ ììkɛ̀.