7
येशु राङ ख्युइ भाइतेबा
1 हतिच्येला येशु गालिलला राङ युकिन त्येसोङ हिन्नाङ खो यहुदियाला ढोसोम मेतालो चिचालानाना यहुदि आङकिङान खोला सोयापयि च्युइला होतो।
2 तेहि यहुदिबे छाप्रो कालापसोल धुनला होतो।
3 हतिचाला येशुयि भाइतेबे खोला नाइरेलो, “धि सा ताङदे यहुदियाला क्यु, राङ ख्युइ क्याक्याइबि लाइतेबा ख्युइ लोब्टुतेबे थोङोङ।
4 सु मियि तहोन तुइच्याइ धोप्पा किन, हति फाला लाइ मिकिता। ख्युइ धि लाइतेबा किना संसारला थोङदु छ्यु।”
5 चिचालानाना ख्युइ भाइतेबे याङ खोला हिछे मिकितालो।
6 येशुयि हतिबाला नाइसोङ, “ङाहि थारका भेला तरह लेलेबा मेता, हिन्नाङ खि चालाता पोरो भेला थारका हिना।
7 संसारयि खेला मिका कि मिङ्युइबा, हिन्नाङ ङाला मिका किन, चिचालानाना संसारयि भारेला ख्युइ लाइ तेबा अल दु नाइरे ङा साछि तेरच्याइ।
8 खे धि कालापसोङला क्यु। ङा धि कालापसोङ ला मिढो चिचालानाना ङाहि भेला थाल्ला थु पुरा च्युच्युङा मेता।”
9 हतिबाला जु नाइरे खो गालिलला राङ त्येसोङ।
कुरयि कालापसोलला येशु
10 हिन्नाङ ख्युइ भाइतेबा कालापसोलला पुते खो याङ मनस्याङ ला माना, हिन्नाङ येशु हिबिनहिबिन पुइसोङ।
11 कालापसोलला यहुदि आङकिङनबे खोला फाकिन त्येतु, राङ “खो काँहा होतो?” नाइरे ढुन्दु।
12 मि झोमयि उइला ख्युइ भारेला ह:लाइ धुलो। रेन नेन धुलो, “खो ल होतो।” स्यानयि नेन्दुलो, माना, “ख्युइ मि तेबाला आच्यामाच्या सुन्दु।”
13 हिन्नाङ यहुदि आङकिङानतेबा झिरे सुङ धुनला ताम मिनालो।
14 कालापसोलयि उइला येशु मोनलाम क्यासि खिमला नाङला स्युसोङ, राङ छोइ पिन्सोङ।
15 यहुदिबा हा:लाइरे जु नाइसोङ, “च्याङ छोइ मालाबि धि च्हिरु क्याइरे धि झोम छोइ स्येबे?”
16 तेहि येशुयि हतिबाला जवाक तेरिन राङ नाइसोङ, “ङाहि छोइ ङाहि माना, हिन्नाङ कजसुबे ना, सुइ ङाला चाँरे।
17 तेम्बारे सुङ मि कजसुबे धोप्पा ङ्यान्सोम होएना, ङाहि छोइ कजसुबाने ना, कि ङाहि चाने ना खो खुरि हा:कोङान ना।
18 सुइ रेँ चाने नेन, खो खुरि सम्मान फाकिन, हिन्नाङ सुइ रेँ चोँङान यि सम्मान फाकिन हति तेम्बाना, राङ खोला चुन मेता।
19 च्हि मोशायि खेला ठिम मापिन्सोए? हिन्नाङ खे सुइयाङ हति ठिम मिङ्याना। खे ङाला चिचाला सोए च्युइ किन?”
20 मि झोम यि जवाक पिन्सोङ, “ख्योएला ढे कालदु?” “सुइ ख्योएला सोए च्युइ क्यासुइ?”
21 येशुयि जवाक तेरिन राङ हतिबाला नाइसोङ, “हा:लाइयापयि लाइ झि ङाहि क्याइरे, तेहि खे पोरो हतिला हा:लाइन्दु।
22 मोशायि खेला खतनायि ठिम पिन्दु (यिनज्याइता हति मोशाने ता माना हिन्नाङ ताङबुइ कानाने ना), तेहि याङ ङालसुइ ङिनला खे मिला खतना किन्दु।
23 मोशायि ठिम मासि मायोङ नाइरे तेम्बारे मि सुयाङ ङालसुइ ङिनला खतना क्याइ ना, ङाहि ङालसुइ ङिनला मिझि टाक्तु च्युक्ते नाइरे च्हि खे ङाला स्येताङ किनाइ?”
24 च्ये ताइरे माना, हिन्नाङ ल क्याइरे तेम्बा ल अल फे।
च्हि खो ख्रिष्ट हिनाइ?
25 यरुश्लेमला मि रेनरेनयि नाइसोङ, “च्हि धि खो मानाइ, सुला यहुदि आङकिङानतेबे सोच्याइ फाकिन्दु?
26 तेहि, धिनि मनस्याङ क्याइरे ताम नेन दु, हिन्नाङ हतिबा धिला च्याङ मिना! च्हि धि राङ ख्रिष्ट हिना नाइरे आङकिङानतेबे तेम्बारे हा:कोरेइ?
27 हिन्नाङ जब ख्रिष्ट हुन, खो काँहा होतो नाइरे सुइ याङ हा:मिकुवा।” हिन्नाङ ङेला छ्या होतो धि मि काने लेलेबा ना।
28 तेहि येशुयि यरुशलेम मोनलाम क्यासि खिमला छोइ लोभि तुइना, ख्युइ क्ये छेया क्याइरे नाइसोङ, “खि ङाला ङोस्येयिन, राङ ङा काने लेलेबाना, हति याङ छ्या होतो। ङा ङारि धोप्पि लेलेबा माना हिन्नाङ सुइ ङाला चाँरे हति तेम्बा ना। खि खोला ङोमिस्येबा
29 हिन्नाङ ङाहि खोला ङोस्येयिन, चिचालानाना ङा खोने लेलेबाना राङ ख्युइ ङाला चाँचाँबाना।”
30 हतिचाला खि खोला सुङज्याइ पाते, हिन्नाङ सुइ याङ लाक्पा माक्याङसोङ, चिचालानाना ख्युइ भेला तरह लेलेबा मेता।
31 हिन्नाङ मि झोमयि मि लेइ ख्युइ थोला हिछे क्याइसोङ। हतिबे नाइसोङ, “जब ख्रिष्ट हुन, हतितुइना च्हि धि क्याक्याइबि धि हा:लाइयापयि लाइले महा हा:लाइयापयि लाइ ख्युइ क्यायोङ ङे च्हि?”
येशुला सुङदु कोराबाला चाँरेलो
32 मि झोमयि येशुयि भारेला हल्ला क्याक्याइबा फरिसिबे थोइसोङ। तेहि घोबा पुजारितेबा राङ फरिसिबे तुमयि खोला सुङयापयि चाला कोराबातेबे तुम झि चाँसोङ।
33 येशुयि नाइसोङ, “तरह हाङ टिझिथु ङा खे ङ्याबो हुन, हतिच्येला ङा ङाला चोँङानयि तेहा ढोज्याइ।
34 खि ङाला फेङान ना हिन्नाङ खुङान मानाना, राङ काँहा ङा हुन, खे हतिया होङ मिङ्युइबा।”
35 तेहि यहुदिबे नाङला नारे क्याइसोङ, “खो काँहा ढोज्याइ लुइ, राङ हु खोला ङान ठेङान माना ना? च्हि खो ग्रिक भजारयि यि उइला थोरते ताताति यहुदिबे तेहा पुते ग्रिकबाला छोइ तेरसोम किन दुये?
36 ख्युइ नानाइबि धि वचन चिना? ‘खि ङा ला फेङान ना, राङ खुङान मानाना, राङ काँहा ङा हुन, खे होङ मिङ्युइबा?’ ”
मिजे तेरङानयि छुयि लुङबा
37 तेहि कालापसोलयि ङिमा च्येमाते, मदलब कालापसोलयि ङोधो ङिनला, लाँरे येशुयि क्ये छोम्मुवाला जु नाइसोङ, “तेम्बारे सुङ खा कोम ना ङाहि तेहा सअ राङ थुङ।
38 सुइ ङाला हिछे क्याइ, पवित्रशास्त्राला नानाइबाला च्वरा क्याइना ‘ख्युइ टोपि तिङने सोम्बो छ्युयि लुङबा थोन्देहुन।’ ”
39 हिन्नाङ ख्युइ धि ताम पवित्र आत्मायि भारेला नानाइबाना, काङ पवित्र आत्माते ख्युइ थोला हिछे किङानतेबे खुबाला छेलसोङ। चिचालानाना पवित्र आत्मा थाल्ला थु पिपिना मेतालो, चिचालानाना येशुयि छे ङाला थु तेतेका मेतालो।
मियि उइला पेपेया
40 धि ताम थोइङान मि रेन रेनयि जु नाइसोङ, “धिनि तेम्बारे ङोन्सेखिलङान हिना।”
41 स्यानतेबे नाइसोङ, “धि ख्रिष्ट ना।” हिन्नाङ रेनरेनयि नाइसोङ, “च्हि ख्रिष्ट गालिलने हुनाइ च्हि?
42 च्हि पवित्रशास्त्रयि मानाइ दुये च्हि, कि ख्रिष्ट दाउदयि ख्युइने राङ दाउदयि भजार बेथलेहेमने हुन?”
43 हतिचाला येशु चाला मितेबे उइला तुम ङि खा पे सोङ।
44 हतिबे नाङने चोमयि खोला सुङ च्युइ क्याइसोङ, हिन्नाङ ख्युइ थोला सुइ याङ लाक्पा माक्याङालो।
यहुदि आङकिङानबे हिमिछे
45 तेहि मोनलाम क्यासि खिमयि कोराबातेबा घोबा पुजारितेबा राङ फरिसितेबे तेहा लेप्सोङ। हतिबे हतिबाला नाइरेलो, “खि हतिला चिचाला माख्योँबा?”
46 कोराबातेबे जवाक पिन्सोङ, “हति मि च्वरा सुइ याङ नामयाङ मानाइसोङ!”
47 फरिसिबे हतिबाला नाइसोङ, “खे याङ ख्युइ तामला भुलि च्युङसुइ कि च्हिरु?
48 च्हि आङकिङान आथावा फरिसिबे नाङने सुइ याङ ख्युइ थोला हिछे क्याइ दुये?
49 हिन्नाङ धि मिझोम, सुइ मोशायि ठिम हा:मिकुवा, हतिला कजसुबायि छार चुचुबा हुन।”
50 हतिबे नाङने च्हि फरिसि सुइ मिन निकोदेमस ना, सु ताङला लाम्मा झि येशुयि तेहा लेप्सोङ, ख्युइ नाइरेलो,
51 “च्हि हुइ ठिमयि ताङस्युवा मिति नानाइबा माना राङ हति च्हि क्याइरे नाइरे हा:माकुवा हतिला दोषि नाज्याइ खुकिनाइ?”
52 हतिबे खोला जवाक पिन्सोङ, “च्हि ख्योए याङ गालिलयि हिनाइ? पवित्र शास्त्रा पाते तेहि, राङ तेहि खि थोङान ना, कि गालिलने ङोन्सेखिलङान मिथोना।”
53 तेहि पोरो राँ राँसि खिमला पुइसोङ।