ACTS
SOLCHAHHO PATHEN NATOH
Mijouse dinga Kipana Thupha
Acts lekhabu sung thu umdan
Jesu Christan athi nungin jong houbung masaho hinkhoa konin natoh anajom nalaiyin chule tukhang jengin jong amite mangchan na atong jing nalaiyin ahi. Solchah ho natoh lekhabu hi Lhagao Theng thahatna jal'a seijui masahon Jesu thuhil anabanjop nau thusim ahi. Hiche thusim hi eiho dinga kitilkhouna ahin, hichun houbung hi hahsatna tamtah um jongleh Pathen'in apuihoi jing ding ahi tichu eihilun ahi. Houbung kikhelna, khantouna, chule halna hi mihem natoh vang hilouva Lhagao Theng panhu navanga joh ahi tijong eihilun ahi.
Lekhabu jihpa chule akijih kum
Hiche lekhabu hi Luke in ajih ahin, AD 63-70 kikah sunga anajih ahi.
Koiho dinga kijih ham?
Thusim jihthem khat hinan, Luke in hiche lekhabu hi Theophilus (Pathen ngailupa) henga Jesu Christa thodoh jouva thilsoh ho anasut ahi. Luke in kidangtah a houbung khantou thu le, thunei vaihom ho henga houbung thudol hilchetna, ahilou le seijui masaho tahsan thudol ahilchetna lekhabu ahi. Chujong le Luke in Lhagao Theng in Juda te le Chidang Namdang te kikah a kihetkhelna asuhbeina thusim jong asei nom ahi.
1
Luke thuphondoh
1 Theophilus, ka lekhabu masa-a kahin sei chu, Jesu thilbol le thuhil kipattil thudol jouse le
2 Lhagao Thenga konna alhendoh solchah ho thu apeh jouva pat ama van'a lahtouva aum ni gei thu ahi.
Jesu van a akaltou
3 Chuche thingpel chunga athia athodoh jou nisomli sung chun, ama solchah ho henga akilah jin, chule ama ahing monge ti chu photchetna tamtah avetsah jin, chuleh Pathen Lenggam thudol aseiyin ahi.
4 Chuin solchah ho toh anehkhom laiyin, aman amaho chu thu apen, “Kana seipeh bangun Pan akitepna thilpeh ahinsol masangsen nang hon Jerusalem dalha hih un.
5 John in twiya baptize na chansah u ahin, ahin tu apat nikho phabep jou le nangho Lhagao Thenga baptize nachan ding'u ahi.” ati.
6 Hichun solchah ho chu Jesu toh aumkhom pet un, ama hon adongun, “Pakai, Israel te chamlhatna ding leh alenggam nakiledoh sah kitna ding phat chu hitam?” atiuvin ahi.
7 Aman adonbut in, “Anikho leh aphat chu Pa changseh thaneina a um ahin, nangho hetding dol ahipoi.
8 Ahinlah Lhagao Theng nachung uva ahung chuh tengleh nang hon thahatna nanei ding'u ahi. Chutengleh nangho Jerusalem'a, Judea gam'a, Samaria gam, leh leiset chung pumpia kathu hettohsah a napan ding'u ahi,” ati.
9 Thu hicheng chu asei jouvin, ama hon avet jing laiyun ama chu meiloma lahtouvin aumin ahileh ama hon amupha tapouvin ahi.
10 Chutia ama hon van lam'a lahtouva aumpet avet jing laiyun pon-banga kivon mini alah uvah ahung ding lhonin,
11 “Galilee mite, ibola nadin uva vanlam navet jingu ham? Jesu nangho koma konna van'a lahtouva aum banga hi nikhat le vanna konna hung kile kit ding ahi!” ati lhon'e.
Judas khel'a seijui khat kilheng
12 Chuin solchah ho chu Jerusalem'a konna mile keh a gamla Olive mola kon chun Jerusalem'ah ahung kile tauvin ahi.
13 Jerusalem ahung lhunun aumnau inchung langah akal touvun ahi. Amaho chu: Peter, John, Jacob, Andrew, Philip, Thomas, Bartholomew, Matthew, Jacob (Alphaeus chapa), Simon (Zealot), chule Judas (Jacob chapa), ahiuve.
14 Amaho chengse hi Jesu nu Mary leh numei dang phabep toh, Jesu sopite phabep toh akikhomun gunchu leh lungkhat tah in atao jom jing tauve.
Matthias in Judas akhel
15 Jesu tahsan mipi jakhat le somni akikhop khom laitah uvin Peter adingdoh in,
16 “Sopi teho, Jesu manho lamkaiya pang Judas thudol hi, kum sottah masanga Lhagao Thengin Leng David kam'a ana phondohsa Pathen Lekhabua thu chu guilhungah ahi.
17 Ijeh-inem itileh Judas chu eiho lah a khat ahin, hiche lhacha hina jong hi changah ahi,” ati.
18 (Aman khan gitlou man sumin gambeh khat achon, akhupboh in achun atumpi apohkeh in agil jouse ahung dohtan ahi.
19 Judas thi thu hi Jerusalem mite jouse koma ahung kithangsoh tan ahileh ama hon hiche gambeh chu Aramaic paovin Akeldama asah tauvin, hichu Thisan Gambeh tina ahi.)
20 Peter in aseijom kit in, “Psalm lekhabua kimu bangin ‘Ama In chu onghen, koima cheng hihhen, chuleh ama panmun chu midang khat changhen,’ ati.
21 Hijeh a chu Judas panmun khel ding mikhat ilhen ding'u ahin ama chu Pakai Jesu toh iumkhom lai uva pat a eiho lah a um jing khat hi ding.
22 John'in baptize achansah jouva pat eiho lah a konna Jesu lahtouva aumni geiya eiho lah a lhajing hi ding, ama chu Jesu thodoh thudol hettohsah dinga eiho lah a pang ding ahi,” ati.
23 Chuin mini: Barsabbas kiti Joseph (Justus tia jong kihe) le Matthias chu alhengdoh un,
24 Amaho ataovun, “Vo Pakai, nangma mijouse lungthim hesoh nahi,
25 Hiche teni hi koijoh in Judas khel'a solchah na atoh ding ham nei hetsah uvin, ajeh chu Judas chun hiche solchah natoh hi alhatan ahi.”
26 Chuin ama hon vang asangun ahileh Matthias chu solchah som le khat ho lah a akisimtha tan ahi.
Solchah ho Lhagao Thenga adimu