EZRA
LEKHABU
Ezra Lekhabu Sung Thu Umdan
Ezra lekhabua kon kimu, vannoi kivaihomna lenpen ahitoh kilhon'in, nam mite akichon nau thudol aseijin ahi. 539 BC in Babylon lenggam chu Medo-Persia khutnoija anaum in, hichu gamchom’a kon galjam Judah te dingin lungmon umtah ana soh in ahi. Hiche lekhabu hin Judah te gam chom apat akile kit uva Jerusalem Hou-In asahphat nau thudol jong aseijin, chule vannoi thilsoh jouse chunga thaneipen Pakai ahi, tihi Ezra in aphongdoh e.
Ezra Lekhabu Jihpa Chule Ajih Kum
Mi kimkhat seidan in Ezra in Nehemiah lekhabu jong ajih ahi atiuvin, chule Ezra le Nehemiah jihpa hin 1 & 2 Chronicles jong ajih ahi, tin thuchaina asem un ahi.
Hebrew Bible dungjuijin Ezra le Nehemiah hi akigom khomin ahi. Hichu 440 BC kum’a kijih chai ahi.
Thusim Um Dan
Kipana Thupha! Kum sottah akichou doh nung un Judah ten Cyrus kiti Persia mia kon'in Babylon ana jouvin, chuin Judah te Jerusalem akile uva, Hou-In sah abanjop diuvin phalna apen ahi.
1
Cyrus In Soh Channa Akon Akile Kitna Diu Aphalpeh
1 Persia lengpa Cyrus vaipoh kum masapen chun Pakaijin Jeremiah kom'a ana phondoh thu chu ana guilhunsah tan ahi. Pakaijin Cyrus lungthim ana suthouvin alenggam pumpia thuphon khat simphong dingin ana thot doh tan ahi.
2 “Persia lengpa Cyrus thupeh chu hiche hi ahi:
Pakai van Pathen'in leiset chunga lenggam jouse hi keima eipe tan ahi. Aman Judah gamsunga Jerusalem'ah ama dinga Hou-In khat tungdoh dingin eingansen ahi.
3 Mi koi hileh ama mite ho jouse chu Jerusalem’a nache theiyu ahitan, nangho Jerusalem’a nacheuva Pakai Israel Pathen Jerusalem min'a nahou pau Pakai Hou-In chu naga sah phat diu ahi. Chule Pathen'in naumpi uhen!
4 Amite ahingdoh tua hing nalai jouse chu hoikom mun'a khopem hijongleu, akhopem nau gam'a miten sana le dangka a ahin kithopi diu, thilto le gancha jong apeh diu, Jerusalem khopia Pathen Hou-In sahdoh teina dinga deichom'a athilto diu kalval'a hijatpi chu ahinpeh tha diu ahi nalaiye,” ati.
5 Hijou chun Pathen'in thempu ho leh Leviho lungsung ahin choh thouvin, Judah leh Benjamin phung lamkai ho Jerusalem a acheuva Pakai Hou-In gasapha dingin asol tan ahi.
6 Aheng akom hon apanhuna in sana le dangka, thil le lo chuleh gancha jong apeuvin chuleh akholjin nauva acholam diuvin jong apeuvin ahi. Ama hon acham cham'a ahin phaldoh u chung chonin thil manlu tah-tah jong tamtah apeuvin ahi.
7 Lengpa Nebuchadnezzar in Jerusalem Hou-Ina anakoi khontheng ho jong chu Cyrus lengpan amaho pathen hou-in a kon'in ahin ladoh tan ahi.
8 Cyrus in Persia sumchingpa Mithredath chu hiche thil ho jouse chu asimtoh in Judah gam'a kilekit ho lamkai pa Sheshbazzar khut a apelut tan ahi.
9 Noija ho hi hichea thil kilepe ho chu ahi:
| sana kong | 30 |
| dangka kong | 1,000 |
| gimnamtui lhutna lheng | 29 |
|
10 sana khon | 30 |
| dangka khon | 410 |
| adang-dang | 1,000 |
11 Hicheng chu abonchan sang nga le jail alhingin ahi. Sohchang mite Babylon gam'a konna Jerusalem geija ahintol tou chun Sheshbazzar kitipan thilkeo hijatpi hi ahintol tha tan ahi.