3
Maicham Athah Tundoh Kit U
1 Lhasagi ahunglhin toh kilhon'in Israel te chu ama-ama khopia ahung chenglut tauvin ahi. Hichun Israel mipite jouse chu lungkhat tah in Jerusalem’ah ahung kikhom tauvin ahi.
2 Hichun Jehozadak chapa Jeshua chu athempu chan khompiho Shealtiel chapa Zerubabel leh a insung mite toh ahung kitho khom uvin, Israel Pathen maicham chu ahin sapha tauvin ahi. Pathen mipa Mose thuhil banga pumgo thilto chu Pakai maicham'a asem got u ahi.
3 Israel te chun amun a ana cheng saho chu ginna anei vangun maicham chu asempha uvin ahi. Hijou chun ama hon jingkah nilhah in Pakai maicham achun pumgo thilto anabol jingun ahi.
4 Ama hon Lhambuh Kut abol'un, hichu Mose dan dungjuiya niseh le anikho a ngaichat dol'a pumgo thiltoa kilhaina ding jong chu atoh jingun ahi.
5 Pakaijin agonpeh u dungjuijin, angaija pumgo thilto dinga apeh diu ahin lhathah jousea kibol thilto ding ahin chuleh kumlhum seh a kut ho dingin, ahin tohdoh jiuvin ahi.
6 Lhambuh Kut kipat masang nisom le nga channi leh thempu hon Pakai kom’ah pumgo thilto a dingin kilhaina anei masa jiuvin ahi. Hiche hi Pakai Hou-In kisah masang’a govam kilhaina chu ana pan tauvin ahi.
Mipin Hon Hou-In Asah Phat Kit U
7 Hijou chun mipi ten thih kheng them ho leh thingthem bol ho athalah un chuleh Tyre leh Sidon a kon'in thingtum ho ahinpo uvin, aman dingin neh le chah lengpitwi le olive thao ana peuvin ahi. Thingtum ho chu Lebanon mol'a kon'in ahinpo uvin Mediterannean Twikhanglen pang juijah Joppa geijin akitol lhah sah un ahi. Hiche hi Cyrus Lengpa phatsahna noiya abol'u ahi.
8 Tun Jerusalem ahunglhun jou u kumni le lhani channa in Pathen Hou-In sah akipan tauvin ahi. Natongho chu sohchanna a konna hung potdoh jouse le Shealtiel chapa Zerubababel chuleh Jehozadak chapa Jeshua leh athempu chanpi hotoh chuleh Levi te kum somni lhing ho leh aval ho chu Pakai Hou-In sahphatna in alamkaijin ana pangun ahi.
9 Pathen Hou-In saho chu Jeshua le achate chule asopi te ho Kadmiel le asopiho chujongleh Hodaviah chilhah ho jouse avesui jin ana pang un ahi. Hiche anatoh nauva hin Henadad insung leh Levi te ana kithopi uvin ahi.
10 Hiche insaho hin Pakai Hou-In chu abul ahin tundoh phat uvin thempu hon avon’u ahin kivon’un sumkon mut dingin amun cheh u ahi kilo uvin ahi. Hiteng chuleh David lengpan ana semtoh bangin Asaph chilhah ten Pakai thangvahna in atumging thei ho ahin suging uvin ahi.
11 Thangvah pumin Pakai vahchoila ahin sauvin ahi:
“Ama hi apha behseh jenge!
Aman Israel te alungsetna hi tonsot a ding ahi!” atiuve.
Hijou chun mipi chun Pakai Hou-In leibul chu ahung kitundoh jeh chun Pakai thangvahna in hasap in asam'un ahi.
12 Ahinlah thempu hon atehse hou leh Levi te chuleh phung upa dang ho Pakai Hou-In masa ana mukha jouse chu hakan akap un ahi. Mipi adang ho vang chun kipah tah in hasap in asam'un ahi.
13 Akipanau husa leh mipi phabep kana ogin chutoh kigom'in hatah in ana thongin ahileh gamla tah a umhon jong ajapha uvin ahi.