5
1 Hiche phat laitah chun Haggai themgao le Iddo chapa Zechariah themgaovin Jerusalem leh Judah gamsunga Judah te lah a gaothu ana sei lhon'in ahi. Amanin achung uva vaihom’ah Israel Pathen min'in gaothu anasei lhon'in ahi.
2 Shealtiel chapa Zerubbabel leh Jehozadak chapa Jeshua in amani thusei ajahdoh lhon phat in Jerusalam Hou-In sahphatna natoh apan lhon tan ahileh hiche themgao teni jong chun akithopi lhon'in ahi.
3 Ahin Euphrates vadung lhumlam gamkaiya gamvai popa Tattenai leh Shethar-bozenai chuleh atoh khompi ho cheng chu gangtah in Jerusalem'ah ahung’un ajah uva, “Hitia hi Hou-In sahphatna dinga koipen in thu napeh uva, amun jong hi koi thusah a nagon toh uham?” atiuve.
4 Hiche Hou-In sahna a kimangcha ho chu koi-koi ham tin amin u jong adongin ahi.
5 Ahivangin amaho chu a Pathen'un avetsui jing jengu ahijeh in, hiche thudol Darius lengpa henga akiseipeh a chutengleh aman athu umchan dingdol ahinle thot kit tokah in a Hou-In sah natoh uchu ana ngadeh pouvin ahi.
Tattenai In Darius Lengpa Lekha Athot
6 Tattenai gamvaipo pa leh Sethar-bozenai chuleh Euphrates lhumlam gamkaija vaihom a pang jousen Darius lengpa chu hiti hin lekha ana thot un ahi:
7 “Darius lengpa kajanau salam kahin peuve.
8 Lengpa nangman nahet tei dia kadei u chu ahile, Judah gamsung kaga khol’un, loupitah a Pathen Hou-In asahnau mun kaga phah uva thil umdan kamu hou hi nahet tei ding ngai kasauve. Hiche kisahphat ahin song phatah a kikheng ho akimangin, apal jong thing apum kikehso ho in akigen pantan ahi. Hiche anatoh uhi ahapan jeh un amachal lheh jengun ahi.
9 Keihon alamkaiho jah a hiche Hou-In hi sahphatna ding leh amun gontohna ding’a hi koipen in phalna napeh uham tin kadongun ahi.
10 Chuleh alamkai hou min jong kahin hetsah theina diuvin kadongun ahi.
11 Ama hon hiti hin eidonbut un ahi, “Keiho hi lei leh van Pathen lhacha te kahiuve, chuleh kum tamtah masanga Israel leng lentah khat in ana sahdohsa Hou-In chu keihon kasah phat kit u ahi,” atiuve.
12 Ahinlah kapu kapa teuvin van Pathen chu ana sulunghang’un ahileh aman Babylon lengpa Nebuchadnezzar khut a ana pehdoh uva, aman Hou-In chu asuhset a amaho chu Babylon a sohchang dinga ana koi ahi.
13 Ahivangin, Babylon lengpa Cyrus in ama leng chan jou kumkhat sungin hiche Pathen Hou-In hi sahphatna dingin thupeh ana neiyin ahi.
14 Nebuchadnezzar in Jerusalem a Pathen Hou-In sung’a konna ana lahdoh, sana leh dangka khon, Babylon Hou-In a anakoi ho jong chu ana nung lahdoh in ahi. Hiche khon ana ladoh ho chu, Cyrus lengpan Judah gam vaipoa ana nganse Sheshbazzar khut ah ana pelut in ahi.
15 Lengpa chun hiche khon ho chu Jerusalem a ale thahlut kit ding le Pathen Hou-In chu amun ma-ma a chu sahphat kit dingin thu anape in ahi.
16 Hijeh chun Sheshbazzar chu ahungin Jerusalem ah Pathen Hou-In mun chu ahung semtoh tan ahi. Hichea pat a chu amipi ten ana atoh pat u ahitan ahinla ana jolou laiyu ahi.
17 Hijeh chun lengpa lunglam ahi ding leh, Jerusalem a Pathen Hou-In chu sahphatna dinga thupeh umham umlou ham ti Babylon lengte thusimbu chu kikholchil leh tia kanga u ahi. Chujou tengleh lengpan hiche thudol'a na lunggel chu neihin hetsah diuva kahin ngeh u ahi,” atiuve.