1 Mose ding'a anupa pa, Jethro Midian thempupa'n Mose le asopi Israel mite chung'a Yaweh natoh thil kidang abol ho ajadoh tai. Amapan jong Pakaiyin Israel mite Egypt gam'ma kon'na ahin lhatdoh chu ki dang asaval jeng'in ahi. 2 Mose'n jong anupa pa, Jethro heng'a ajinu Zipporah le achapateni chu asol'in, chuin ama hon insung'a apuilut uvin ahi. ✡ 3 Mose chapa pengmasa min chu Gershom ahin*, achapa apen lhah chun Mose'n hiti hin aseiye. “Mi gamsung'a khosa kahi,” tia ana minsah chu ahi. ✡ 4 Ani channa achapa min chu Eliezer* asah in, Mose'n hiti hin aseije, “Keima khangluiya pat ka Pathen chun Pharaoh chemjam akon eihuh hing ahi,” tia asah ahi. 5 Mose nupa pa, Jethro chu Mose vil lin gammang lam'a ahung tan ahile. Aman ajinu le achapa teni chu ahin puijin, Mose le amiten gamthip lah Pathen molsang kom'a ngahmun akisem nau mun'na ahinpha taovin ahi. 6 Jethro'in jong Mose chu thu athot tan, “Keima Jethro nanupa pa kahin, keima nangma vil'a najinu le na chapa teni jaona hung kahi,” ati. 7 Mose jong pamlam'a agache doh'in anupa pa chu agakimu pitai. Ama jong akum lhan abeng achop peh tan ahi. Hiti chun khat le khat akilem touvin Mose chen'na ponbuh sung'a alut taovin ahi. 8 Mose'n jong anupa pa heng'a Pakaiyin ichan geiya Egypt gam'a konna Israel mite chung'a na-ahintoh ham ti thudol'a aseipeh'in ahi.Chule lamkah jouse'a thohgim hahsa athoh nau le agentheinajouseo abonchan anupa pa heng'a asei peh in ahi. 9 Pakaiyin Israel te ichan geiya Egypt mite khut'a kon ahin panpi hitam tithu le ahin huhdohna thudol phatah'a ahet chet phat'in alungthim akipah lheh jengin ahi. 10 Jethro'n hiti hin aseiye, “Pathen thangvah in umhen.” “Ajeh chu Aman Pharaoh le Egypt mite akonna nahin huhdoh jal in. Henge, Yaweh bou chu ahiye Egypt mite thanei na konna na huh doh uva! ati.” 11 “Tun keiman ka hechen sel taije, Yaweh hi pakai jouse lah a thanei chung nungpen Yaweh ahiye. Ajeh chu Aman aban thahat apan'in Egypt mite akiletsah nauva kon'na ahin huhdoh ahi,” ati. 12 Chuin Jethro ama chu Mose ding'a anupa pan jong Pathen angsung'a pumgo thilto kilhaina asem in ahi. Aaron le Israel sung'a upaho ahung uvin Pathen angsung'a kilhaina ankong chu asoh khom uve. 13 Ajing nikhon Mose'n jong atouna a kon'nin mipi ho thutan ding'in ahung doh tan ahile, mipi ho jong chu nilhum keijin ading tauve. 14 Mose nupa pan, hitia mipi ho chung'a athilbol amudoh phat'in aman Mose heng'a aseijin, “Hiche laimunna hi ipi mong mong tongdoh inge nati ham? Ipi bol mong inge natia jingkah'a kipat nilhah lamchan geiya mipi ho hi nahiti din sah hitam?” ati. 15 Mose'n adonbut'in ajah'a, “Ajeh chu mipi ho hi kaheng'a hung uva Pathen akon kavai hopna hi akilah mang kigot uva ahi.” 16 “Amaho hi ahung kinah komu le kaheng ahin jonlut jiuvin, chuteng keiman thu katan peh jiuvin, Pathen akon nun leh khan dan toh kitoh'a Pathen phatsah bang'a ka hilchen jiuva ahiye,” ati. 17 Chuin Mose nupa pan ajah aseiyin, “na thilbol hi adih poije!” ati. 18 “Mipi ahin nangma nahin na bon'uva na gimna diuva ahi bouve ajeh chu nathilbol hi abeipon ahi. Nangma changseh adin thi lhah satah khat ahiye,” ati. 19 “Tun keiman kahil nahiye, ajeh chu keiman kultah'a kahil nahi ngaijin lang Pathen'in naum pijing hen. Mipiho jouse khella hi Pathen ansung'a ding jing nahin, akibaotam nao jouse Pathen angsung'a na selhah ding ahijoi,” ati. 20 “Mipiho hi Pathen akon chonna Danho le phatsahna ho hilchen in lang,hichu aboltei na diuva na thumop'a chule ajui cheh na diuva jong nasei ngaija ahi.” 21 “Ahinlah mipi ho lah akonna thilbol thei miman tam, Pathen ging, nehguh chah guh beija natong thei ding nalhen doh ding ahi. Amaho chun mijakhat lah hihen sangkhat lah hihen jakhat lah hijong le aloi loija vaihomma na pansah ding ahiye.” 22 “Phat tinna mipi thutanna napan sah diu, thupi diuva thutanna ding aumvang le nangma heng'a hinpuiyun tin, thuneo hojouse vang chu ama hon ama chamma atan lhah jeng theiju ahi. Nangma dia jong agom lam hijo ding chule ama hon jong nangma nahin kithopi nau jong ahi,” ati. 23 “Hichengse hi na jui'a ahile, nangma chunga Pathen'in toh ding nahin peh teng doujou'na tha naneijoh ding chule mipi hon jong lungmoung sella ama ama in cheh akile jut thei diu ahi.” 24 Mose'n jong anupa pa Jethro thusei chu angaijin, aman aseibang bang'in aboltan ahile apha lheh jeng tai. 25 Israel mite lah a konin thilbol thei miman tam cheh alheng doh tan. Amaho chengse chu Israel mite lah a lamkaija pang ding hichu mi sangkhat, jakhat chung'a vaihomin apan sah soh kei uve. 26 Amaho chun kiphunna le baotam na nei ho chu Mose heng'a ahin lhut lut jiuvin ahi. Thuneo boina hovang chu ama hon acham'un a sulham jiuvin ahi, 27 Hiche ho jouse nung hin, Mose'n anupa pa asol in, anupa pa Jethro in jong alam pi ahung'na mama chu ahoh in akile tan ahi.