1 Hiche phat laitah chun gal anaum'in ahi. Babylon lengpa Amraphel, Ellasar lengpa Arioch , Elam lengpa Kedorlaomer, chule Goiim lengpa Tidal 2 akidoupi hou chu Sodom gam lengpa Bera, Gomorrah lengpa Birsha , Admah lengpa Shinab, Zeboiim lengpa Shemeber, chule Bela lengpa (Zoar kitipa) ahiuve. 3 Hiche anunung'a lengho hi Siddim phaicham (twithi kol phaicham) a apangun ahi. 4 Kumsom le ni sung'a amaho hi Kedorlaomer lengpa noiya ana kun jing'u ahin, amavang kum som le thum lhin kum'in adouvin ahung pang tauve. 5 Kum khat jou chun Kedorlaomer lengpa le ama pankhompi lengho chu ahung kon uvin, Rephaim mite chu Ashteroth-karnaim achun ajouvun, Zuz mite chu Ham achun ajouvun, Emim mite chu Shaveh-kiriathaim achun anajou un, 6 chule Hor mite chu Seir Mol apat gamthip lang gamgi El-Paran chan geiyin aga joupeh uvin ahi. 7 Hichun amaho hikom'a kon chun En-mishpat (tua Kadesh kiti) a akinung lekit uvin, Amor mite leh Amalek mite touphana jouse chu Hazazon-tamar achun ajou tauvin ahi. 8 Hichun leng phalou akiphin ho se-se chu Sodom, Gomorrah, Admah, Zeboiim, chule Bela (Zoar kitipa) galkon din akigong un twipi-thi phaicham achun gal asat uvin, 9 Elam gam lengpa Chedorlaomer le Goiim lengpa Tidal toh, Babylon lengpa Amraphel toh chule Arioch lengpa Ellasar chutoh akisat uvin, hicheng leng li ho chun leng nga ho chu anadouvun ahi. 10 Chutia aumlai chun, Twipi Thi umna phaicham chu hahlei komtong adimlha tan ahi. Chule Sodom le Gomorrah leng teni le asepai te ajam'un, mi phabep chu hahlei komtong'a akhelut uvin, adangse chu mol'a akisel tauvin ahi. 11 Gal hangsan mihat ho chun Sodom le Gomorrah alonkhum un gal manchah ho jouse chule neh le chah ho jouse akichom khomun ache tauve. 12 Amaho chun Lot, Abram sopipa jong chu aman uvin Sodom a chengpa chu anei thil le gou jouse jong alahpeh tauve. 13 Hinlah Lot insung mite khat ana sohcha in, amapa chun Abram Hebrew mipa aga seipeh tai, hiche lai chun Abram chu Eshcol le Aner sopipa, Amor mi Mamre gangpi thingphung vel dunga chun ana cheng nalaiye, amaho jong chu Abram toh ana pangkhom ahiuve. 14 Hichun Abram in asopipa Lot kimat ajahdoh phat chun aman tohgon ahin neitan, mihem jathum le som le get phatah a galbol kithem chuhsa ama insunga peng cheh ahin lhengdoh in ama tah in alamkaiyin amaho chu Kedarlaomer sepai ho chu Dan geiyin aga nungdel peh in ahi. 15 Hichun Abram in amaho chu ahom khenin jankim laitah in abulu'un Kedarlaomer sepai ho chu ajam cheh tauve, Abram in amaho sepai ho chu gamla tah in anojam'in Damascus khopi sah lang Hobah chan geiyin agadel peh-uvin ahi. 16 Hiti chun Abram injong asopipa Lot jong, athilkeo chengse toh, numeiho ahiuvin mipi ahiuvin abonchan ahin nungpui soh tai. 17 Abram chun Kedarlaomer chuleh apankhom pi leng ho aga jo a ahung kinungle lam chun Sodom lengpan Shaveh phaicham (Shaveh tichu lengpa phaicham tina ahi), achun alamto dingin ahunge. 18 Hichun Melchizedek Salem lengpa chule Pathen Thempu Chungnungpen a pang pan Abram chu lengpitwi chuleh changlhah ahin pohpeh e. ✡ 19 Melchizedek in Abram chu hiti hin phatthei aboh in hitin aseiye, “Van le leiset hin phutdoh a Pathen chungnung pen kom'a, Abram phattheiboh chang hen, 20 Chule nagalte nangma khut lum'a lousah a, chungnungpen Pathen chu loupi hen,” ati. Chuin Abram in Melchizedek chu thil jousea kon'in hopsom a hopkhat khat apesoh keiye. 21 Sodom lengpan Abram jah a hitin aseiye, “Kanam mite na hentup ho chu nei nungpeh tan, amavang thilkeo ho chengse nangin na matdoh ho vang chu nangma adin na kikoi theiye,” atile, 22 Abram in Sodom lengpa hitin adonbut in, “Van le leiset hin phutdoh Pakai Pathen Chungnung Pen kom'a kakihahsel ahitai, 23 Keiman patse jangkhat cha hihen lang, kengchot khao jeng cha hijongleh nang thil kiti poupou khatcha kalah louhel ding ahi, nangman Abram ka haodoh sah tai,” tia nasei thei louna dingin; 24 Ahin keiman kalah ding chu gollhang hon aneh doh ule mihon ana nehchai ho bou chu ahi, chule keiman ka deilhen pentah chu ahile achan ding uva kilom thil le gouho chu kaloi kamite Aner, Eshcol chule Mamre amaho petan.