1 Tun Abram jinu Sarai chun cha anei thei tapon ahin lah Sarai chun Egypt mi soh numei khat ana neiyin amanu chu Hagar ahi. 2 Chuin Sarai'in jong Abram jah a aseiye, “Ven Yawehyin keila cha eihin sah tapon, lungset tah in ka sohnu koma ga lut tan; ijem itile amanua konna khu ka inchen dohsah thei nahi,” atile, Abram in jong Sarai thu angai tai. 3 Hichun Sarai Abram in-neipin Hagar chu apuiyin Abram ji din apetai, hiche phat laitah chu ahile Abram kum som Canaan na achen jou don ahi tai. 4 Hichun Abram toh Hagar chu akitimat lhon tan, chuin Hagar chun nao ahin vop tan hichun apinu Sarai chu noise tah in ahin vepan tan ahi. 5 Hijeh chun Sarai in Abram jaha aseitai, “Hiche ho jouse hi nang suhkhel ahi, ka sohnu hi nangma dannoiya ka koi ahin, Hinlah tuhin amanun nao avop tan keima noise tahin eive tan hijeh chun keile nang kah a Yaweh thutan in hung pang jeng hen!” atitai. 6 Abram'in adonbut in “Ven amanu khu nasoh hilou ham, nangman pha nasah dungjuiyin bol tang em?” ati. Hichun Sarai in Hagar hatah in ahin sugenthei pantan hichun amanun (Hagar) ajamsan tai. 7 Yaweh Vantil in gamthip Gam'a twikhuh phungkhat'a Hagar chu aga mudoh in ahi, hiche twi khuh chu Shur jotna lampia um ah ahiye. 8 Yaweh Vantil chun aseiye, “Hagar, Sarai sohnu hoilanga konna hungsoh doh na him? Hoilam jon ding na him?” atile Hagar in adonbut in, “Kapi nu Sarai kom'a kon ahung jam doh kahi,” ati. 9 Hichun Yaweh Vantil chun amanu ahoulimpi in, “Nangma na pinu kom'a kinungle in chule amanu dan noiya nakun angaiye.” 10 Hichun Yaweh Vantil chun ahoulimpi na laiyin, “Keiman na chilhahte tamtah ka pehbe ding nahi, sim jong na sim joulou ding ahiye,” ati. 11 Yaweh Vantil chun ahoulimpi nalaiyin, “Tua hi nangma naovop na hitan chapa khat nahin ding, hiche naosen chu amin Ishmael nasah ding ahi. (Elohimin angailhi jing'e tina ahi), ijeh inem itile Yawehyin na gimna chu na khongai peh tai. 12 Chule nachapa hi mihem laha gam'a sangan lungthim bei bang ding, mitin douna akhut hinlap a chule mitin khut ama chunga hung chu ding, chuleh aphunggol jouse toh kidou toa hung khosa ding ahi.” 13 Hiche jou chun Hagar in ajah a thu hinsei Yaweh chu aminvovin, “Nangma hi keima eimudoh a 'El-roi' nahi,” ati. Ajehchu amanu'n “Tahbeh monga keiman Elohim kamu a chule ama ka mu nunga ka hing'a ka um nah lai ham?” atin ahi. 14 Hichun Twisam putna chu amin Beer-lahai-roi asah tai, hichu Twikhuh hi Kadesh le Bered kikah aum ah ahiye. 15 Hichun Hagar in Abram chu chapa khat ahin peh tai. Hichun Abram in achapa min chu Ishmael asah tai. ✡ 16 Hagar in Abram ding'a Ishmael ahin peh chun Abram chu kum som get le kum gup alhing tan ahi.