JOB
LEKHABU
Job Lekhabu Sung Thu Umdan
Phat khat teng mihem hinkhoa thudoh hahsa tah ho toh ikibon jiuvin, ipi dinga aphalou ahilouleh thilse leh thohgimna ho hi vannoija umjia hintem? Ipi dinga midih ho thohgim jiu ham? Hahsatna aum teng Pathen hoiya umji ham? tin idong jiuve. Thudoh ho chungah bailamtah donbutna aumji nan hinlah Pathen hina ho thudoh nasatah in aumdenji e. Lunghem tah a Job in nat gimtah thoh pum'a donbutna dihtah ahol chun, Pathen toh kimutoa kikhelna mun alhut in ahi. Ahintosa umchan chun thudoh nasatah inei hou donbutna neipa Pathen toh ei kimai ngatto sah un ahi.
Amavang eiho bou – asimhon – akiselguh hetdohna chu ineijun ahi. Job in ahet chasun chu phulou helouva ahinkhoa thilpha jouse suhmanga aum chu ahi. Ipi jeh ahivang ahepoi. Hetdoh ding jong kinem lou ahi. Anat thohgim pettah a Pathen toh athahbeh a akimuto kahse in thudoh tamtah aneijin hilchetna angaichan ahi. Pathen toh akimuto chun ijakai akhelsoh tan ahi. Job in aseijin, “Nang hi masangin kana jah tho in, hinlah tun vang kamit tah in nang kamutai,” ati (Job 16). Job thusim nasim bangin nangin jong Pathen athahbeh a namu nadin Pathen kom'a thum’in.
Lekhabu pumpia ogin jat chom-chom kijaho ngaiton – hahsatna ito teng ikimaitopi jiho thakhat – Pathen, Satan, golphatah ho, insumgmi chuleh Job lungchang ahi. Hiche lekhabua thil kijih: kihoulimna, la a, thuchih, paochamtuh, lhasetna, gaosapna leh tekahna ho ahoplet dan vechen tem in; Job leh aloihon aneilou akiselguh dihtah hetdoh theina inei u geldoh jing pum’in ching thei tah in sim’in.
Lekhabu Jihpa, Akijih Kum Chule Akijih Lona
Hiche lekhabu hi kon ajih hetchet ahipoi. Chule Job lekhabu hi 2000 BC, Hebrew puluiho phat laiya kijih hidin ginchat ahi. Ajeh chu Job lekhabu hi Bible adia gollui lekhabu luipen hinte. Mi tampin Job thusim hi akhang khanga thusim seithoa, ana kisei jing hichu khonung’a hung kijihdoh ahi, tin aseijun ahi.
Thohgimna chung changa thudoh ho seidohna dinga kijih ahi. Asimhon Lhagao leh Thudih kholgilna a Job kihambolna tobanga kigel theina dinga Job thusim hi kijih ahi. Hiche hin apha a Pathen'in ama ngailuho adih monge tia, aphon khontehna ahi thudol mudoh ahi.
1
Thumakai
1 Phat khat hin Uz gamsunga Job kiti mikhat ana chengin, amapa chu nolnabei leh lungtheng sel ahi. Amapan Pathen aging in thil phalou jousea konna kikangse jinga um ahi.
2 Joh hin chapa sagi le chanu thum aneiye.
3 Chule Job hin kelngoi 7,000, sangongsao 3,000, bongchal kop 500, le sanganpi 500 aneiye. Amapa hin soh jong tamtah anei ahi. Atahbeh in Job hi hiche gamkai sungse dinga ahaopen ahi.
4 Job chapa te aphat lhing pen-pen chun ain uva nehkhom donkhom abol tengu leh, asopiu numei thumho jong chu golvah bolkhompi din akou jiuve.
5 Hiche golvah chu akichai teng nikho phabep jouleh Job chun achate athenso jin ahi. Job chu jingkah matah in athou jin khat cheh a din govam thilto abolpehji e. Ajeh chu Job in hiti hin aseijin, “Kachate hi ana chonseuvin tin chule alungthim uva jong Pathen agaosap sau himai theijinte,” ati. Hiti hin Job in abol jing jenge.
Job Patepna Masa
6 Nikhat hi van thutanna inna thutanho amaho cham chamin Pakai masanga ahung kikhomun chule hehhatpa Satan chu amaho toh ahunglhung khom'e.
7 “Hoiya konna hung nahim?” tin Pakaijin Satan adong'e.
Satan in Pakai adonbut in, “Leiset chung kaga vet lhih lea, thilsoh jouse kaga vetle ahi,” ati.
8 Chuin Pakaijin Satan jah a, “Ka lhachapa Job khu nahet em? Leiset a dinga miphapen ahi. Ama hi nolnabei, milungthengsel ahin, aman Pathen aging in chule thil phalou jousea kon'in akikangsen ahi,” ati.
9 Satan in Pakai adonbut in, “Henge Job in Pathen aginna ajeh hoitah anei ahi.
10 Ama ahin ain ahin chule anei jouse kulpi kikai khum banga, akim vella pal banga naum chahkheh a nangin atohna jousea nakhan tousah jeh a bou ahi. Ven ichan geija haosa hitam?
11 Nakhut lhangin lang anei jouse lahmang peh le chun, chutengleh namai chang tah a na gaosap jeng ding ahi,” ati.
12 Pakaijin Satan jah a aseijin, “Aphai, amapa khu napatep thei ahi. Chule anei jouse chunga nabol nom chan nabol thei ahinai, atahsa vang suhset peh hih in,” ati. Chuin Satan in jong Pakai umna adalhatai.
13 Nikhat Job achapa te le achanu ten aupa pen pau in’a an anehkhom adonkhom laitah un,
14 thupole khat in Job in'ah hiche thusoh hi ahinpoi: “Na bongchal hon lou akhoi uva, akimvel'a sangan hon an aneh laijun,
15 Seba miten eihin bulhu tauvin ahi. Gancha ho jouse akiguh mang uvin chule natong ho athat gamun, keima changseh hi nangma seipeh dia hung sohcha kahi,” ati.
16 Amapan hiche thu hi asei nalaijin, thupole dang khat in hiche thusoh hi ahinpoi: “Van'a kon'in Pathen meikong ahung lhan kelngoite le achingho akavam gamtai. Keima changseh hi nangma seipeh dinga hung sohcha kahi,” ati.
17 Amapan hiche thu hi asei nalaijin, thupole athum channa pa ahung lhungin, hiche thusoh hi ahinpon: “Chaldea mite loithum jenin ahin delkhumun sangongsao jouse agumang un chule nasaohte athatgam tauve. Keima changseh hi nangma seipeh dinga hung sohcha kahi,” ati.
18 Hiche pan thu asei nalaijin, thupole adang khat in hiche thusoh hi ahinpo paijin: “Nachapa te le nachanu ten aupa pen pau inna anekhom adonkhomun ahi.
19 Photlot chang in, gammang lah a kon'in huipi hattah khat in aumnau in chu aninglang jousea ahin nuh leh in chu ahung chimlhan nachate jouse athigam soh tauve. Keima changseh hi nang seipeh dinga hung sohcha kahi,” ati.
20 Job adingdoh in thilsoh lunggimna jeh in asangkhol chol chu abottel in, alu akivo chaijin, chule chibai boh din tolla akun lhatai.
21 Aman aseijin,
“Kanu naobua konna kasagoh keuva hungdoh kahin,
chule kadalhah teng sagoh keu kahi ding ahi.
Kanei jouse Pakaijin eipeh ahin,
chule Pakaijin akilah mang ahi.
Pakai min chu vahchoijin umhen!” ati.
22 Hicheng jouse ahin Pathen themmo chansah nan achonsepoi.