28
Job In Chihna Le Thil Hettheina Thu Asei
1 “Mihem ten dangka kilaidohna aheuvin
chule iti kilhit theng ding ham ti aheuve.
2 Leisetna konna thih kilaidohna ding mun aheuvin
songpi a konna sum-eng sontwi je aheuve.
3 Chule leiset a gambeh gamla pen-pen jong akhol doh uvin
thih ahol nau muthim lah a khovah sah je aheuve.
4 Mihem ho chenna a kon gamla tah a leiset a kokhuh avut un,
khaovin akumsuh uvin anung leh ama ah akivol leuve.
5 Neh le chah hi leiset chunga kitu ahin,
ahinlah anoi langa leiset hi, meiya kihal jun ji ahi.
6 Hiche a songho lah a chu songval mantam tah um ahin,
chuleh leivui lah a chu sana umah ahi.
7 Hiche gou ho hi chunga leng hingne hon jong amu theilou,
chule vacha neo mit in jong amu theilou ahi.
8 Hiche gou ho chunga hi gamsa ho jengin jong ajot khah louhel ahin;
keipi bahkai jengin jong atin a akhoi khah louhel ahi.
9 Mihem in songgel song kehsoje aheuvin
chuleh mol lekhup je jong aheuve.
10 Ama hon songpi lah a kohom avut un
chuleh songmantam manlu tah-tah ho chu aladoh uve.
11 Valha chet chut a long luidung ating tan jiuvin
chuleh akiselguh gou jouse khovah a ahin polut jiuve.
12 “Ahinlah mihem ten chihna hi hoiya kimudoh ding ham ti ahet uvem?
Thil hettheina hi hoiya amu thei diuvem?
13 Hoiya kimu ham ti koima chan ahepon,
ijeh inem itile hiche hi mihing gamsunga kimulou ahi.
14 'Hiche ah aumpoi,' tin twikhanglen in aseije.
Twipi thuhtah in jong, 'Kei kom'a aumpoi,' ati.
15 Chihna chu sana a choh thei ahipoi.
Dangka a choh thei jong ahipoi.
16 Ophir sana jouse sanga jong manlu jo ahin,
manlutah onyx leh songval sanga jong thupijo nalai ahi.
17 Chihna hi sana leh songval sanga mantam jo ahi.
Songmantam kijepna chung sana hoitah chonga jong choh thei hilou ahi.
18 Chihna chohna dingin coral leh jesper songmantam teni jong hi phachom lou ahi.
Chihna man ding chu hiche songmantam sang-sanga jong sangjo nalai ahi.
19 Ethiopia gam'a songmantam Peridot tojong lheh thei hilou ahi.
Sana theng pen-pen sanga jong manlu jo ahi.
20 “Ahinlah mihem ten chihna hi hoiya hol ding ham ti ahe thei diuvem?
Thil hettheina hi hoiya amu diu ham?
21 Mihem te mitmu a kon'in akisel tai.
Chung leng vacha mit hat pen in jong amu doh joulou ahi.
22 Manthahna le Thinan asei lhon'in,
'Keinin jong chihna hi hoiya kimu ding ham ti thukithang bou kaja lhon'e,' ati.
23 “Pathen ama changseh in bou chihna lampi ahen;
hoiya kimu ding ham ti ahen,
24 ijeh inem itile aman leiset chung hi apumpia avet ji ahin
vannoija thil um jouse hi amusohkei ahi.
25 Aman hui ichan hat a nunsah ding
chule go ichan a juhsah ding ti agellhuh sa ahi.
26 Aman gojuh ding dan asempeh in
chule kolphe vahna ding lampi asempeh e.
27 Hiti chun aman chihna chu ana mun ahi. chule manlutah ahi.
Ahin munkhat ah akoiyin hoitah in akholchil jin ahi.
28 Chule aman mihem te jah a asei chu hiche hi ahi:
'Pakai gin kiti hi chihna dih chu ahin;
thilse a konna kiheidoh kiti hi thil hettheina tahbeh chu ahi.'”