1 Khonungin, suhlou chang lhunphat nin Samson’in kelchanou khat ajinu peh dingin ahin choijin ahungin. Hichun aman aseijin, “Keima kajinu indan sunga che–ing ting galuppin kate,” ati. Ahinla ajinu apan analutsah tapon ahi. 2 Numeinu pan anaseijin, “Keiman kagella chu nangman najinu chu nadeilou mong mong ahitai katia, nagol phapenpa komma ajidingin kanapeh ahitai, ahinla ven anaonu hi amanu sanga hoijo louham, ama hi kichenpi tan” atin ahi. 3 Samson in hitin aseije, “Tunvang Philistine te chunga itobang bol jongleng themmo taponge” ati. 4 Hijouchun apotdoh in Sial jathum aga man’in amei’u akhit mat matnun hiche akopto khatcheh chu meisel toh ahel kopmin ahi. 5 Hijouchun, meiyin ahallin Sial ho chu Philistine te loulai changphung lah a chun alhalut’in ahi. Hiti chun chaangho chu agale akung pummin ahal lhajengin lengpithei leh Olive thing kisan’in ahal lhah tha jengin ahi. 6 Philistine ho chun, “Hiche hi koibol bepseo hitam?” atiuvin ahileh “Samson” ahi, Timnah mi apupa chun Samson jinu chu agolphapen patoh kicheng dinga anapeh doh jeh a abol ahi” atiuve. Hijeh chun Philistine te chu acheuvin numeinu nule pa chu amandoh uvin meijah ahallih tauve. 7 Samson akihah sellin “Nanghon hiche hi naboljeh un nachung uva phu kalah tokah a kaki choldoh louding ahi,” ati. 8 Hijeh chun aman lunghangtah in Philistine ho chu anokhumin mi tamtah athatnin ahi. Hiche jouchun ama achen Etam munnah songpi khatnah chun agachengtan ahi. 9 Philistine ten alethuh un Judah gamsungah ngahmun asemun Lehi khopi kom geijin akithe jao jengun ahi. 10 Judah mipite chun Philistine ho chu adongun “Ipi bolla neihung delkhum uham?” atiuve. Philistine ten adonbut un, “Keiho Samson man dinga hung kahiuve, aman keiho chunga thilse abol hi lethuh dinga kahung’u ahi,” atiuve. 11 Hichun Judah mite sangthum chu Etam songpi ko homma um Samson chu gamandoh dingin achesuh un ahi. Ama hon Samson komma chun “Philistine tehin ichung uva vai ahom u ahi tihi nahet louham-kachung uva hi ipibepseo nabol hitam?” atiuve. Ahin Samson in adonbutnin “ama hon keichunga abol tobang bepma kalethuh ahi bouve” ati. 12 Juda mipi ho chun amakomma aseijun,” Keihon nangmahi kantumma Philistine ho khutna pehdoh dinga kahungu ahi,” atiuve. 13 Samson in aseijin, “Aphai ahinla nangho tah in neitha louna diuvin kitem un” atin ama hon adonbut un “Nathat pouvinge” atiuvin ahi. 14 Samson chu Lehi ahunglhun phatnin Philistine ho chun noise tahin kholhang asammun ahin delkhumun ahi. Ahinla Pakai lhagao chu thaneitah in Samson chunga ahung chun, akikanna khaoho chu meiyin patjang akahtan bangin atumtan gamtan ahi. 15 Hijouchun aman sangan khagu thah khat amun, hichu alan Philistine mi sangkhat hichea chun athat tan ahi. 16 Samson’in aseije, “Sangan khagu mangchan alom chang’in kajamme, sangan khagu mangchan mi sangkhat kathatnin ahi,” ati. 17 Aman ahaan lasap chu achaiphat in sangan khagu chu apei mangtan ahi. Hiche munchu Ramath Lehi akisahtan ahi. 18 Hijouchun ama adangchah lheh jengtan ahileh Pakai kommah akapjah jengin, “Nangin nalhachapa thahat aming chaan galjona loupitah neipetan ahi. Tuahi dangchah a kathia hiche cheptan louho khutna hi kalouding hitam?” ati. 19 Hijeh chun Pathen'in Lehi tolgolai komtong khatchu apokeh dahin twi ahung kikhodoh jengtan ahi. Samson’in hichu adonnin akido dohtan ahi. Hijeh chun ahiche munchu “En-hakkore” asahun hichu tuni geijin Lehi munnah aumna laiye. 20 Philistine ten gamsunga vai ana homlaijun Samsonin Israel te chungah kum somni thutan’in ana pangin ahi.