1 Pasal khat amin Lazarus kitipa chu Bethany a cheng ahin, dammona nei, chule asopi teni Mary leh Martha toh cheng khom ahi.✡ 2 Hiche numeinu Mary hi ahi, Pakai kengbul'a thao nua asama theh ngima chu;✡ 3 Chule amanin a ucha lhonin Pakai Jesu heng'a thu athot lhon'in hitin asei lhon e, “Pakai na ngailut naloipa hi adammo lheh tai,” ati lhonin ahi. 4 Hichu Pakai Jesun ajah chun hitin aseiyin, “Lazarus dammona hi thina a kichai ding ahipoi, Pathen loupina dinga kibol'a ahi bouve ati, hiche jeh a chu Pathen Chapa loupina hungsoh doh dinga kitahlang joh ahi,” ati. 5 Pakai Jesun, Mary, Martha leh asopipa Lazarus alungset lheh jeng vang chun; 6 Hikom'a aumna mun'a chun Pakai Jesu chu nini tobang aumbe nalaiyin ahi. 7 Hichun aphat ahung lhin phat chun Pakai Jesun aseijui ho koma aseijin, “Eiho Judea gam langa kinung lekit tau hite ati.” 8 Ahin aseijui ten lung opkaina aneiyun, “Rabbi, ni ijat ham khat masanga chu Judea gam'a mihon songa selih ding nagot u chula em,” atiuve. 9 Jesun adonbut in, “Nikhat sunga hi nidan som le ni niseh a um ahi, chule sun a hi mijousen lam ajotthei cheh ding ahi. Chuleh ama hon kho amu theinau chu ahileh vannoi vah anei jeh u ahi. 10 Ahin, jan tengleh tijatna tah jong aumin, kipal lhuhna thei jong aumin ahi, ajeh chu vah aumji tapon ahi,” ati. 11 Hichun aman aseiyin, “Iloipau Lazarus a imu lhatai” ati, “Amavang keima kache ding kaga thodoh ding ahi,” ati. 12 Hichun seijui ten adonbut uvin, “Pakai, Lazarus chu a imut leh damvah ding tina ahitai,” atiuve. 13 Ahin seijui ho geldan'a chu kicholdo dinga a imut aseiyin angaitouvin, ahin Pakaiyin asei chu Lazarus thi ahitai atina ahi. 14 Hichun Pakaiyin aseichet peh in, “Lazarus chu athitai.” 15 “Chuleh keima kakipah lheh e, ajeh chu nang hon na tahsan theina dingu ahi, hijongleh tun hungun ahenga cheu hite,” ati. 16 Hichun Thomas minlhem ni neipa chun aloi aseijui ho lah a aseitan, “Eiho jong cheu hitin, chu a Pakai toh gathi khom'u hite,” ati.

17 Jesu Bethany kho ahung lhun chun Lazarus chu lhan khuh a avui nau nili ahitai ti aseipeh uve. 18 Bethany chu Jerusalem kom ahin, mile themkhat bouva gamla ahi; 19 Chuleh Judah le midang tamtah achekhom'un, Mary leh Martha amani lungmon sah dinga hung'ah anaum'un ahi. 20 Hiti chun Martha in Pakai ahungtai tithu ajah phat in amanu chu achen Pakai chu aga kimupin Mary vang chu inmun'ah aum dentai. 21 Hichun Martha in Jesu koma aseitai, “Pakai, nangma hilai mun'a hi ana um hile chun kasopipa hi thilou ding ahi” ati. 22 Ahin tun jong Pathen'in nathum chan napeh ding kahenai ati. 23 Jesun amanu jah a, “Nasopi pa thou kit ding ahi,” ati. 24 Marthan adonbut in, “Henge kanom'e, Ni nunung nia thokit nia atho doh kit ding chu kahe nai,” ati. 25 Hichun Jesun amanu jah a hitin aseiye, “Keima hi thokitna le hinna chu kahi; chule koi hijongleh keima eitahsan chan chu thi tajongleh thoudoh kit ding ahi. 26 Chuleh koi hijongleh ahinga keima eitahsan a chu itih hijongleh thilou ding ahi. Martha, hiche hi na tahsan em?” ati. 27 Marthan adonbut'in, “Henge, Pakai, Pathen katahsan'e, nangma hi Pathen Chapa Messiah vannoiya hunga chu nahi,” ati.

28 Hiche chu asei jouvin achemang in asopinu Mary guhthimin akouvin, “Houhil chu hikoma aumin, nakouve,” ati. 29 Chuin Mary in hichu ajah jah in gangtah in akipat doh in ahenga achetai. 30 Pakai Jesu chu khopam'a Martha toh akimutona lhon a chu um nalai ahin; 31 Hichun mipi ho Mary lhamon dinga um hon ama akipat doh a kino thethua adalhah chu amu u chun Lazarus lhankhuh langa gakap dingin agel'un, hichun ama hon Mary nung chu ajuiyun ahi. 32 Hiti chun Mary chu Jesu umna alhun phat in ama chu amun akengphang bul'ah abohkhup jengin ajah a, “Pakai nangma hikoma um hile chun kasopipa thilou dinga,” ati. 33 Hichun Jesun amanu aka amun ahin lhonpi mipi ho jong chu akau amun alungsunga lunghem tah le pohnatna neitah in aum uvin ahi. 34 Hichun Jesun amaho chu adongin, “Hoiya nakoiyu hitam,” ati, mipi hon adonbut un, “Pakai hungven,” atiuvin ahi. 35 Hichun Jesu akaptai. 36 Hikom mun vel'a ding ho chun aseiyun, “Veuvin iti angailut hitam,” atiuve. 37 Ahin koitobang loichun hitin aseiyun, “Hiche pa hin mitcho ho kho amusah hilou ham, chule Lazarus jong chu athida sah thei chula em,” atiuvin ahi.

38 Hichun Jesu chun lhan khuh ahin phah chun lunghem tah in aum in; chuleh alhan chu kohom khat ahin, akot chu song khat a kising ahi. 39 Jesun amaho jah a aseiyin, “Song chu tangdoh un,” ati. Chule athipa sopinu Martha chun ajah a, “Pakai, tun a uitai, ijeh inem itile nili ahitai,” ati. 40 Hijeh chun Jesun adonbut in, “Natahsan'u leh Pathen loupina namu dingu ahi kati hilou ham?” ati. 41 Hichun ama hon songpi chu atangdoh tauvin, hichun Jesun vanlam aven “Pa, nangman kataona na ngai jeh in namin ka thangvah e; 42 Chuleh nangman kataona na ngai jinge, ti keiman kahenai, ajeh chu kakimvel a mipi ding ho hin nangma sol kahi hi ahin tahsan theina ding uva kati ahi bouve,” ati. 43 Hichun Jesun hasap tah in asam in, “Vo Lazarus, hung thoudoh in,” ati. 44 Hichun Lazarus chu akhut akeng lhanpon a kitom pumin amai ultheh pon a kitom pumin lhan khuh a konin ahungdoh tan ahi. Hichun Jesun ajah uva, “Lhamun lang lam jotsah un,” ati.

45 Hichun mipi tamtah Mary toh um jouse chun athilbol chu amu uvin hichun Jesu chu atahsan tauve. 46 Ahin mipi lah a mi kimkhat acheuvin Pharisee ho jah a Jesu thilbol chengse chu agasei tauve. 47 Hijeh chun thempu pipuiho leh Pharisee ho houvaipo loi akikhom'un, “Eihon ipi ibol'u ham? Hiche pa khun la melchihna tamtah abol jing jengin ahi. 48 Eihon ama hi tua banga iche jomsah jingu le mijousen ama ahin tahsan cheh cheh dingu, hiche teng chule Rome solkal in eiho inam'u ahin i-Hou-In'u ahin eisuhchim peh dingu ahitai” atiuve. 49 Hiche laiphat tah a thempua ana pang chu Caiaphas ahin aman hitin aseiye, “Nanghon na thuseiyu hi ipi kiseina ham nahe pouve ati. 50 Chujong le vannoi pumpi aboncha amanthah louna dinga miho dinga mikhat athi nangho dinga phajo ahi, tijong nagel pouve,” ati. 51 Chuleh hiche ho hi Caiaphas in ama chama aseidoh ahipon, thempu pipui hina a gaova aphondoh a, Pakai Jesu hin vannoi nam jouse khel'a ahinkho apehdoh ding thu asei masah ahi bouve. 52 Chuleh Israel chate kisuh khom ding seh hilouvin, namtin jouse le Pathen chate jouse akikhop khoma pumkhat ahidohna dinga jong ahi. 53 Hiti ahijeh chun, hichea pat chun Juda ten Jesu thana ding lung angaito uvin akihousom tauve. 54 Hijeh chun Jesu Judah ho lah a lhangphongin avah le tapoi; chua kon chun Jerusalem adalhan, gamthip lama Ephraim khoa aseijuiho toh chua chun aum jing tauve. 55 Chuleh Judah te Kalchuh Kut ahung naitan, hichun kut masanga kisutheng dingin gamsunga Judah te jousen, Jerusalem ahin jon cheh tauvin ahi. 56 ama hon Jesu ahol'un, Hou-In vel'a adin uchun, khat le khat akihouvun, “Ipi na ngaito uvem? Jesu chu kut a hi hung louding ham?” akitiuve. 57 Hichun thempu pipuiho leh Pharisee hon, lhangphong tah in aphongun, koi hijongleh Jesu umna hea chun amat theina ding uva avetsah ding uvin mipi ho thu apeuvin ahi.