1 Jesun thu hicheng chu aseiyin, vanlam aven, “Pa naphat chu ahung lhunge; Chapan nangma na choiat theina dingin na chapa choian in. 2 Ajeh chu nangman ama napeh ho jouse chu aboncha aman tonsot hinkemlou apeh dinga, nangman ama chu mijouse chunga thuneina napeh ahi. 3 Pathen tahbeh khat seh nangman nasol Jesu Christa tah chu ahet doh dingu, hiche hi tonsot hinna ahi. 4 Chuleh nangman keima bol dinga neipeh chu kajouvin, chule leiset chunga nangma min ka choian tai. 5 Chule tun, Pa vannoi leiset um masanga nangma toh ium laiya iloupina chun nangma tah toh kigomin nei choian in. 6 Vannoi leiset a neina peh ho chu keima in kahin tahlange. Amaho chu nangma a din aum jing uve, chule nangma in keima neipeh ahitan, amaho in nathu chu anit jing nauve. 7 Tun ama hon nangman keima neipeh thil chengse hi nanga kon ahi ahe tauve. 8 Hiti ahijeh chun nangman keima neipeh thu ho chu keiman amaho kapen, chule keima hi nanga hung kon kahi jong atahsan tauvin, chuleh nangman neihin sol ahi tijong atahsan tauve. 9 Chuleh keima amaho dinga katao ahi, vannoi dinga katao ahipoi; Ahin nangman keima neipeh ho dinga bou katao ahi, Ijeh inem itile amaho nanga ahiuve. 10 Keima'a um jouse nanga ahi, chuleh nangma in keima neina peh ahitai. Ajeh chu ama hon loupina eihin chansah u ahi. 11 Chuleh keima vannoiya hi kaum louding ahitai, amaho vang hi vannoiya aum nalaiyuve, chule keima nahenga hung ding kahitai. Kapa Theng, eini pumkhat ihi banga amaho jong pumkhat ahi theina dingun, nangman amaho hi vengtup in. 12 Keima hikoma kaum sungin, amaho hi kana vengtup e. Amaho hi kaventup jal'in khat cha jong amangthah aum pouve, Pathen Lekhabun anaseisa, manthahna lama chepa tailou chu.✡ 13 Chuleh tua keima nangma koma hunga kahitai, chule keima leiya kaum laiya chu kipa thanopnaa adim jing theina ding uva kana seipeh sohhel ahitai. 14 Chuleh keiman nathu amaho kapetai; chule keima vannoiya kahilou banga amaho jong vannoiya ahilou jeh un, vannoi miten aho tauve. 15 Chule keiman kathum chu amaho hi vannoiya konin ladoh in tia katao ahipoi, agiloupa natoh na a konin huhdoh in kati joh ahi bouve. 16 Keima vannoiya konna kahilou banga, amaho jong vannoiya kon ahi pouve. 17 Chule na thutah chun amaho jouse hi sutheng in ajeh chu nangma thu hi thutah ahiye. 18 Nangman keima vannoiya neina sol banga chu keiman amaho hi vannoiya kasol ahi. 19 Chule amaho jouse hi thutah a suhthenga aum theina ding uva amaho jal'a keima kisuthenga kahi. Jesun tahsan chate jouse dia taona anei 20 Keima seijui ho ding seh a tao kahipoi, amaho thuseiya konna keima eitahsan ho jouse dinga jong taova kahi. 21 Chule amaho chu pumkhat ahina ding uva, Pa, keima nangma sol kahi hi vannoi miten atahsan theina ding uva nangma keiya nauma keima nanga kaum banga hi, amaho jong einia aum theina dinga katao ahi. 22 Keiman amaho chu loupina nangman neipeh ho chu kapetai, amaho eini banga pumkhat ahi theina dingu ahi. 23 Keima amahoa kauma chule nangma keiya naum, abon'a khat a chamkim soh ahi. Chuteng vannoiyin keima neisol ahi ahet diu chule keima nei ngailut banga hi amaho jong na ngailut ahidan ahetthem diu ahi. 24 Hepa, nangman neipeh loupina chu nangin neipeh ho hin amu theina dingun, keima umna a chun kakoma amaho jong umleu kati ahi; chule vannoi bul kiphu masanga nangman nei ngailut ahijeh chun. 25 Vo Kapa Theng vannoi leiset miten nangma nahe them thei pouve, ahinla keiman nangma kahen, chule keima neisol hi seijui ho hin ahe tauve. 26 Keiman nangma hi amaho lah a ka tahlang nahitai, chule keiman hitia chu ka tahlang jing ding nahi; hiche teng chule keima nei ngailutna ho chu amaho'a um ding chuteng keima jong amaho a kaum jing ding ahi.”