JEREMIAH
THEMGAO LEKHABU
Jeremiah Themgao Lekhabu Sung Thu Umdan
Hiche phatlai chun, gamsung muntin’ah doilim semthu houna maicham phung adim in, mihon pathen dihtah chu adalhauvin, ama deiya nopchonna-a alhalut gam tauvin ahi. Hiche jeh’a chu Jerusalem leh amite ding a manthahna hunglhung ding, chuleh akimveluva cheng namdang hon gal ahinbol khum’uva asuhgamdiu chu Jeremiah in ana phondoh ahi.
Hijeh chun Pakaiyin, Jeremiah chu jinei louva um ding, ama hinkho a chu, Israel mite chung a Pakai lunghan khohje aphondoh’a ahildingin thupeh aneiyin ahi. Pakaiyin athupeh bangin Jeremiah chun abol in, Israel chunga manthahna leh suhgamna hunglhung ding chu kap leh lhilong pum in, Pakaiya kon hunglhung gaothu chu anaphong doh in ahi.
Lekhabu Jihpa Chule Akijih Kum
Anathot khomi Hilkiah chapa Jeremiah chu thempu lah’a, themgao jong ahin, aman Pakaiya kon’a aheng’a thu hunglhung ho abonchan aphongdoh in, atohkhompi Baruch toh kithokhom in ana jihlut un ahi.
Jeremiah phatsung hi, BC 626-586 sung ahin, ama toh phat kibang a um themgao dang ho chu Nahum, Zephaniah, Habakuk chuleh Obadiah ahiuve.
Asung Thu Kihop Khendan
Jeremiah lekhabu sung thu hi, abul’a thumakai chomcha aum'in(1:1-3), abanin Judah leh Jerusalem douna thu kisei doh ho thu aume (1:4-20:18). Chuleh akimvel uva cheng namdang ho douna thu kisei doh ho chu 25:15-38/ Bung 45-51 sunga akisun e.Chuleh Jeremiah kamsoh’a kon kilason’akisunlut thudang ho leh khang thusim kilachom ho chu Bung 26-46 leh 51 sunga akisun e. Asungthu kijih danhi, kum leh phat dungjui tah’a kigoltoh vang ahipoi.
1
Jeremiah Kikou
1 Hiche hi, Benjamin gamsunga Anathoth khomi Hilikiah thempu chapa Jeremiah thusei ho ahi.
2 Judah lengpa Amon chapa Josiah lengvaipoh kum somthum leh thum lhin kum in, Pakai thusei chu Jeremiah henga ahunglhungtan ahi.
3 Hiche ho chu, Josiah chapa Jehoiakim lengvaipoh gei laiyin jong ahunglhungin, chuleh Josiah dangkhat Juda leng Zedikiah lengvaipoh kal kum som leh khat toh lhanga lhinni geiyin, Jerusalem mite sohchanga akikaimang nikho geiyin jong ahunglhung in ahi.
4 Hiti chun Pakai thusei chu kaheng ahunglhung tan ahi.
5 “Keiman nanu naobu sung’a, nalim namel kagondoh masanga, nangma kahetsa nahitai.
Nahung penlhah masanga, Keiman nangma namtin vaipi henga keima themgao ding’a, kathenso’a chuleh kapansah nahitai,’’ ati.
6 Chuphat in kenjong, “Vo thaneipen Pakai, keima kachapang behseh jengin, Nang’a dingin ima seidoh thei ponge,’’ kati.
7 Ahivangin Pakaiyin kajah’a, “Kachapang behseh e, tihih in; Ajeh chu keiman kasolna hoilai hijongleh nache ding, chuleh keiman kapeh thu ho bou nasei ding ahi bouve.
8 Amaho chu kicha hih in, Ajeh chu keiman nangma kaumpi jengding, chuleh kahuh doh jing ding nahi,’’ tin Pakaiyin aseiye.
9 Hichun Pakaiyin akhut ahinlhaang in, kakamsung ahin khoiyin, kajah’a aseitai, “Vetan, keiman kathu ho, nakam sunga kakoipeh tai.
10 Tunia hi, nangma nadindoh’a namtin vaipi leh lenggamho chunga douna thusei dinga, keiman kapansah nahitai. Nangman amaho phabep chu, ajung geiya nabo doh’a naheboh ding; nasuh mang’a chuleh na lekhup ding ahi. Chuleh adang ho chu naphu det’a, nasahdoh ding ahi,’’ ati.
11 Chuin Pakaiyin hitin aseiye,“Jeremiah ven, ipi namum?” ati. Keiman kadonbut in, “Jon-mot thingbah khat kamui,” kati.
12 Hichun Pakaiyin kajah’a, “Adih’e, hichu keiman nangma kavelhi jingin, chuleh kathil gonsa banga kaboltei ding ahi,” ati.
13 Chujouvin, Pakaiyin avellin kajah’a, “Tua adang ipi namum?” ati. Keiman kadonbut in,“sahlam’a kon twibel ki-om phul letlut khat, hung kibung lha kamui,” kati.
14 Hichun Pakaiyin kajah’a, “Adih e, sahlam’a konin kichat umtah manthahna chu hung kipan intin, gamsung a cheng jouse chung a hung chuding ahi.
15 Ngaiyun, keiman sahlam lenggam ho’a kon’a namtin vaipi Jerusalem khopia hung dinga kakoi ding ahi. Hiche hi keima Pakai chun kaseidohsa ahitai. Chutahleh ama hon Jerusalem kulpi kotphung dung jouse leh Juda te khopi dang ho kimvel’a laltouna akidouva, gal abolkhum diu ahi.
16 Chutahleh, keiman kamite achonset jeh’uva achung uva thutanna kaneikhum ding; Ajeh chu ama hon keima einungsun’uvin chuleh lim semthu pathen ang-ah gim namtui ahaluvin ahi. Ama hon akhut tah’uva akisem’u doilim chu ahougam tauve.
17 Thoudoh in, kigosan um'in, Keiman amaho seipeh dinga kathupeh jouse, amaho gaseipeh tan. chuleh amaho chu kicha hih in, achutilouleh amaho masanga kasuhjum ding nahi.
18 Vetan, tunia hi keiman nangma suhchim joulou kulpi dettah, thih khopi leh sum-eng tho kikaikhum banga, kasemdoh nahitai. Nangma gam-leiset pumpi douna-a nadin ding; lengho, gamvaipo ho, thempu ho, chuleh Judah mite jouse douna-a pangdet chet ding a kasem nahitai.
19 ama hon nang douna gal ahinbol diu, hijongleh ajolou diu ahi. ajeh chu keiman nangma kaumpi jing ding chuleh kavenbit ding nahi. Hiche hi, keima Pakaiyin ka phondoh ahi,” ati.