1 Babylon lengpa Nebuchadnezzar chu alengvaipohna gamho’a konin asepai jouse toh ahung konin, Jerusalem leh akimvel’a khopi ho douna gal asattai. Hiche pet chun Pakaiyin Jeremiah henga hitin aseiye. ✡ 2 Zedekiah lengpa henga gachenlang hitin gaseiyin; “Pakai Israel Pathen chun aseiye, keiman hiche khopi hi Babylon lengpa khut a kapehdoh ahitai, chule aman meiya agovam ding ahi. 3 Chule nangjong ama-a kon’a najamdoh louhel ding, nakimandoh ding chuleh Babylon lengpa toh nakimaito tei ding ahi. Chuteng Babylon gam’a sohchanga nakikaimang ding ahi. 4 Amavang, vo Judah lengpa Zedekiah, Pakai thutep hi ngaiyin, Nangma galmun’a nathilou ding ahi, tin Pakaiyin aseiye. 5 Nangma lungmong tah a nathi ding ahinai. Napu napate leng masaho kibolna banga mihon gimnamtui ahin hal uva, nathilong a-op diu; Amaho chu nachung a lainatah’a kapdiu, ohe, ilengpau athitai, atidiu ahi, tin Pakaiyin aseiye, ati. 6 Hichun Jeremiah themgao pan, Pakai thusei chu Zedekiah lengpa henga agaseitai. 7 Hiche pet chun, Babylon lengpa sepaihon Jerusalem leh Judah gamsunga kulpi kikaikhuma kisuse nailou khopi Lachish leh Azekah teni jong chu ahindel khum un gal in asattauvin ahi. 8 Chuin Zedekiah lengpan agamsung mipite toh kitepna khat asemdoh in; soh’a kivul ho jalen nading thu aphondoh jou chun, Pakaiyin Jeremiah henga hitin ahinseiyin ahi. 9 Aman amitakip henga thupeh aneiyin, Hebrew mi soh’a kivul jouse, numei hihen pasal hijongleh, abon’a alha-ong diuvin thupeh aneiyin ahi. Koiman anammi Hebrew mi chu soh a anei thei louhel ding ahi, tin aseitai. 10 Chuin leng chapaten jong chule mipiten jong, abonchauvin lengpa thupeh chu ajuicheh uvin, asohteu chu abonchauvin achamlhat sah tauve. 11 Ahin khonung in, ama hon alung’u akhelkit uvin, alha-ongsau soh numeiho le pasal ho chu, abon uvin anung mat kit uvin, soh in aneikittauve. 12 Hijeh chun Pakaiyin Jeremiah henga hitin aseitai. 13 Pakai Israel Pathen chun hitin aseiye, Keiman napu napateu chu asohchannau Egypt gam’a kon’a kahuh doh chun, amaho toh kitepna khat kana semdoh in ahi. 14 Keiman napu napateu jah’a, kumgup nasoh uva pangsa Hebrew mi poupou, kumgup sehleh nalha-ong uva nachamlhat sah teitei diu ahi, kati. Ahivangin ama hon ka thusei ho ngai nahsah in aneipouve. ✡ 15 Tunin nang hon kathupeh bangin lung naheiyun, Israel in nakom’a soh a umho lhadoh dingin nakinopto sohtauve. Nanghon keima Hou-In sung laitah’a, ikihounau bangin kitepna khat nasemtauve. 16 Ahinlah, nang hon lung nakhel kit un, nakitepnau nasukeh uvin, nalhadohsau soh numeiho leh soh pasal ho jouse, nanung mat kit uvin, nasoh uvin napansah kit uvin, kamin chu nasunoh tauvin ahi. 17 Hijeh chun Pakaiyin hitin aseiye, “Nanghon kathupehsa nanam chanpi ho soh’a kon’a nachamlhat sah diu ahi, kati chu najuitapouve. Keiman nangho gal a mangthah ding, kelthoh a genthei ding chule natlesat thigam dinga kalha-ong diu nahi tauve. Chutahle vannoiya namtin vaipin natijat pi uva nakidah diu ahi. 18 Nanghon ikitepnau nasukehtauve. Nanghon nakihahsel uva bongnou nahapsat uva, akah’a nakijot bang uva chu, keiman nangho kahapsat ding nahiuve. 19 Keiman nangho kasattel diu, vaipo ho, thempuho chule mipite jouse, bongnou kisattel banga kasattel diu ahi. ajeh chu nang hon nakitepnau nasukehtauve. 20 Keiman nang hon namelmateu khut a kapehdoh u nahitai. Ama hon namat uva nathadiu, chule natahsa uchu gamsaho leh vachaten anehdiu ahi. 21 Keiman Judah lengpa Zedekiah leh avaipote abonchauva, nanghoa kon’a kinungtolsa Babylon lengpa khut a kapehdoh ding ahi. 22 Keiman Babylon sepaite kalekou kit ding; ama hon hiche khopihi ahin delkhum diu, meiya ahalvam diu ahi. Hitia chu Judah gamsung khopi jouse kasuhmang ding, chule beihel a ahomkeova kakoi ding ahi, ati.