17
Lhumlam Manasseh Gam Kipe
1 Gamlo ding kihopna aban a chu Joseph chilhah chamasa Manasseh phung akehkhat chu akipen ahi. Manasseh chapa masa Makir chu Gilead dia apa ahi. Ama chilhah ho hi gal-hat mi ahijeh un Jordan solam gamkaija um Gilead le Bashan chu ana kipesa ahi.
2 Hiti chun Jordan lhumlam gamkai Abizer, Helek, Asreil, Shechem, Hepher, chuleh Shemida ho hi Manasseh phungkhai sung lah a avat nalai insungho chan ding ahi. Hiche bahkhai ho hi Joseph cha Manasseh chilhah pasal ho thalheng ahiuve.
3 Ahi jeng vang'in Manasseh chapa Makir, Makir chapa Gilead, Gilead chapa Hepher, Hepher chapa Zelophahad chu cha neilou ahin, aman chanu bou aneijin amaho min chu Malah, Noah, Haglah, Milcah chuleh Tirzah ahiuve.
4 Hiche numei ho hi, thempupa Eleazer, Nun chapa Joshua, chuleh Israel lamkaiho kom'ah ahungun hitin ahung seijun ahi, “Pakaijin, Mose jah a eiho leh kasopi teu pasal ho gamlo ding eipeh diovin thupeh anapen ahi” atiuve.
Hijeh chun Joshua’n jong amaho chu Pakai thupeh banga apangah teu chan bangin gam chu anapen ahi.
5 Hijeh chun Manasseh chan apumpi chu Jordan vadung galla Gilead leh Bashan gam chan banna chu gam chan som ahung lhingtan ahi.
6 Ajeh chu Manasseh chilhah numei ho jong pasal chilhah chan toh kibanga achan jeh u ahi. (Gilead gam chu Manasseh chilhah pasal amoh ho kipe ahi).
7 Manasseh phung gamgi chu Asher gamgi hina a kon'in Secheme kom Micmethath chan geijin ahung kikholutnin ahi. Hichea kon chun gamgi chu Micmethath a kon'in achesuh in Tappuah twinah putna kom'a chenna munho geijin ahung kilhung lut in ahi.
8 Tappuah velkolla gamho chu Manasseh chan ahi. Manasseh gamgi a um Tappuah khopi tah vang chu Ephraim phung mite chan ahi.
9 Tappuah twinah putna a kon'in Manasseh gamgi chun Kanah vadungneo chu ajuijin Meditteranean twikhanglen'ah alutnin ahi. Hiche vadungneo lhanglanga khopi phabep chu Manasseh gamsung ahi, ahinla hiche ho chu atahbeh in Ephraim phungho chan ahi.
10 Alhangpi in, hiche vadungneo lhanglam gam chu Ephraim te chan ahi, chuleh vadungneo sahlang gam chu Manasseh te chan ahi. Manasseh gamgi vadungneo sahlang gamkai chutoh akilhon'in Mediterranean nah a atangin ahi. Manasseh sahlang chu Asher gam ahin chuleh sahlang vang chu Issachar gam ahi.
11 Ahivangin Issachar le Asher gamgi sunga um khopi ho, Beth-shan khopi, Ibleam khopi, Dor khopi (Hichu Naphoth-dor), Endor, Taanach khopi chule Megiddo khopi ho leh agamsunga cheng ho jouse chu Manasseh chan din ana kipe tan ahi.
12 Ahinlah Manasseh chilhah chengse chun hiche khopi ho chu ana lalut jou pouvin ahi. Ama hon Canaan mite chu ana delmang jou pouvin tuni geijin aum nalaijun ahi.
13 Ahinlah khonunga Israel te ahung hatdoh phat uvin Canaan mite chu soh in amang tauvin ahi. Ahinlah agamsung uva kon'in anodoh jou pouvin ahi.
Ephraim Le Lhumlam Manasseh Gam Thumbe
14 Joseph chilhah te Joshua kom'ah ahungun hiti hin ahung dong’ui, “Pakaijin hibanga eipunsah uva ipi dinga kachenna diu gam hi chan khatbou neipeh ham?”
15 Joshua’n adonbutnin “Nangho natam lheh jengtah uva Ephraim thinglhang gam nangho dinga aneotah a ahileh hiche Periz mite le Reph mite channa gammang lah khu nangho dingin gakisuhtheng tauvin,” atipeh in ahi.
16 Joseph chilhah te chun adonbutnin, “Thinglhang gam hi keiho dingin alhing joupoi katiu hi atahbeh ahi. Ahinlah Canaan mite gamnom'a cheng ho leh Jezreel phaicham'a um ho hin thih sakol kangtalai aneiyun, amaho hi keihon kadou diuvin ahahsa val'e,” atiuve.
17 Hichun Joshua’n Joseph chilhah te Ephraim le Manasseh phung mite ho kom'ah hitin aseije “Nangho hi natam uvin nahat lheh jeng tauve ahileh nangho dinga hi chan khat val kipe ding nahiuve.
18 Thinglhang gammang lah khu nangho nachan bediu ahi. Nanghon nasuhtheng nom chanun gaki suhthengun agamlapen aningkoi chan geijin galo tauvin phaicham'a Canaan mite jeng jong khu hat lheh uhenlang thih sakol kangtalai nei jongleu ganodoh tauvin,” ati.